1 Xenni inna Suliman:

“SIDI inna aqa Netta ad izdeɣ deg yijj n useynu ibbumbes. 2 S tidett necc bniɣ ict n Taddart, ict n Tzeddiɣt i Cek, ijj n wemcan imten ḥima ad din tzedɣed i řebda.” 3 Issneqřeb ujeǧid aɣembub nnes uca ibarek marra agraw n řgens n Israil umi marra agraw n řgens n Israil tuɣa ibedd. 4 Netta inna: “Ad ittwabarek SIDI, AREBBI n Israil, wenni issiwřen s uqemmum nnes ɣar baba Dawud d wenni t ikemmřen s ufus nnes umi inna: 5 ‘Zeg wass i di nedheɣ řgens inu Israil zi Miṣra, war ixḍareɣ uřa d ict n tendint zi marra tiqebbař n Israil ḥima ad dinni bniɣ Taddart ḥima ad din yiři Isem inu u war ixḍareɣ aryaz ḥima ad yiři d řḥakem x řgens inu Israil, 6 maca ixdareɣ Urcalim ḥima ad din yiři Isem inu, u Necc ixḍareɣ Dawud ḥima ad yiři x řgens inu Israil.’ 7 Tuɣa deg wuř n baba Dawud ad ibna Taddart i Yisem n SIDI, AREBBI n Israil. 8 Maca SIDI inna i baba Dawud: ‘Umi teggid deg wuř nnek ḥima ad tebnid Taddart i Yisem inu, aqa mliḥ umi teggid man aya deg wuř nnek. 9 Maca war iǧi d cek i ɣa ibnan Taddart nni, maca mmic i dd-iffɣen zi tejɛinna nnek d netta i ɣa ibnan Taddart i Yisem inu.’

10 SIDI issemten awař nnes nni issiweř, maɣar necc dewřeɣ beddeɣ deg wemcan n baba Dawud u qqimeɣ x řɛarc n Israil, am mammec tuɣa issiweř SIDI, u necc bniɣ Taddart i Yisem n SIDI, AREBBI n Israil.

11 Necc ssarseɣ dinni Ttabut wenni di iǧa Řɛahd n SIDI i igga Netta ak-d ayt n Israil.”

12 Netta ibedd zzat i uɛalṭar n SIDI arendad n marra agraw n řgens n Israil, uca netta iksi ifassen nnes ɣar ujenna.

13 Minzi Suliman tuɣa igga ict n tenhirt n nnḥas u igga i-tt di řwest n řemraḥ. Tuɣa dayes xemsa n iɣaǧen n tuzzeggart, xemsa n iɣaǧen n tiru d třata n iɣaǧen n tiddi. Netta ibedd xas, ibbendeq x ifadden nnes arendad i marra agraw n řgens n Israil uca iksi ifassen nnes ɣar ujenna, inna:

14 “A SIDI, AREBBI n Israil, deg ujenna sennej u x temmurt swadday war iǧi uřa d ijj n AREBBI am Cek, wenni iḥḍan Řɛahd d tmexsiwt icewwaren i imsexxaren nnek nni igguren zzat i wudem nnek s marra uř nsen,

15 wenni iḥḍan i umsexxar nnek, baba Dawud, x min xef akides tessiwřed, minzi s uqemmum nnek i tessiwřed u s ufus nnek i t tkemmřed, am teǧa ass-a.

16 Xenni řexxu, SIDI, AREBBI n Israil, ḥḍa di ṭṭweɛ n umsexxar nnek, baba Dawud, x min xef kides tessiwřed umi tennid: ‘War ittwaqess zzayek uřa d ijj n weryaz zi zzat i wudem inu wenni iqqimen x řɛarc n Israil, min ɣa kken arrawen nnek ḥeṭṭan ad uyuren abrid nsen ɛlaḥsab Ccariɛa am mammec tuyured cek zzat i wudem inu.’

17 Xenni řexxu, a AREBBI n Israil, egg ad dewřen d tidett awařen nni tessiwřed ak-d umsexxar nnek, ak-d Dawud.”

18 “Maɣar ma s tidett ad izdeɣ AREBBI x temmurt? Xzar ajenna, wah ajenna n ijenwan war izemmar ad Cek iksi, mecḥař s drus Taddart-a i ssbeddeɣ necc!

19 Meyyeř ɣar tẓaǧit n umsexxar nnek u ɣar uḥeccem nnes, a SIDI, AREBBI inu, ḥima ad tesřed ɣar uřaɣi u ɣar tẓaǧit nni iẓẓuǧ umsexxar nnek zzat i wudem nnek. 20 Ejj tiṭṭawin nnek ad ttwarzment ass d ǧiřet tiwa i Taddart-a, tiwa i wemcan-a min xef tessiwřed aqa Isem nnek ad ittwassemten din ḥima ad tesřed ɣar tẓaǧit i iẓẓuǧ umsexxar nnek deg wemcan-a, 21 u seř i uḥeccem n umsexxar nnek u n řgens nnek Israil xmi ttẓaǧan deg wemcan-a u seř Cek xenni zi Tzeddiɣt nnek, zeg ujenna, wah seř u ɣfar.”

22 “Mařa ixḍa ijj ak-d umqarreb nnes u tᵉttwagg xas ict n tjaǧit ḥima ad tt ijjuǧ u wanita yusa-dd uca ijjuǧ zzat i uɛalṭar nnek di Taddart-a, 23 seř-dd Cek xenni deg ujenna u kkar u ḥkem x imsexxaren nnek, ḥima ad ittwaɛaqeb uɛeffan, ejj abrid nnes ad ihwa x uzeǧif nnes u egg s tsegda i umsegged u ewc i-t ɛlaḥsab tasegda nnes.

24 Mařa řgens nnek Israil ittwaɣřeb zzat i wudem n řeɛdu minzi nitni xḍan akidek u nitni ad ɣarek-dd dewřen uca ad neɛmen s Yisem nnek u ad ẓẓaǧen ad ḥeccmen zzat i wudem nnek di Taddart-a, 25 seř-dd Cek xenni zeg ujenna u ɣfar ddenb n řgens nnek Israil uca ndeh i-ten ad dd-dewřen ɣar temmurt nni i d asen tewcid u i ibabaten nsen.

26 Mařa ajenna ittwabelleɛ ařami war din ittiři wenẓar, minzi nitni xḍan akidek u nitni ad ẓẓaǧen am arrin azeǧif ɣar wemcan-a u ad neɛmen s Yisem nnek u ad dd-dewřen zi ddnub nsen umi ten teḥṣared Cek, 27 seř-dd Cek xenni deg ujenna u ɣfar asen ddenb n imsexxaren nnek d n řgens nnek Israil, minzi Cek tessřemded asen abrid aṣebḥan nni ittxeṣṣa ad kken, u ewc Cek xenni anẓar i temmurt nni tewcid d řwart i řgens nnek.”

28 “Mařa din řaẓ di temmurt, niɣ ṭṭaɛun, niɣ ittwasecmeḍ imendi zeg usemmiḍ, niɣ mařa din jjriḥect n tcejjart niɣ tamuɣri tenni iṣarrḍen, niɣ mařa iḥṣar i-t řeɛdu ɣar tewwura nnes, niɣ teřqef i-t mammec ma tegga ca n jjriḥect niɣ ca n řeḥřac, 29 xenni min ma i ɣa iẓẓuǧ ijj n bnadem zi marra řgens nnek Israil u min ma i ɣa ittar, am ssnen nitni, kuř ijj zzaysen, jjriḥect nsen d řeḥriq nsen, u netta iksi xenni ifassen nnes ɣar Taddart-a, 30 seř-dd Cek xenni zeg ujenna, amcan imten mani tzeddɣed, u ɣfar u ewc kuř ijj ɛlaḥsab tibridin nnes, am mammec Cek tessned uř nnes, maɣar Cek waha i issnen uř n bnadem, 31 ḥima ad Cek ggʷeden u ad uyuren di tebridin nnek marra ussan i ɣa kken ddaren x wudem n temmurt nni tewcid i ibabaten nneɣ.”

32 “Uřa mařa netta d abarrani nni war iǧan zi řgens nnek, maca ad dd-yas di ṭṭweɛ n Yisem nnek zeg ict n temmurt tiggʷej di ṭṭweɛ n Yisem nnek ameqqran d ufus nnek ijehden d uɣiř nnek isswiẓẓaḍen, xenni mařa dd-yusin, uca ad ẓẓaǧen am arrin azeǧif ɣar Taddart-a, 33 seř-dd Cek xenni zeg ujenna, zeg wemcan imten mani tzeddɣed, u egg ɛlaḥsab marra min xef ɣarek i ɣa iřaɣa ubarrani, ḥima marra řegnus n ddunect ad ssnen Isem nnek, ḥima nitni ad cek ggʷeden, am řgens nnek Israil, u ad ssnen aqa Isem nnek ittwabarreḥ tiwa i Taddart-a i bniɣ.”

34 “Mařa řgens iffeɣ ɣar umenɣi ak-d řɛedyan nnes deg webrid i x i ten tessekked, u nitni ad ẓẓaǧen i Cek am arrin azeǧif ɣar tendint-a i tixḍared Cek u ɣar Taddart i bniɣ i Yisem nnek, 35 seř-dd Cek xenni zeg ujenna i tẓaǧit nsen u i uḥeccem nsen uca aɣ asen tasɣart.”

36 “Mařa nitni xḍan akidek, — maɣar war iǧi uřa d ijj n bnadem i war ixeṭṭin — , u Cek tesɛared xasen, ad ten tsellmed zzat i wudem n řeɛdu uca nitni ad ten nedhen d imeḥbas ɣar temmurt n řeɛdu, tiggʷej niɣ tudes i teǧa, 37 u mařa xenni ad tuben deg wuř nsen di temmurt mani ttwaḥebbsen u ad tuben u ad xak-dd řaɣan di temmurt n tḥebbast nsen, ad inin: neccin nexḍa u negga min war iseggden, aqa negga tuɛeffna!, 38 u nitni ad ɣarek-dd dewřen s marra uř nsen u s marra řeɛmar nsen di temmurt n řɛedyan nsen mani ttwaḥebbsen uca ad ɣarek ẓẓaǧen am arrin azeǧif ɣar temmurt nni tewcid i ibabaten nsen, ɣar tendint-a i tixḍared Cek u ɣar Taddart-a i bniɣ i Yisem nnek, 39 seř-dd Cek xenni zeg ujenna, amcan imten mani tzeddɣed, i tẓaǧit nsen u i uḥeccem nsen uca aɣ asen tasɣart. Ɣfar xenni řgens nnek min zi xak xḍan.”

40 “Xenni řexxu, AREBBI inu, ejj tiṭṭawin nnek ad iřint arzment d imezzuɣen nnek ad iřin ḥḍan i tẓaǧit deg wemcan-a. 41 Xenni řexxu, a SIDI AREBBI, adef ɣar arraḥet nnek, Cek d Ttabut n jjehd nnek. Ejj ad iřin ikehhanen nnek, a SIDI AREBBI, arḍen s usenjem, uca iři ad farḥen imtiqqan nnek s řxar. 42 A SIDI AREBBI, war tarri aɣembub n umedhun nnek, idar di tmexsiwt icewwaren n umsexxar nnek Dawud.”