1 Ammu i tᵉttwakemmeř marra řxedmet i igga Suliman i Taddart n SIDI. Uca issidef Suliman marra řeqcuɛ iqeddsen n babas Dawud: nnuqart d wureɣ d řeqcuɛ, uca issars man aya marra deg ixxamen n txubay n Taddart n AREBBI. 2 Xenni issmun Suliman imeqqranen n Israil d marra izeǧifen n tqebbař, imeqqranen n ibabaten n ayt n Israil, di Urcalim ḥima ad ssgeɛɛden Ttabut n Řɛahd n SIDI zi tendint n Dawud, tenni d Ṣihyun. 3 Marra iryazen n Israil munen-dd ɣar ujeǧid ɣar řɛid. Tuɣa-tt deg uyur wiss sebɛa.

4 Marra imeqqranen n Israil usin-dd uca ssgeɛɛden Ilawiyyen Ttabut. 5 Ssgeɛɛden Ttabut n SIDI ak-d Uqiḍun n Umsagar uřa d marra řeqcuɛ iqeddsen i tuɣa din iǧan deg Uqiḍun. Ssgeɛɛden aya ikehhanen d Ilawiyyen. 6 Marra tamesmunt n Israil, tenni i tuɣa ɣares dd-imunen, tuɣa-tt ak-d ujeǧid Suliman zzat i Ttabut. Nitni wehhben uǧi d ifunasen d tfunasin nni břa řeḥsab di ssibbet n ubarru i di iǧan. 7 Iwyen ikehhanen Ttabut n Řɛahd n SIDI ɣar wemcan nnes, ɣar Wexxam n daxeř n Zzawect n Taddart, deg Weqdas n Uqeddas, ař sadu wafriwen n ikiruben, ^□   8 maɣar ikiruben bezzɛen tnayen n wafriwen nsen x wemcan n Ttabut uca ammu i dřin ikiruben Ttabut d iɛumad nnes i tarebbut zi sennej. 9 Ssenni ssřeḥmen iɛumad n tarebbut maḥend ad banent texfawin n iɛumad i dd-iffɣen zi Ttabut ɣar zzat n Wexxam n daxeř n Zzawect, maca war dd-ttbinint zi barra. Ttabut aqa-tt din ař ass-a.

10 Tuɣa war iǧi ca di Ttabut, mɣir tnayen n teřwiḥin i dayes issars Musa ɣar Hurib, řami igga SIDI ijj n řɛahd ak-d ayt n Israil umi dd-ffɣen zi Miṣra.

11 Uca imsar ařami dd-ffɣen ikehhanen zeg Uqeddas, — maɣar marra ikehhanen nni tuɣa zemmaren ad afen, tuɣa ssqeddsen ixef nsen břa ma ad wcen taynit i terbiɛin nsen — ,

12 uca uřa d Ilawiyyen d imedyazen, marra inni ten tuɣa ɣar Asaf, Hayman d Yadutun, iḥenjiren nsen d aytmatsen, yarḍen řeqṭen azdad, u bedden s taǧunin n wuzzař d lharpat d řgambriyat ɣar uɣezdis n ccarq n uɛalṭar u tuɣa akidsen ɛřaḥař mya u-ɛicrin n ikehhanen nni ittṣuḍen di řɣayṭat,

13 iwa, umi ṣuḍen am ijj n weryaz di řɣayṭa, ɣennjen u ggin ad ittwaseř řḥess d ijjen am ssemɣaran u ttqadan SIDI, ařami ssgeɛɛden s řɣaytat d taǧunin n wuzzař d dduzanat n llɣa nneɣni ǧwaru nsen ɣar ujenna am ssemɣaran SIDI aqa Netta iṣbeḥ u tamexsiwt nnes icewwaren i řebda i teǧa, iwa xenni imsar aqa Taddart, Taddart n SIDI, tᵉttwaccur s useynu.

14 War zemmaren ikehhanen ad qqimen bedden ḥima ad sexxaren di ssibbet n useynu, minzi aɛuǧi n SIDI tuɣa iccur Taddart n AREBBI.