1 Yahucafaṭ ɣares agřa d ccan s ufeyyeḍ, u igga ad dewřen d iḍeggʷařen ak-d Axab. 2 Awarni ca n iseggʷusa ihwa-dd ɣar Axab, ɣar Samarya. Axab iɣarṣ i waṭṭas n wuǧi d ifunasen i řgens i tuɣa akides iǧan uca iɣwa t ad iffeɣ ɣar umenɣi ɣar Ramut-Jilɛad. 3 Axab, ajeǧid n Israil, inna i Yahucafaṭ, ajeǧid n Yahuda: “Zeɛma ad kidi teffɣed ɣar Ramut di Jilɛad?” Inna Yahucafaṭ i ujeǧid n Israil: “Necc ad iřiɣ am cek, řgens inu am řgens nnek u neccin ad kidek neffeɣ ɣar umenɣi.”

4 Inna Yahucafaṭ ɛawed i ujeǧid n Israil: “Seqsa ɛafak ass-a x wawař n SIDI.” 5 Xenni issmun ujeǧid n Israil inabiyyen, arebɛa-mya n yeryazen, uca inna asen: “Ma ad ffɣeɣ ɣar umenɣi ɣar Ramut di Jilɛad niɣ ad ggeɣ bnaqes?” Nnan: “Gaɛɛed, maɣar AREBBI ad ten iwc deg ufus n ujeǧid.” 6 Maca Yahucafaṭ inna: “Ma war da ca ɛad anabi n SIDI maḥend ad nzemmar ad t nesseqsa?” 7 Xenni inna ujeǧid n Israil i Yahucafaṭ: “Aqa da ɛad ijj n weryaz zzayes i nzemmar ad nesseqsa SIDI. Maca necc carheɣ t, maɣar netta war d ayi ittnebba ɛemmarṣ s min iṣebḥen, maca mɣir s min iǧan d aɛeffan. Aqa d Mixa, mmis n Yimla.” Inna Yahucafaṭ “War ttejji ajeǧid ad issiweř amenni!” 8 Xenni iřaɣa-dd ujeǧid n Israil i yijj n umsexxar icenɛen, inna: “Deɣya awi-dd Mixa, mmis n Yimla.” 9 Ajeǧid n Israil d Yahucafaṭ, ajeǧid n Yahuda, qqimen din, kuř ijj x řɛarc nnes, yarḍen arruḍ n ijeǧiden, qqimen x unedrar ɣar wadaf n tewwart n tendint n Samarya u marra inabiyyen tuɣa ttnebban zzat i wudem nsen.

10 Ṣidqiya, mmis n Kanɛana, tuɣa igga i yixef nnes accawen n wuzzař, inna: “Ammu i iqqar SIDI: ‘S yina i ɣa tessnuqqbed Iramiyyen ɣares ař ten ɣa teqḍiḍ marra.’ ”

11 Marra inabiyyen tuɣa ttnebban kifkif, nnan: “Gaɛɛed ɣar Ramut di Jilɛad, ad tiřid tfeřḥed, minzi SIDI ad ten iwc deg ufus n ujeǧid.”

12 Areqqas nni tuɣa iṭṭfen abrid ḥima ad iřaɣa i Mixa, issiweř akides, inna: “Xzar xenni, awařen n inabiyyen axmi dd-ffɣen zeg ijj n uqemmum s řxir ɣar ujeǧid. Ttzawgeɣ ad iřin wawařen nnek amecnaw awařen nsen, ini min iṣebḥen.”

13 Maca Mixa inna: “S tidett am iddar SIDI, min d ayi ɣa yini AREBBI, ad t iniɣ.”

14 Umi dd-yusa netta ɣar ujeǧid, inna as ujeǧid: “Mixa, ma ad neffeɣ neccin ɣar Ramut di Jilɛad niɣ ad negg bnaqes?” Inna as netta: “Gaɛɛdem, ad tiřim tfeřḥem, minzi nitni ad ttwaggen deg ufus nwem.”

15 Inna as ujeǧid: “Mecḥař n twařawin i d ayi ittxeṣṣa ad ac ssjaǧeɣ, war d ayi tennid mɣir tidett s Yisem n SIDI?”

16 Xenni inna: “Necc ẓriɣ marra Israil ttwabezzɛen x idurar am wuǧi i war ɣar iǧi Umeksaw. Iqqar SIDI: ‘Ina war ɣarsen bu isiditen, ejj kuř aryaz ad dd-idweř ɣar taddart nnes di řehna.’ ”

17 Xenni inna ujeǧid n Israil i Yahucafaṭ: “Ma war d ac nniɣ: ‘Netta war xafi ittnebba ca di min iṣebḥen, maca mɣir s min iǧan d aɛeffan!’?”

18 Inna ɛawed: “S uyenni seř i wawař n SIDI. Aqa ẓriɣ SIDI iqqim x řɛarc nnes u marra řɛeskar n ujenna ibedd x yeffus nnes d uzeřmaḍ nnes.

19 SIDI inna: ‘Man wen i ɣa iɣwan Axab, ajeǧid n Israil, ḥima ad igeɛɛed, ad iwḍa di Ramut di Jilɛad?’ Wa inna ammu u win inna ammu. 20 Xenni iffeɣ-dd ijj n arruḥ, ibedd-dd zzat i wudem n SIDI, inna: ‘Necc ad t ɣwiɣ.’ Isseqsa t SIDI: ‘S min zi?’ 21 Netta inna: ‘Necc ad dd-ffɣeɣ u ad dewřeɣ d ijj n buḥbeř issxarriqen deg uqemmum n marra inabiyyen nnes.’ U Netta inna: ‘Ad tawḍed maḥend ad t teɣwid. Ffeɣ, egg amenni!’ 22 Xenni řexxu, SIDI iwca ijj n buḥbeř issxarriqen deg ufus n inabiyyen nnek u SIDI ibarreḥ xak s min iǧan d aɛeffan.”

23 Xenni iqarreb-dd Ṣidqiya, mmis n Kanɛana, ɣar Mixa, iwwet i-t ɣar uɣesmir, inna: “Mani xenni tuɣa zzayi iɛdu Arruḥ n SIDI ḥima ad kidek issiweř?” 24 Inna Mixa: “Xzar, ad t tẓared deg wass nni di ɣa temhafed zeg ijj n wexxam ɣar wexxam nneɣni ḥima ad tessnuffared ixef nnek.” 25 Ajeǧid n Israil inna: “Ṭṭfem Mixa, nedhem ɛawed t ɣar Amun, azeǧif ameqqran n tendint, u ɣar Yuwac, mmis n ujeǧid, 26 ad tinim: ‘Ammu i iqqar ujeǧid: Nḍarem wa di řeḥbes u seccem t s weɣrum n řeḥṣaret u s waman n řeḥṣaret ař ɣa dewřeɣ di řehna.’ ” 27 Xenni Mixa inna: “Mařa tɛeqbed-dd ca n wass di řehna, xenni SIDI war xafi issiweř!” Uca inna ɛawed: “Sřem-dd a řegnus, marra kenniw!”

28 Awarni as iffeɣ-dd ujeǧid n Israil ak-d Yahucafaṭ, ajeǧid n Yahuda, ɣar Ramut di Jilɛad. 29 Inna ujeǧid n Israil i Yahucafaṭ: “Necc ad beddřeɣ arruḍ, xenni ad dd-ffɣeɣ ɣar umenɣi. Maca cek tzemmared ad tyarḍed arruḍ nnek!” Ajeǧid n Israil igga arruḍ war iǧi nnes uca ffɣen-dd ɣar umenɣi. 30 Ajeǧid n Aram tuɣa yumur imeqqranen n ikarruten n umenɣi nni ɣares iǧan, inna “Ittxeṣṣa awem war ttmenɣam ca ak-d umeqqran niɣ ak-d umeẓyan, mɣir ak-d ujeǧid n Israil!” 31 Umi imeqqranen n ikarruten n umenɣi ẓrin Yahucafaṭ, imsar, aqa nitni nnan: “Aqa d wa, ajeǧid n Israil!” Nitni nnḍen as ḥima akides mmenɣen, maca Yahucafaṭ isɣuyy uca SIDI iwca as afus u AREBBI issḥeyyeḍ i-ten xas. 32 Umi ẓrin imeqqranen n ikarruten n umenɣi, aqa netta tuɣa war iǧi d ajeǧid n Israil, imsar, aqa dewřen-dd x webrid nsen, war t areddfen ɛad.

33 Xenni iɛeyyen ijj n weryaz řqews s řbař nnes d acemřař uca iřqef fřitca ajeǧid n Israil jar wawaḍ n iɣaǧen n warruḍ nnes n wuzzař. Řexdenni inna wanita i wenni ineddhen akarru: “Qřeb afus nnek, suffeɣ ayi-dd zi řɛeskar, maɣar aqa yezmeɣ.” 34 Deg wass nni idweř umenɣi iwɛar aṭṭas. Iqqim ujeǧid n Israil ibedd deg ukarru ař tameddit deg umenɣi ak-d Iramiyyen, immut ɣar řweqt n uɣeǧay n tfuct.