1 Deg useggʷas wiss tmenṭac n ujeǧid Yarubɛam, mmis n Nabaṭ, idweř Abiya d ajeǧid x Yahuda. 2 Netta iḥkem třata n iseggʷusa di Urcalim. Yemmas qqaren as Mixaya, yeǧis n Uriyil zi Jibɛa. Tuɣa maca umenɣi jar Abiya d Yarubɛam. 3 Abiya issekkar amenɣi s ijj n řɛeskar n ayt n bu-teɣruḍt imeḥḍen, arebɛa-myat-ařef n yeryazen ittwafarzen, uca Yarubɛam igga aseddi s temn-myat-ařef n yeryazen ittwafarzen, ayt n bu-teɣruḍt imeḥḍen. 4 Ibedd Abiya x tqiccat n wedrar n Ṣamarayim nni iǧan x idurar n Ifrayim, inna: “Sřem ɣari, Yarubɛam d marra Israil! 5 Ma war tessinem ca aqa SIDI, AREBBI n Israil, iwca tagelda x Israil s yijj n Řɛahd n tmeǧaḥt i Dawud u i iḥenjiren nnes i řebda? 6 Maca Yarubɛam, mmis n Nabaṭ, amsexxar n Suliman, mmis n Dawud, ikkar uca iɣewweɣ x sidis nnes. 7 Iryazen ixwan, ayt i war isekkwin, usin-dd ɣares uca ssjehden ixef nsen ḍidd i Raḥabɛam, mmis n Suliman, umi Raḥabɛam tuɣa ɛad d ameẓyan d aḥnin n wuř u war izemmar akidsen imqudda. 8 Uca řexxu, ittɣiř awem ad tiřim tjehdem x tgeldit n SIDI tenni iǧan deg ifassen n iḥenjiren n Dawud. Waxxa, kenniw s yijj n řɣaci ameqqran, maca ɣarwem iyenduzen n wureɣ nni igga Yarubɛam d irebbiten i kenniw. ^□   9 Ma war tenḍarem ikehhanen n SIDI, iḥenjiren n Harun d iḥenjiren n Lawi, u teggim i yixef nwem ikehhanen am mammec tt tteggen řegnus di marra timmura? Marra wenni dd-yusin s yijj n uyenduz, ameẓyan n ufunas, u s sebɛa n icarriyyen i ixsen ad ittwagg d akehhan, aqa idweř d akehhan n yinni war iǧin ca d irebbiten.

10 Maca xaneɣ, aqa SIDI d AREBBI nneɣ u neccin war xas nḥeyyed ca, u ikehhanen nni isexxaren i SIDI, aqa aten d iḥenjiren n Harun, u Ilawiyyen ccarcen akidsen di řxedmet.

11 Kuř ṣṣbeḥ d tmeddit ssbexxaran tiɣarṣa n wecmaḍ i SIDI. Uca ḥḍan ɛawed x řebxur ittfuḥen d usettef n weɣrum n wescan x tẓewḍa tezdeg u x řqendiř n wureɣ u x řefnarat ḥima ad tent ssarɣen kuř tameddit, maɣar neccin nxezzar ɣar tsexxart n SIDI, AREBBI nneɣ, maca kenniw tḥeyydem xas.

12 Xzarem, AREBBI aqa-t akidneɣ ɣar zzatneɣ, u ɣarneɣ uřa d ikehhanen nnes s řɣayṭat i uṣuḍi s wesruddeḥ i umenɣi. A ayt n Israil, war ttmenɣam ca ak-d SIDI, AREBBI n ibabaten nwem, maɣar kenniw war tfřiḥim ca.”

13 Maca Yarubɛam ijja i-ten ad ggen ict n ddura maḥend ad ggen taxceft ɣar ḍeffar nsen. Nitni tuɣa aten zzat i wudem n Yahuda, u ɣar ḍeffar nsen tuɣa din taxceft.

14 Umi nqeřben ayt n Yahuda, ẓrin, aqa amenɣi tuɣa-t zi zzat d zi ḍeffar. Nitni sɣuyyen ɣar SIDI uca ṣuḍen ikehhanen di řɣayṭat.

15 Iryazen n Yahuda ssgeɛɛden deg iɣuyyan n umenɣi u řami ssgeɛɛden iryazen n Yahuda deg iɣuyyan, imsar, aqa AREBBI iwta Yarubɛam d marra Israil zzat i tiṭṭawin n Abiya d Yahuda.

16 Ayt n Israil arewřen zzat i wudem n ayt n Yahuda uca AREBBI igga i-ten deg ufus nsen.

17 Abiya ak-d řgens nnes, wtin ten s ict n tecti d tameqqrant, minzi wḍan \add zzaysen\qt* xemsa-myat-ařef n yeryazen ittwafarzen zi Israil.

18 Ammu i dewřen ayt n Israil nnbehtřen di řweqt nni, maca ayt n Yahuda dewřen jehden, minzi ttecřen x SIDI, AREBBI n ibabaten nsen.

19 Abiya iḍfar Yarubɛam uca iṭṭef zzayes tineddam Bayt-Il ak-d tneddam i ɣares dd-iqqnen d Yacana ak-d dcurat nnes d Ifrun ak-d tneddam i ɣares dd-iqqnen. 20 War teqqim ɛad jjehd ɣar Yarubɛam deg wussan n Abiya. Ɣar uneggar iwta i-t SIDI, ařami immut.

21 Abiya maca idweř yarenni di jjehd. Netta yiwi arbeɛṭac n temɣarin i yixef nnes u ijja-dd tnayen u-ɛicrin n iḥenjiren d seṭṭac n yessis. 22 Min iqqimen n imezruyen n Abiya, am tebridin nnes am wawařen nnes, aqa man aya marra ittwazemmem deg wedlis n tɣuri n unabi Ɛiddu. 23 Abiya ittwassars deg wenḍeř jar řejdud nnes uca neḍřen t di tendint n Dawud uca mmis Asa idweř d ajeǧid deg wemcan nnes. Deg wussan nnes tuɣa ɣares ɛecra n iseggʷusa n řhudnet di temmurt.