Asa, ajeǧid n Yahuda, d uɣelleb nnes x Zaraḥ
14
1 Asa igga min iǧan nican di tiṭṭawin n SIDI, AREBBI nnes. 2 Netta ikkes iɛalṭaren n irebbiten iɣriben d řegɛudi uca yarẓa imayḍuten iqeddsen uca ihdem tirebbin n cwarti. 3 Netta inna i Yahuda, ad arzun SIDI, AREBBI n ibabaten nsen uca ad ḍfaren Ccariɛa d tewṣeyyet. 4 Netta ikkes ɛawed řegɛudi d ipilaren n arebbi n tfuct zi marra tineddam n Yahuda. Tageldit tuɣa ɣares řhudnet sadu netta. 5 Ibna tineddam ifaryen di Yahuda maɣar tammurt tuɣa dayes řhudnet. War tuɣi din amenɣi akides deg iseggʷusa nni minzi SIDI iwca as řhudnet. 6 Maɣar netta inna i Yahuda: “Ejj aneɣ ad nebna tineddam-a uca ad tent nessar s řeḥyuḍ d lburjat d tewwura d iɛumad n wefray, maɣar tammurt ɛad zzatneɣ s řhudnet, minzi neccin narzu x SIDI, AREBBI nneɣ, narzu xas u Netta iwca aneɣ řhudnet.” U nitni bnan uca feřḥen. 7 Asa tuɣa ɣares ijj n řɛeskar n teřt-myat-ařaf n yeryazen zi Yahuda, inni iksin taseddart n uɛeskari tameqqrant d lansa, mitayen u-tmenyin-ařef n yeryazen zi Binyamin, inni yarebbun taseddart n uɛeskari u zemmaren x řqews. Nitni marra tuɣa aten d ayt n bu-teɣruḍt imeḥḍen.
8 Iffeɣ Akucit Zaraḥ i umenɣi akidsen s yijj n řɛeskar n ijj n melyun n yeryazen d teřt-mya n ikarruten. Netta yusa-dd ař Marica. 9 Iffeɣ Asa i umsagar akides uca sedden nitni ixef nsen i umenɣi di teɣzurt n Ṣafata ɣar Marica.
10 Asa iřaɣa ɣar SIDI, AREBBI nnes, inna: “A SIDI, aya isheř xak ḥima ad tadfed jar yenni deg waṭṭas d yenni war ɣar iǧi jjehd. Ɛawen aneɣ, a SIDI, AREBBI nneɣ, maɣar nettceř xak u nusa-dd qibač i řɣaci aya s Yisem nnek. A SIDI, Cek d AREBBI nneɣ, war ttejji uřa d ijj n weryaz ad akidek immɛařa.”
11 Uca SIDI iwta ayt n Kuc zzat i wudem n Asa d Yahuda, uca arewřen ayt n Kuc.
12 Asa d řgens i tuɣa akides, ḍfaren ten ař Jarar. Wḍan aṭṭas zeg ayt n Kuc ařami war zemmaren ad bedden ɛad, minzi nitni ttwaɣeřben zzat i wudem n SIDI d řɛeskar nnes. Nitni ṭṭfen ict n tkeccaḍt d tameqqrant.
13 Nitni wtin marra tineddam i dd-innḍen i Jarar, maɣar arrehbet n SIDI tewḍa-dd xasen. Nitni keccḍen marra tineddam, maɣar tuɣa tban-dd daysent aṭṭas n tkeccaḍt.
14 Nitni hedmen uřa d iqiḍan n řmař uca ṭṭfen uǧi d iřeɣman. Xenni ɛeqben ɣar Urcalim.