Řebni n Zzawect Tameqqrant
3
1 Suliman ibda řebni n Taddart n SIDI di Urcalim x wedrar n Muriya, mani dd-iban SIDI i babas Dawud u mani issewjed Dawud ijj n wemcan x unedrar n Uyabusi Urnan. 2 Netta ibda řebni deg uyur wiss tnayen, deg wass wiss tnayen deg useggʷas wiss arebɛa n tgelda nnes. 3 Wanita d dsas i issars Suliman i řebni n Taddart n AREBBI: tuzzeggart nnes deg iɣaǧen ɛlaḥsab řeqyas amezwaru, tuɣa-tt settin n iɣaǧen, d tiru nnes tuɣa-t ɛicrin n iɣaǧen. 4 Asqif n wadaf, nni tuɣa iǧan ɣar zzat n tuzzeggart n Taddart, tuɣa-t dayes ɛicrin n iɣaǧen umi t ɛebbaren ɣar zzat n tiru n Taddart, u řuɛřa nnes tuɣa-t dayes mya u-ɛicrin n iɣaǧen. Tuɣa idřa wesqif n wadaf ɣar daxeř s wureɣ iṣfan. 5 Taddart tameqqrant igga as taẓeqqa s ukeccuḍ n tcejjart n umerzi uca yarni xas wureɣ iṣfan u izewweq i-t s tcejjura n tini d ssnaseř izewwqen. □ 6 Ɛawed izewweq netta Taddart s yiẓra iɣřan. Ureɣ tuɣa d ureɣ zi Farawayim. 7 Ammu i idřa netta Taddart d tḥenya d tnebdatin d řeḥyuḍ nnes d tewwura nnes s wureɣ uca inqec ikiruben di řeḥyuḍ. □ 8 Netta igga uřa d axxam n Weqdas n Uqeddas. Tuzzeggart nnes dayes ɛicrin n iɣaǧen umi t ɛebbaren ɣar zzat n tiru n Taddart. Uřa d tiru nnes tuɣa-t ɛicrin n iɣaǧen. Netta idřa řeḥyuḍ ɣar daxeř n wexxam s setta-mya n talintat n wureɣ iṣfan. 9 Řewzen n imesmaren isekkwa xemsin n iciqlen n wureɣ. Idřa uřa d tiɣurfatin n sennej s wureɣ.
10 Deg wexxam n Weqdas n Uqeddas igga tnayen n ikiruben, am řxedmet n wenqac, u iřeḥḥef i-ten s wureɣ.
11 Afriwen n ikiruben jmiɛ ɛebbaren ɛicrin n iɣaǧen di tuzzeggart. Afriw amezwaru iɛebbar xemsa n iɣaǧen n tuzzeggart u ittakkʷaḍ řḥiḍ n Taddart. Afriw nneɣni n xemsa n iɣaǧen ittakkwaḍ afriw n ukirub nneɣni.
12 Afriw n ukirub nneɣni iɛebbar uřa d xemsa n iɣaǧen uca ittakkwaḍ řḥiḍ n Taddart. Afriw nneɣni n xemsa n iɣaǧen iřeqqef afriw n ukirub nneɣni.
13 Afriwen n ikiruben-a ttwabezzɛen ɛicrin n iɣaǧen u nitni bedden x iḍaren nsen d iɣembab nsen ssewcen ɣar daxeř.
14 Netta igga uřa d ařeḥḥaf s řeqṭen adeḥmi d arjuwani d azeggʷaɣ yuǧɣen u s řeqṭen azdad uca igga xas ikiruben.
Ḥuram igga marra řeqcuɛ n nnḥas i Zzawect Tameqqrant
15 Ɣar zzat n Taddart igga netta tnayen n ipilaren s ict n tuzuggart n xemsa u-třatin n iɣaǧen. Ttajj x tqiccat nnes tuɣa-t xemsa n iɣaǧen.
16 Netta igga uřa d ssnaseř izewwqen am tinni deg Wexxam n daxeř n Zzawect uca igga i-tent x tqiccatin n ipilaren. Igga uřa d mya n iremmamen uca icedd i-ten ɣar ssnaseř izewwqen.
17 Netta issbedd ipilaren ɣar zzat n Zzawect Tameqqrant, ijjen x yeffus u ijjen x uzeřmaḍ. Wenni ɣar yeffus igga as Yaxin u wenni x uzeřmaḍ igga as Buɛaz.