1 Deg useggʷas wiss sebɛa issejhed Yahuyadaɛ ixef nnes uca igga ijj n řɛahd jmiɛ ak-d řqebṭanat n mya, Ɛazarya, mmis n Yuram d Ismaɛil, mmis n Yuḥanan, d Ɛazarya, mmis n Ɛubid, d Maɛasiya, mmis n Ɛadaya, d Ilicafaṭ, mmis n Zikri. 2 Nitni kkin x temmurt n Yahuda, ssmunen Ilawiyyen zi tneddam n Yahuda uřa d izeǧifen n tudrin n ibabaten n Israil uca usin-dd ɣar Urcalim. 3 Marra agraw n řgens igga ijj n řɛahd ak-d ujeǧid di Taddart n AREBBI u netta inna asen: “Xzar, mmis n ujeǧid aqa ad idweř d ajeǧid, am mammec i t inna SIDI x iḥenjiren n Dawud!” 4 Yumur i-ten, inna: “D man aya i ɣa teggem: ict n ttuřut nwem, inni n ikehhanen d Ilawiyyen i ɣa yadfen deg wass n ssebt, ad ɛessen ɣar tewwura. 5 Ict n ttuřut ad tbedd ɣar taddart n ujeǧid u ict n ttuřut ɣar Tewwart n Dsas u marra řgens ad ibedd di řemraḥat n Taddart n SIDI. 6 Uřa d ijj war ittidef ɣar Taddart n SIDI, mɣir ikehhanen d ayt n Lawi, inni ittsexxaren, ad adfen, maɣar nitni d imqeddasen u marra řgens ad iḥḍa min ittxeṣṣan ad ittwaḥḍa i SIDI. 7 Ayt n Lawi ad quwwaren i ujeǧid, kuř aryaz s řesnaḥ nnes deg ufus nnes, u wenni i ɣa yarzun ad yadef ɣar Taddart ad ittwaneɣ. Kenniw ad teqqimen ak-d ujeǧid mani ma iǧa ɣar twasit d wuffuɣ.

8 Ayt n Lawi d marra Yahuda ggin am mammec marra min i d asen yumur ukehhan Yahuyadaɛ uca iwyen kuř ijj zzaysen iryazen nnes nni yudfen di ssebt uřa d yenni dd-iffɣen di ssebt, maɣar akehhan Yahuyadaɛ war iwci řeɛwacar i terbiɛin. 9 Akehhan Yahuyadaɛ iwca i imeqqranen n mya lansat d tseddariyin n uɛeskari iqesḥen i tuɣa iǧan n ujeǧid Dawud, d tinni i tuɣa iǧan di Taddart n AREBBI.

10 Issbedd řgens, kuř ijj s lansa nnes deg ufus, zeg uɣezdis afusi n Taddart ař aɣezdis azeřmaḍ n Taddart, ɣar uɛalṭar u ɣar Taddart, ammu i dd-quwwaren i uheṭṭu n ujeǧid.

11 Nitni ssuffɣen-dd mmis n ujeǧid ɣar barra uca ggin as ttaj x uzeǧif uca wcin as Cchadet. Ammu i t ggin uca Yahuyadaɛ d iḥenjiren nnes dehnen t, nnan: “Tudart i ujeǧid!”

12 Umi tesřa Ɛatalya řḥess n řgens i dd-yusin ttazzřen ɣar din uca ssemɣaren ajeǧid, tudef-dd ɣar řgens di Taddart n SIDI.

13 Teẓra, u xzar, ajeǧid ibedd ɣar upilar ɣar wadaf, u řqebṭanat d inni ittsuḍen di řebwaq bedden ɣar ujeǧid. Marra řgens n temmurt ifraḥ u iṣuḍ di řɣayṭat. Uřa d imedyazen ak-d dduzanat n lmusiqa inni issnen mammec i ɣa ṣebbḥen bedden din. Xenni tcarreg Ɛatalya arruḍ nnes uca tesɣuyy: “Tamenziwt, tamenziwt!”

14 Maca yumur ukehhan Yahuyadaɛ i řqebṭanat n mya, inni i tuɣa iǧan x řɛeskar, uca inna asen: “Suffɣem tt-i-dd ɣar barra uca nɣem s ssif wi tt ɣa iḍfaren. Maɣar akehhan tuɣa inna: “War tt neqqem di Taddart n SIDI!”

15 Nitni ssarsen xas ifassen uca umi iwḍen ɣar wadaf n Tewwart n Iysan ɣar taddart n ujeǧid, nɣin tt dinni.

16 Igga Yahuyadaɛ ijj n řɛahd jar as-dd d marra řgens d ujeǧid ḥima ad iřin d ijj n řgens i SIDI.

17 Xas uca yudef marra řgens ɣar zzawect n Baɛal u hedmen tt. Iɛalṭaren nnes d řexyařat nnes arẓin ten qaɛ. U nitni nɣin Mattan, akehhan n Baɛal, zzat i iɛalṭaren.

18 Igga Yahuyadaɛ tasexxart x Taddart n SIDI deg ufus n ikehhanen n ayt n Lawi nni tuɣa ibḍa Dawud di terbiɛin i Taddart n SIDI ḥima ad qeddmen tiɣarṣa n wecmaḍ n SIDI am mammec ittwari di Ccariɛa n Musa, s řefraḥet d izřan, am t iweṣṣa Dawud.

19 Netta issbedd iɛessasen x tewwura n Taddart n SIDI, maḥend uřa d ijj mammec ma igga mařa ixmej, war din ittidef ca. 20 Netta yiwi imeqqranen n mya d ayt n jjehd d ayt n bu-ṣṣulṭa jar řgens d marra řgens n temmurt uca issehwa ajeǧid zi Taddart n SIDI u nitni udfen ɣar taddart n ujeǧid zi Tewwart Yuɛřan uca ssɣimen ajeǧid x řɛarc n tgeldit. 21 Marra řgens n temmurt ifarḥ u tandint tedweř tarsa, awarni umi nɣin Ɛatalya s ssif.