1 Yahucafaṭ ittwassars deg wenḍeř jar řejdud nnes. Netta ittwanḍeř jar řejdud nnes di tendint n Dawud. Mmis Yahuram idweř d ajeǧid deg wemcan nnes. 2 Aytmas, iḥenjiren n Yahucafaṭ tuɣa aten d Ɛazarya, Yaḥiyil, Zakariyya, Ɛazaryahu, Mixayil d Cafaṭya. Ina marra tuɣa aten d iḥenjiren n Yahucafaṭ, ajeǧid n Israil. 3 Babatsen iwca asen aṭṭas n terzifin n nnuqart d wureɣ d řeqcuɛ iɣřan uřa d tineddam ifaryen di Yahuda, maca tageldit iwca i-tt i Yahuram, maɣar wanita tuɣa d amenzu.

4 Umi ikkar-dd Yahuram x tgeldit n babas uca imneɛ di tizemmar nnes, inɣa marra aytmas s ssif, uřa d ca n řḥukkam n Israil. 5 Yahuram tuɣa ɣares tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim. 6 Netta yuyur deg webrid n ijeǧiden n Israil, am mammec tuɣa tegga taddart n Axab, maɣar yeǧis n Axab tedweř d tamɣart nnes. Netta igga min iǧan d aɛeffan di tiṭṭawin n SIDI. 7 Maca SIDI war ixs ad yareddeǧ Dawud di ṭṭweɛ n Řɛahd i igg ak-d Dawud uřa umi d as tuɣa inna, ad as iwc řebda ijj n řefnar zzat i tiṭṭawin nnes, i netta u i iḥenjiren nnes.

8 Deg wussan nnes ixtutteř Idum s uɣewweɣ zi sadu ifassen n Yahuda, uca ggin ijj n ujeǧid x yixef nsen. 9 Iɛdu Yahuram ak-d marra imeqqranen nnes d marra ikarruten nnes n umenɣi. Aqa ikkar s ǧiřet u iɣřeb x ayt n Idum inni i tuɣa i d as dd-innḍen, i netta u i imeqqranen n ikarruten n umenɣi.

10 Waxxa amenni xtuttřen ayt n Idum s uɣewweɣ zi jar ifassen n Yahuda, ař ass-a. Di řweqt nni beɛda iɣewweɣ uřa d Libna, maɣar tuɣa Yahuda iḥeyyed x SIDI, AREBBI n ibabaten nnes.

11 Netta issbedd uřa d řegɛudi x idurar n Yahuda u yarra imezdaɣ n Urcalim ad ssfesden ixef nsen s irebbiten nneɣni, wah tuɣa iɛarn Yahuda ɣar man aya.

12 Tiweḍ-dd ɣares ict n tebrat n unabi Iliya, teqqar: “Ammu i iqqar SIDI, AREBBI n babac Dawud: ‘Maɣar war tuyured x ibriden n babac Yahucafaṭ u x ibriden n Asa, ajeǧid n Yahuda,

13 maca tuyured x ibriden n ijeǧiden n Israil uca tarrid Yahuda d imezdaɣ n Urcalim ad ssfesden ixef nsen s irebbiten inneɣni, am mammec i t tegga taddart n Axab, u minzi cek tenɣid uřa d aytmac zi taddart n babac, inni i tuɣa i xak icnan,

14 xzar, x uyenni SIDI ad cek iřqef s ict n tecti d tameqqrant jar řgens nnek d iḥenjiren nnek d temɣarin nnek d marra agřa nnek.

15 Cek simant nnek ad tewḍid deg ijj n řehřac n tekrict iqesḥen, ař dd ɣa teffeɣ ɛad tekrict nnek ɣar barra zi ssibbet n řehřac, ass iḍfar umas.”

16 SIDI issehweř x Yahuram arruḥ n Ifilistiniyyen d Weɛraben, inni izedɣen x uɣezdis n ayt n Kuc.

17 Nitni geɛɛden ɣar Yahuda, udfen ɣar tammurt u ksin marra agřa nni iǧan di taddart n ujeǧid uřa d iḥenjiren d temɣarin, ařami war d as iqqim mɣir Yahuyaḥaz, amaẓuẓ n iḥenjiren nnes.

18 Awarni aya iwta i-t SIDI s yijj n řehřac war izemmar ad zzayes iggenfa.

19 Umi tuɣa netta ihřec ammu ass iḍfar umas uca iɛdu řweqt ařami ɛdun tnayen n iseggʷusa, imsar, aqa takrict nnes teffeɣ-dd ɣar barra u netta immut s řeḥřiq d ameqqran. Řgens nnes war d as issarɣ ca tmessi am ggin timessi i ibabaten nnes. 20 Netta tuɣa ɣares tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim. Netta ifna, war xas indeb ḥed. Neḍřen t di tendint n Dawud, maca war iǧi deg imeḍřan n ijeǧiden.