Řebniyat n Suliman inneɣni
8
1 Awarni i ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar, 2 aqa Suliman ibna ɛawed tineddam i d as iwca Ḥuram uca issezdeɣ din ayt n Israil. 3 Awarni as iffeɣ Suliman ɣar Ḥamat-Ṣuba uca iṭṭef i-tt. 4 Netta ibna Tadmur di řexřa. Ibna ɛawed marra tineddam n řexzen di Ḥamat. 5 Netta ibna uřa d Bayt-Ḥurun n nnej d Bayt-Ḥurun n wadday d tneddam ifaryen s řeḥyuḍ d tewwura d iɛumad n wefray, 6 uřa d Baɛla d marra tineddam n řexzen nni iǧan ɣar Suliman d marra tineddam n ikarruten d marra tineddam n imnayen u xenni marra min issitem Suliman ad tt ibna di Urcalim u di Lubnan u di marra tammurt n řeḥkam nnes. 7 Marra řgens i iqqimen n Iḥittiyyen, Imuriyyen, Ifiriziyyen, Iḥiwiyyen d Iyabusiyyen, inni war iǧin ca zeg ayt n Israil, 8 arrawen nsen nni iqqimen awarni asen di temmurt, inni war ttwaqḍan s ufus n ayt n Israil, igga xasen Suliman ljizya ař ass-a. 9 Maca zeg ayt n Israil war iggi Suliman d isemɣan i řexdayem nnes, minzi nitni tuɣa aten d iɛeskariyyen d imeqqranen x ineɣrafen nnes zi řɛeskar d imeqqranen n ikarruten nnes d imnayen nnes.
10 Ina d imeḥḍayen imeqqranen nni tuɣa ɣar ujeǧid n Suliman, mitayen u-xemsin n yeryazen nni tuɣa ittḍebbaren x řgens.
11 Suliman issgeɛɛed yeǧis n Firɛun zi tendint n Dawud ɣar taddart i tuɣa i d as ibna, minzi inna: “Tamɣart inu war tzeddiɣ ca di taddart n Dawud, ajeǧid n Israil, minzi imucan mani dd-tusa Ttabut n SIDI, aqa aten qeddsen.
Tiɣarṣa n Suliman d taynit nnes i tsexxart n Zzawect Tameqqrant
12 Xenni issgeɛɛed Suliman tiɣarṣa n wecmaḍ i SIDI x uɛalṭar n SIDI nni tuɣa ibna zzat i wesqif n wadaf n zzawect,
13 ɛlaḥsab lfariḍa i kuř ass i tewhibt n tɣarṣa, am mammec teqqar tewṣeyyet n Musa deg wussan n ssebt, deg wussan n uyur n jdid u třata n twařawin deg useggʷas di řeɛyudat ittwaggen: di Řɛid n Weɣrum břa Antun, di řɛid n Ssimanat u di Řɛid n Iɛuccuten.
14 Am mammec dd-tusa lfariḍa n babas Dawud issbedd ɛawed tarbiɛin n ikehhanen i řxedmet nsen, d terbiɛin n Ilawiyyen i tsexxart nsen, ḥima ad ssemɣaren di Zzawect Tameqqrant u ad sexxaren i ikehhanen ɛlaḥsab awař n lfariḍa i kuř ass, uca issbedd uřa d iɛessasen n tewwart di terbiɛin nsen ɣar kuř tawwart, minzi ammu i yeǧa řumur n Dawud, aryaz n AREBBI.
15 War iḥeyyed ḥed uřa deg ict n jjihet x řumur n ujeǧid i ikehhanen d Ilawiyyen u i ixxamen n txubay.
16 Ammu i tᵉttwaseqfeř marra řxedmet n Suliman zeg wass n usarsi n dsas n Taddart n SIDI ař ass n ukemmeř nnes, wah ammu i tᵉttwakemmeř Taddart n SIDI.
Ureɣ i dd-issmunen tɣarruba n Suliman
17 Xenni iruḥ Suliman ɣar Ɛiṣyun-Jabir u ɣar Aylat, ɣar tma n řebḥar, di temmurt n Idum.
18 S ufus n imsexxaren nnes issekk Ḥuram ɣares iɣarruba d imsexxaren nni issnen řebḥar u nitni nedhen ak-d imsexxaren n Suliman ɣar Ufir uca iwyen-dd ssenni arebɛa-mya n talintat n wureɣ u usin-dd zzayes ɣar ujeǧid Suliman.