1 Raḥabɛam yusa-dd ɣar Urcalim uca issmun marra taddart n Yahuda d Binyamin, mya u-tmenyin-ařef n iryazen ittwafarzen, ttwadarrben x umenɣi, ḥima ad mmenɣen ak-d taddart n Israil, ḥima ad dd-arren tageldit ɣar Raḥubɛam. 2 Xenni yusa-dd wawař n AREBBI ɣar Cmaɛya, aryaz n AREBBI, inna: 3 “Siweř ak-d Raḥabɛam, mmis n Suliman, ajeǧid n Yahuda, u ak-d marra Israil di temmurt n Yahuda d Binyamin, uca ini: 4 ‘Ammu i iqqar SIDI: War ttgeɛɛadem ca u war ttmenɣim ca ak-d aytmatwem, ayt n Israil. Ittxeṣṣa ad iɛqeb kuř ijj n weryaz ɣar taddart nnes, maɣar d man aya i imsaren zi ɣari.’ ” Nitni sřan ɣar wawař n SIDI uca ɛeqben, war uyuren ca ɣar Yarubɛam.

5 Raḥabɛam izdeɣ di Urcalim uca igga tineddam di Yahuda ad dewřent faryent. 6 Ibna Bayt-Laḥam, Ɛiṭam, Taquɛa, 7 Bayt-Ṣur, Suku, Ɛadullam, 8 Jat, Marica, Zif, 9 Adurayim, Laxis, Ɛaziqa,

10 Ṣurɛa, Ayyalun d Ḥabrun nni iǧan d tneddam ifaryen di Yahuda d Binyamin.

11 Issejhed lqelɛat-a u igga xasen řḥukkam u ixzen daysent macca, zzect d binu

12 uca issars tiseddariyin n uɛeskari timeqqranin d iḥricen di kuř tendint. Ammu i ten issejhed ař ṭṭarf. Ammu i tuɣa Yahuda d Binyamin deg ufus nnes.

13 Ikehhanen d Ilawiyyen nni iǧan di marra Israil, qqnen ɣares zi marra jjwayeh nsen.

14 Minzi Ilawiyyen jjin ddmani nsen d wagřa nsen uca usin-dd ɣar Yahuda d Urcalim, maɣar Yarubɛam d iḥenjiren nnes mmenḍaren ten zi tukehhant n SIDI.

15 Netta yařeqqem ikehhanen i yixef nnes i řegɛudi, i ṣṣanam-n-imuyan u i iyenduzen nni tuɣa igga. ^□  

16 Awarni asen usin-dd ɛawed inni iwcin ixef nsen s wuř zi marra tiqebbař n Israil ɣar Urcalim, ḥima ad arzun SIDI, AREBBI n Israil, ḥima ad wehhben tiɣarṣa i SIDI, AREBBI n ibabaten nsen.

17 Ammu ssjehden tageldit n Yahuda u ssmetnen Raḥabɛam, mmis n Suliman, třata n iseggʷusa, maɣar nitni uyuren třata n iseggʷusa deg webrid n Dawud d Suliman.

18 Sennej Maḥlat, yeǧis n Yarimut, mmis n Dawud, yiwi Raḥabɛam uřa d Abiḥayil, yeǧis n Iliyab, mmis n Yassa, d tamɣart i yixef nnes.

19 Nettat turuw as-dd iḥenjiren-a: Yaɛuc, Camarya d Zaham. 20 Awarni as yiwi Maɛka, yeǧis n Abcalum d tamɣart. Nettat turuw as-dd Abiya, Ɛattay, Ziza d Calumit. 21 Raḥabɛam tuɣa ittexs Maɛka, yeǧis n Abcalum, aṭṭas x temɣarin nnes nneɣnit d x tiyya nnes, maɣar netta yiwi tmenṭac n temɣarin d settin n tiyya. Netta yejj-dd tmenya u-ɛicrin n iḥenjiren d settin n yessis. 22 Raḥabɛam igga Abiya, mmis n Maɛka, d azeǧif, ḥima ad yiři d řḥakem jar aytmas, ḥima ad t yarr d ajeǧid. 23 Netta igga s řeɛqeř uca ibḍa marra iḥenjiren nnes x marra timmura n Yahuda d Binyamin u di marra tineddam ifaryen u iwca asen macca s waṭṭas u yarzu asen aṭṭas n temɣarin i nitni.