1 Umi ikemmeř Suliman taẓaǧit nnes, tehwa-dd tmessi zeg ujenna tecca taɣarṣt n wecmaḍ uřa d tɣarṣa inneɣni uca iccur uɛuǧi n SIDI Taddart. 2 Ikehhanen war zemmaren ad adfen ɣar Taddart n SIDI, minzi aɛuǧi n SIDI tuɣa iccur Taddart n SIDI. 3 Umi ẓrin marra ayt n Israil belli tehwa-dd tmessi nni uřa d aɛuǧi n SIDI tiwa n Taddart, uḍaren nitni s uɣembub nsen ɣar temmurt x tisi n zzellij, sejden u qadan SIDI, maɣar Netta iṣbeḥ u tamexsiwt nnes icewwaren tᵉttɣima i řebda.

4 Ajeǧid, u marra Israil akides, wehhben tiɣarṣa zzat i wudem n SIDI. 5 Ajeǧid Suliman iwehheb tnayen u-ɛicrin-ařef n ifunasen d tfunasin d mya u-ɛicrin ařef n wuǧi d taɣarṣt n řehna. Ammu i ideccen ujeǧid d marra ayt n Israil Taddart n AREBBI. 6 Ikehhanen tuɣa bedden ɣar tsexxart nsen uca Ilawiyyen bedden ak-d dduzan n ǧɣa n SIDI, inni igga ujeǧid Dawud ḥima ad qadan SIDI — ‘Maɣar tamexsiwt nnes icewwaren tᵉttɣima i řebda!’ — s izřan n uṣebbeḥ n Dawud deg ufus nsen, u arendad nsen ṣuḍen ikehhanen di řɣayṭa u marra Israil tuɣa ibedd. 7 Suliman issqeddes řwest n řemraḥ n zzat, wenni iǧan zzat i Taddart n SIDI, minzi yiwi din taɣarṣt n wecmaḍ d tadunt n tewhibin n řɣiǧet, maɣar aɛalṭar n nnḥas nni igga Suliman tuɣa war izemmar ad iksi taɣarṣt n wecmaḍ d tewhibt n řɣiǧet d tadunt.

8 Di řweqt nni iɛeyyed Suliman Řɛid n Sebɛa n Wussan d marra Israil akides, ijj n wegraw n řgens d ameqqran, zi mani i ɣa tiwḍed ɣar Ḥamat ɣares ař Taɣzart n Miṣra. 9 Deg wass wiss tmenya ggin ijj n umuni ifarzen minzi di sebɛa n wussan ggin nitni adeccen n uɛalṭar uřa d Řɛid n Sebɛa n Wussan.

10 Deg wass wiss třata u-ɛicrin n uyur wiss sebɛa yarxu netta i řgens ad raḥen ɣar iqiḍan nsen, s wuř ifarḥen u s řxaḍar s marra řxar i igga SIDI i umsexxar nnes Dawud d Suliman u i řgens nnes Israil.

11 Ammu i ikemmeř Suliman řebni n Taddart n SIDI d taddart n ujeǧid. Marra min tuɣa deg wuř n Suliman ḥima ad tt igg di Taddart n SIDI u di taddart nnes, aqa ifřeḥ ad igg aya.

12 SIDI iban-dd i Suliman di ǧiřet, inna as:

“Necc sřiɣ i tẓaǧit nnek u farzeɣ amcan-a i Yixef inu ḥima ad yiři d taddart i tewhibt n tɣarṣt.

13 Xmi i ɣa bellɛeɣ ajenna maḥend war iccit wenẓar ɛad, niɣ mařa umureɣ tamuɣri iřeḥḥfen maḥend ad tecc temmurt niɣ axmi dd-ssekkeɣ ṭṭaɛun jar řgens inu,

14 uca řgens inu, x min xef ittwařaɣa Isem inu, ad issehwa ixef nnes, ad iẓẓaǧ, u nitni ad arzun udem inu u ad tuben zi tebridin nsen tiɛeffanin, xenni Necc ad ɣarsen dd-sřeɣ zeg ujenna, ad asen ɣfareɣ u ad ssgenfiɣ tammurt nsen.

15 Xenni řexxu, tiṭṭawin inu ad iřint arzment d imezzuɣen inu ad ḥḍan x tẓaǧit zeg wemcan-a,

16 maɣar řexxu ixḍareɣ Taddart-a u ssqeddseɣ tt ḥima ad ssmetneɣ din Isem inu i řebda u tiṭṭawin inu d wuř inu ad din iřin marra ussan.

17 Mařa cek tuyured zzat i wudem inu am mammec tuɣa iggur babac Dawud u ad tegged am mammec marra i d ac umureɣ uca ad teḥḍid tiweṣṣa inu d lfarayiḍ inu,

18 xenni ad ssmetneɣ řɛarc n tgeldit nnek, am mammec řɛahd i ggiɣ ak-d babac Dawud, nniɣ: ‘War d ac ittxeṣṣa uřa d ijj n weryaz nni iḥekkmen di Israil!’

19 Maca mařa kenniw tḥeyydem zi tweṣṣa inu d řumurat inu nni wciɣ zzat i wudem nwem uca ad tuyurem ad tsexxarem i irebbiten nneɣni, ad asen taḍarem, 20 xenni ad qḍiɣ x Israil zi temmurt nni d asen wciɣ, uca Taddart-a, i ssqeddseɣ i Yisem inu, ad tt nḍareɣ zeg wudem inu u Israil ad idweř d umedya uřa d řqecɛet n ubehdeř itteqqsen jar marra řegnus. 21 U x Taddart-a tenni yuɛřan qaɛ, marra wi xas i ɣa ikken, ad itebhet, ad yini: ‘Mayemmi igga SIDI ammu di temmurt-a u di Taddart-a?’ 22 Ad inin: ‘Minzi nitni semḥen di SIDI, AREBBI n ibabaten nsen, wenni ten dd-issuffɣen zi temmurt n Miṣra, u minzi nitni cebbaren di irebbiten nneɣni u Israil yuyur ad asen yaḍar u ad ten isexxar, x uyenni isseɣḍeř marra řɣar-a xasen.’ ”