1 Umi tuɣa Raḥabɛam issemten tageldit deg ufus nnes u tuɣa ijhed, iwḍa netta zi Ccariɛa n SIDI, netta uřa d marra Israil akides. 2 Deg useggʷas wiss xemsa n ujeǧid Raḥabɛam, imsar aqa Cicak, ajeǧid n Miṣra, igeɛɛed ḍidd Urcalim, minzi nitni tuɣa ɣewwɣen x SIDI, 3 s mitayen-ařef n ikarruten n řɛeskar d setta-ařaf n imnayen d ijj n řgens war izemmar ad ittwaḥseb ca i dd-yusin akides zi Miṣra: Ilibiyyen d Isukkiyyen d Ikuciyyen. 4 Netta iṭṭef tineddam ifaryen n Yahuda uca yusa-dd ɣar Urcalim.

5 Xenni yusa-dd unabi Cmaɛya ɣar Raḥabɛam u ɣar imeqqranen n Yahuda, inni tuɣa imunen di Urcalim di ssibbet n Cicak, inna asen: “Ammu i iqqar SIDI: ‘Minzi kenniw tḥeyydem xafi, x uya ḥeyydeɣ uřa d Necc xawem, jjiɣ kenniw deg ufus n Cicak.’ ” 6 Xenni ssehwan imeqqranen n Israil d ujeǧid, ixef nsen, nnan: “SIDI d amsegged i yeǧa!” 7 Umi iẓra SIDI, aqa nitni ssehwan ixef nsen, iffeɣ wawař n SIDI ɣar Cmaɛya, inna: “Nitni ssehwan ixef nsen. Necc war ten teḥḥiɣ ca, maca ad asen dd-awyeɣ asenjem deɣya, maḥend asɛar inu s ufus n Cicak war ittwaziǧiɛ ca x Urcalim, 8 maca ad dewřen d imsexxaren nnes, ḥima ad ssnen tasexxart i Necc d tsexxart i tgeldiwin n temmura.”

9 Uca Cicak, ajeǧid n Miṣra, igeɛɛed ḍidd i Urcalim u yiwi marra tixubay n Taddart n SIDI d txubay n taddart n ujeǧid. Netta yiwi akis marra, uřa d tiseddariyyin n uɛeskari n wureɣ i tuɣa igga Suliman.

10 Deg wemcan nsent igga ujeǧid Raḥabɛam tiseddariyin n uɛeskari n nnḥas. Igga i-tent deg ifassen n imeqqranen x ireqqasen n tazřa nni tuɣa ittɛessan ɣar wadaf n taddart n ujeǧid.

11 Meřmi ma i ɣa yadef ujeǧid ɣar Taddart n SIDI, imsar, aqa ireqqasen n tazřa usin-dd, arebbun tent u iwyen tent xenni ɛawed ɣar wexxam n ireqqasen n tazřa.

12 Umi isswaḍeɛ Řaḥabɛam ixef nnes, ijja weɣḍab n SIDI xas, ařami war t iḍeyyeɛ marra. Tuɣa din ɛad di Yahuda timesřayin ṣebḥent.

13 Ajeǧid Raḥabɛam issejhed ixef nnes uca iqqim iḥekkem. Raḥabɛam tuɣa ɣares waḥit u-rebɛin n iseggʷusa umi idweř netta d ajeǧid. Netta iḥkem sbeɛṭac n iseggʷusa di Urcalim, di tendint i ixḍar SIDI zi jar marra tiqebbař n Israil ḥima ad din issemten Isem nnes. Yemmas qqaren as Niɛma, tenni d Taɛammunit.

14 Igga min iǧan d aɛeffan maɣar war issewjed uř nnes maḥend ad yarzu x SIDI.

15 Imezruyen n Raḥabɛam, imezwura d ineggura, uřa d imenɣan jar Raḥabɛam d Yarubɛam di marra ussan, ma nitni war ttwazemmemen ca deg wawařen n unabi Cmaɛya d umwařaw Ɛiddu di ṭṭweɛ n listat n jjadira?

16 Raḥabɛam ittwassars deg wenḍeř jar řejdud nnes. Netta ittwanḍeř jar řejdud nnes di tendint n Dawud. Mmis Abiya idweř d ajeǧid deg wemcan nnes.