1 Iɛqeb-dd Yahucafaṭ, ajeǧid n Yahuda, ɣar taddart nnes di Urcalim di řehna. 2 Yahu, mmis n Ḥanani, amwařaw, iffeɣ-dd ɣares ḥima ad t iřqa, inna i ujeǧid Yahucafaṭ: “Ma cek teggid twiza i uɛeffan u ad texsed inni iɛiffen SIDI? Ammu i xak dd-yusa uduqqez n weɣḍab zi zzat n wudem n SIDI. 3 Waxxa amenni ittwaf dayek min iṣebḥen, maɣar tekksed tirebbin n cwarti zi temmurt uca teswejded uř nnek i tarezzut x AREBBI.”

4 Yahucafaṭ iqqim izeddeɣ di Urcalim uca iffeɣ ɛawed jar řgens, zi Bi’r-Sebɛa ɣar idurar n Ifrayim, uca yarra i-ten ad dd-dewřen ɣar SIDI, AREBBI n ibabaten nsen. 5 Netta yařeqqem řquḍat di temmurt, di marra tineddam ifaryen n Yahuda, zi tendint ař tandint. 6 Netta inna i řquḍat: “Xzarem min ɣa teggem, maɣar war tḥekkmem i iwdan, maca i SIDI u Netta aqa iḥḍar akidwem deg weḥkam. 7 Xenni řexxu, ad xawem tiři tiggʷudi n SIDI. Ḥḍam u ggem t, maɣar ɣar SIDI, AREBBI nneɣ, war iǧi řɣecc u Netta war ittegg s wudmawen u war ikessi tirzifin.”

8 Umi dd-ɛeqben ɣar Urcalim, igga Yahucafaṭ di Urcalim ɛawed ca n Ilawiyyen d ikehhanen d izeǧifen n tudrin n ibabaten n Israil i udebbar n řeḥkam n SIDI u i ddɛawi. 9 Netta yumur i-ten, inna: “Ggem amenni s tiggʷudi n SIDI, s řaman u s yijj n wuř nican imun.

10 Ɣar kuř ddeɛwet i d awem i d ɣa yawyen aytmatwem nni izeddɣen di tneddam nsen, jar idammen d idammen u jar Ccariɛa d řumur d tewṣiyyat d lfarayiḍ, ittxeṣṣa ad asen tɛeřmem, maḥend war ttɛeddan x SIDI, ařami xawem dd ɣa iwḍa uduqqez d ameqqran n weɣḍab, u x aytmatwem. Ggem amenni, xenni war daywem tt ittegg ḥed.

11 Xzarem, Amarya d akehhan ameqqran i xawem iǧan di marra ddeɛwet n SIDI, u Zabadya, mmis n Ismaɛil, řḥakem n taddart n Yahuda, aqa-t x kuř ddeɛwet n ujeǧid. Uřa d iweqqafen, Ilawiyyen, aqa-ten din zzat i wudem nwem. Iřim d iryazen u ggem t uca SIDI ad yiři ak-d wenni iṣeřḥen.”