4
1 Netta igga uřa d aɛalṭar n nnḥas. Tuzzeggart nnes tuɣa-tt ɛicrin n iɣaǧen u řuɛřa nnes ɛicrin n iɣaǧen. 2 Xenni igga netta tarimant ifesyen. Tuɣa řeɛbar nnes ɛecra n iɣaǧen zi ṭṭarf ař ṭṭarf nneɣni u tuɣa-tt d taquract. Tiddi nnes tuɣa-tt xemsa n iɣaǧen u ict n ufiřu n řeɛbar n třatin n iɣaǧen inneḍ as-dd. □ 3 Sadu nnes beddent řexyařat n ifunasen, aqa nnḍen as-dd. Nnuwarat i war dd-ffiɣent ɛad tuɣa i d as dd-innḍen qaɛ, ɛecra di kuř ijj n uɣiř, tuɣa qqnent ak-d wayawya am quwwarent i trimant di tnayen n iseddiyyen. Ifunasen ttwafesyen d ijjen ak-d trimant. 4 Tarimant tbedd x tenɛac n ifunasen. Třata zzaysen arrin udem nsen ɣar ccamal, třata zzaysen arrin udem nsen ɣar řɣarb, třata zzaysen arrin udem nsen ɣar ljanub u třata zzaysen arrin udem nsen ɣar ccarq. Tarimant tarsa xasen u marra zzɛenquqat nsen dewřent ɣar daxeř. 5 Tuɣa tarimant tegdar tiru n ufus u tma nnes am řxedmet izewwqen n tma n ijj n ufenjař, amecnaw tanewwact n ict n tlillect. Teksi twawit nnes teřt-ařaf n ibatuten. □ 6 Ɛawed igga netta ɛecra n tbanyutin uca zzaysen igga xemsa x yeffus u xemsa x uzeřmaḍ ḥima ad daysent ssirden. Min ittwaswejden i tɣarṣt n wecmaḍ ssirden tt daysent, maca tarimant tuɣa-tt n ikehhanen maḥend ad dayes ssirden ixef nsen. 7 Netta igga ɛecra n řeqnadeř n wureɣ ɛlaḥsab lfariḍa u netta issbedd i-ten di Zzawect Tameqqrant, xemsa x yeffus u xemsa x uzeřmaḍ. 8 Netta igga ɛecra n tzewḍiwin uca igga i-tent di Zzawect Tameqqrant, xemsa x yeffus u xemsa x uzeřmaḍ. Igga uřa d mya n ṭṭawyat i urucci n wureɣ. 9 Netta igga řemraḥ i ikehhanen d wazzay ameqqran ak-d tewwura i wazzay uca iřeḥḥef tiwwura nsen s nnḥas. 10 Tarimant igga i-tt x uɣezdis afusi ɣar zzat, ɣar uɣezdis n ccarq, jjihet n ljanub.
11 Ḥuram igga uřa d tiydurin d iɣenjajen d ṭṭawyat i urucci. Ammu i ikemmeř Ḥuram cɣeř n řxedmet i igga i ujeǧid Suliman i Taddart n AREBBI.
12 Igga tnayen n ipilaren d iquraren d ttijan i iǧan x uzeǧif n tnayen n ipilaren d tnayen n tracciwin ḥima ad zzaysent dřen tnayen n iquraren n ttijan i iǧan x uzeǧif n ipilaren,
13 uřa d arebɛa-mya n iremmamen i tnayen n tracciwin: tnayen n iseddiyyen i kuř tracca ḥima ad zzaysen dřen tnayen n iquraren n ttijan nni iǧan tiwa sennej x wudem n ipilaren.
14 Igga uřa d tikarrutin u x tkarrutin igga tibanyutin i usird.
15 Igga uřa d tarimant d icten, uřa d tenɛac n ifunasen sadu nnes.
16 Igga Ḥuram Abi uřa d teydurin d iɣenjajen d furcayat d marra řeqcuɛ nnes, i ujeǧid Suliman, i Taddart n SIDI, zi nnḥas icellelen.
17 Ajeǧid ikebb i-ten deg udewwar n L'Urdun di třaxt igdaren jar Sukkut d Ṣarada.
Suliman itthilla di marra min iǧan n wureɣ i Zzawect Tameqqrant
18 Suliman igga marra řeqcuɛ-a x ubarru ameqqran, ařami war beqqcen ca ɛad di řewzen n nnḥas.
19 Suliman igga marra řeqcuɛ i Taddart n AREBBI: aɛalṭar n wureɣ d tzewḍiwin min xef ittwammars weɣrum n wescan 20 d řeqnadeř ak-d řefnarat nsen zeg wureɣ izedgen, inni i ɣa ittwasarɣen ɛlaḥsab lfariḍa zzat i Wexxam n daxeř n Zzawect, 21 nnuwwar d řefnarat d tjeqqaḍin n teftič, marra zeg wureɣ. Tuɣa-t d wureɣ qaɛ. 22 Uřa d tijeqqaḍin d ṭṭawyat i urucci d tɣenjayin d tqedduḥin n jjawi tuɣa atent zeg wureɣ izedgen. Adaf n Taddart, tiwwura n daxeř zzat i Weqdas n Uqeddas d tewwura n Taddart n Zzawect Tameqqrant, tuɣa atent zeg wureɣ.