1 Xenni yusa-dd Arruḥ n AREBBI x Ɛazarya, mmis n Ɛudid. 2 Netta yuyur ibedd zzat i Asa, inna as: “Seř-dd ɣari, Asa, d marra ayt n Yahuda d Binyamin! SIDI aqa-t akidwem u kenniw akides. Mařa tarezzum xas, Netta ad kenniw yarr ad t tafem, maca mařa kenniw tḥeyydem xas, ad xawem iḥeyyed uřa d Netta. 3 Aṭṭas n wussan i iqqim Israil břa AREBBI n tidett u břa ijj n ukehhan issɣaran u břa Ccariɛa. 4 Mařa dewřen-dd nitni ɣar SIDI, AREBBI n Israil, di řeḥṣaret u arzun xas, ijja i-ten ad t afen. 5 Deg wussan nni war din tuɣi řehna i wenni dd-iffɣen u i wenni yareggʷḥen, maɣar aqa din aṭṭas n řeḥweř jar marra imezdaɣ n temmura. 6 Ijj n řgens ittwaɛfes zeg ijj n řgens nneɣni u ict n tendint zeg ict n tendint nneɣnit, maɣar AREBBI issiggʷed i-ten s kuř řeḥṣařet. 7 Kenniw maca iřim d iryazen, war ttejjim ad arxun ifassen nwem, maɣar aqa din řmunet i řxedmet nwem.” 8 Umi Asa isřa awařen-a d nnubuwa n unabi Ɛudid, issejhed ixef nnes uca issbeɛɛed nnɛawat n ṣṣanam zi marra tammurt n Yahuda d Binyamin u zi marra tineddam nni tuɣa iṭṭef x idurar n Ifrayim uca iɛdeř uɛalṭar n SIDI, wenni iǧan zzat i wesqif n wadaf i Zzawect n SIDI. 9 Issmun marra Yahuda d Binyamin, uřa d ibarraniyyen zeg Ifrayim, zi Manassa u zi Cimɛun. Maɣar aṭṭas zi Israil ɛdun ɣares, umi nitni ẓrin, aqa SIDI, AREBBI nnes, tuɣa-t akides.

10 Nitni munen di Urcalim deg uyur wiss třata, deg useggʷas wiss xemmesṭac n tgelda n Asa.

11 Deg wass nni wehhben nitni sebɛa-mya n ifunasen d tfunasin d sebɛa ařaf n wuǧi d tɣarṣt i SIDI zi tkeccaḍt i kidsen iwyen.

12 Nitni udfen ɣar ijj n Řɛahd ak-d SIDI maḥend ad arzun SIDI, AREBBI n ibabaten nsen, s marra uř nsen u s marra řeɛmar nsen.

13 Marra wenni war yarezzun x SIDI, AREBBI n Israil, ittxeṣṣa ad ittwaneɣ, am umeẓyan am umeqqran, am weryaz am temɣart.

14 Nitni jjuǧen i SIDI s tmijja tejhed, sadu uṣuḍi s řɣayṭat d waccawen n icarri.

15 Marra Yahuda tfarḥ x tjaǧit maɣar nitni tuɣa ggin tt s marra uř nsen umi nitni arzun xas s marra arḍa nsen u Netta ijja i-ten ad t afen uca SIDI iwca asen řhudnet zi marra iɣezdisen nsen.

16 Issḥeyyed Asa uřa d ḥennas Maɛka zi jjehd nnes, maɣar nettat tuɣa tegga ict n jjɛifect n řexyař i trebbit n cwarti. Asa iceqqar jjɛifect nnes, iřbez i-tt uca isscemḍ i-tt ɣar teɣzart n Qidrun. ^■  

17 Waxxa war ttwaḥeyydent řegɛudi, maca uř n Asa tuɣa icḍar nican i SIDI, marra ussan n tudart nnes. ^■  

18 Tiwhibin iqeddsen n babas d min tuɣa issqeddes netta s yixef nnes yiwyi-t di Taddart n AREBBI uřa d tiwhibin nnes iqeddsen: nnuqart d wureɣ d řeqcuɛ nneɣni. ^■  

19 War din iqqim ɛad umenɣi ař aseggʷas wiss xemsa u-třatin n tgelda n Asa.