Řehkamet ijehden n Yahucafaṭ x Yahuda
17
1 Mmis Yahucafaṭ idweř d ajeǧid deg wemcan nnes u netta issejhed ixef nnes ḍidd i Israil. 2 Netta yiwi řɛeskar ɣar marra tineddam ifaryen n Yahuda u igga řɛeskarat n uḥewwes di temmurt n Yahuda u di tneddam n Ifrayim, tinni i tuɣa iṭṭef babas Asa. 3 SIDI tuɣa-t ak-d Yahucafaṭ, maɣar netta iḍfar ibriden imezwura n babas Dawud, war yarzu ca x Ibaɛlen, □ 4 maca yarzu x AREBBI n babas uca yuyur di tweṣṣa nnes, war iggi am t igga Israil. 5 SIDI issemten tagelda tenni deg ufus nnes u marra Yahuda yiwi tirzifin i Yahucafaṭ. Idweř ɣares aṭṭas n wagřa d ccan. 6 Uř nnes ittwasemḥeḍ deg ibriden n SIDI u netta ikkes uřa d řegɛudi d trebbin n cwarti zi Yahuda. 7 Deg useggʷas wiss třata n řeḥkamet nnes issekk ict n tebrat i řḥukkam, i Bin-Ḥayil, Ɛubadya, Zakariyya, Nataniyil d Mixaya, ḥima ad ssɣaren di tneddam n Yahuda. 8 Ruḥen akidsen Ilawiyyen Cmaɛya, Natanya, Zabadya, Ɛasayil, Camiramut, Yunatan, Tubiya d Ṭub-Aduniya, marra Ilawiyyen, uca uřa d ikehhanen Alicamaɛ d Yahuram ruḥen akidsen. 9 Nitni ssɣaren di Yahuda u tuɣa ɣarsen adlis ittwannḍen n Ccariɛa n SIDI. Kkin marra tineddam n Yahuda uca ssɣaren řgens.
10 Tusa-dd arrehbet n SIDI x marra tigeldiwin n temmura i-dd-innḍen i Yahuda, ařami war ssekkarent amenɣi ak-d Yahucafaṭ.
11 Zeg Ifilisṭiniyyen usin-dd ca iwyen tirzifin d nnuqart am ljizya i Yahucafaṭ. Uřa d Aɛraben ssekken as uǧi: sebɛa-ařaf u-sebɛa-mya n icarriyyen d sebɛa-ařaf u-sebɛa-mya n imuyan.
12 Ammu i idweř Yahucafaṭ yarni di řemɣaret ař ṭṭarf uca ibna lqelɛat d tneddam n řexzen di Yahuda.
13 Tuɣa ɣares aṭṭas n řxedmet di tneddam n Yahuda, uřa d iɛeskariyyen, ayt n bu-teɣruḍt imeḥḍen, di Urcalim.
14 D wanita d řqedd nsen, ɛlaḥsab tudrin n ibabaten nsen. Di Yahuda aqa ina d imeqqranen x řuřuf: ameqqran Adna, u akides teřt-myat-ařef n ayt n bu-teɣruḍt imeḥḍen.
15 Ɣar uɣezdis nnes ameqqran Yahunatan, u akides mitayen u-tmanyin-ařef n yeryazen.
16 Ɣar uɣezdis nnes ameqqran Ɛamasya, mmis n Zikri, wenni tuɣa isebbřen ixef nnes s řxaḍar, u akides mitayen-ařef n ayt n bu-teɣruḍt imeḥḍen.
17 Zi Binyamin tuɣa Aliyadaɛ, ijj n bu-teɣruḍt imeḥḍen, d ameqqran nsen, u akides mitayen-ařef n yeryazen s řqews d tseddart n uɛeskari i umenɣi.
18 Ɣar uɣezdis nnes ameqqran Yahuzabad u akides mya u-tmanyin-ařef n yeryazen ḥezzmen i umenɣi.
19 Ina tuɣa ttsexxaren i ujeǧid, břa inni i tuɣa igga ujeǧid x tneddam ifaryen s řeḥyuḍ di marra Yahuda.