1 Xenni issekk ujeǧid ireqqasen uca marra imɣaren n Yahuda d Urcalim munen ɣares. ^■   2 Ajeǧid igeɛɛed ɣar Taddart n SIDI ak-d marra iryazen n Yahuda d marra imezdaɣ n Urcalim, uřa d ikehhanen d inabiyyen d marra řgens, zeg umeẓyan ař umeqqran, u netta iɣra xasen deg imezzuɣen nsen marra awařen n wedlis n Řɛahd nni tuɣa ufin di Taddart n SIDI. 3 Ajeǧid tuɣa ibedd ɣar ijj n upilar uca netta iqqen Řɛahd zzat i SIDI ḥima ad iḍfar SIDI, ad iḥḍa řumurat nnes d cchadat nnes d tweṣṣa nnes s marra uř nnes u s marra řeɛmar nnes maḥend ad issemten awařen n Řɛahd-a nni yurin deg wedlis-a. Uca yudef řgens marra di Řɛahd.

4 Ajeǧid yumur i Ḥilqiya, arrays n ikehhanen, u i ikehhanen n usettef wiss tnayen u i iɛessasen n tewwart, aqa nitni ad ssuffɣen marra řeqcuɛ nni tuɣa ittwaggen i Baɛal u i trebbit n cwarti uřa i marra řɛeskar n ujenna zi Zzawect Tameqqrant n SIDI ɣar barra, u issecmeḍ man aya marra barra i Urcalim deg iyyaren n Qidrun u ijja ad arbun iɣɣeḍ nnes ɣar Bayt-Il. 5 Netta ikkes ɛawed ikehhanen n l’aṣnam inni tuɣa řeqqmen ijeǧiden n Yahuda ḥima ad qeddmen tiwhibin n řebxur di řegɛudi, di tneddam n Yahuda u di jjwayeh i dd innḍen i Urcalim uřa d yenni qeddmen tiwhibin n řebxur i Baɛal d tfuct d tziri d temmura n ujenna u i marra řɛeskar n ujenna. ^□   6 Issuffeɣ uřa d tarebbit n cwarti zi Taddart n SIDI, igga i-tt barra i Urcalim ɣar teɣzart n Qidrun. Netta issecmeḍ i-tt ɣar teɣzart n Qidrun u iddez i-tt d taɛejjajt u yareyyec i-tt x imeḍřan n ayt n řgens. 7 Netta ihdem ixxamen n imetleyyin nni tuɣa ɣar Taddart n SIDI, mani ttxeyyaḍent temɣarin iqiḍan nni ggint am tizzayiwin i trebbit n cwarti. 8 Netta ijja ad ssuffɣen marra ikehhanen zi tneddam n Yahuda uca issexmej řegɛudi mani qeddmen ikehhanen tiwhibin n řebxur, zi Jabɛa ař Bi’r-Sebɛa. Netta ihdem řegɛudi ɣar tewwura n tendint, uřa d tinni iǧan ɣar wadaf n Tewwart n Yacuwa, azeǧif ameqqran n tendint, ɣar uzeřmaḍ n wenni i tuɣa ittadef Tawwart n Tendint. 9 Maca ikehhanen n řegɛudi war dd-iwyen tiɣarṣa x uɛalṭar n SIDI di Urcalim, maca nitni ccin aɣrum břa antun di řwest n aytmatsen.

10 Netta issexmej uřa d Tufat nni iǧan di teɣzurt n ayt n Hinnum, ḥima uřa d ijj war issɛeddu mmis niɣ yeǧis x tmessi i Mulak.

11 Netta ikkes iysan i tuɣa ggin ijeǧiden n Yahuda i řewqar n tfuct ɣar wadaf n Taddart n SIDI, ɣar texxamt n Natan-Malak, amsexxar icenɛen, wenni iǧan ɣar řebniyyat barra i Zzawect Tameqqrant. Netta iqedd i ikarruten n tfuct s tmessi.

12 Uřa d iɛalṭaren nni tuɣa ibedden x tzeqqa n tɣurfet n Aḥaz nni tuɣa ggin ijeǧiden n Yahuda uřa d iɛalṭaren i igga Manassa di tnayen n řemraḥat n Taddart n SIDI, ihdem i-ten ujeǧid u netta iřbez i-ten, issiggʷej i-ten ssenni uca inḍar taɛejjajt nsen di teɣzart n Qidrun.

13 Uca issexmej ujeǧid řegɛudi nni din iǧan zzat i Urcalim, ɣar yeffus n Wedrar n Uḍeyyeɛ, wenni ibnan Suliman, ajeǧid n Israil, i Actarut, nnɛi n l’aṣnam n ayt n Ṣidun, u i Kamuc, nnɛi n l’aṣnam n ayt n Mu’ab, u i Milkum, jjɛifect n l’aṣnam n ayt n Ɛammun.

14 Netta yarẓa imayḍuten iqeddsen di iwetwiten uca ihdem tirebbin n cwarti uca iccur amcan nsen s yexsan n yewdan. ^■  

15 Uřa d aɛalṭar nni iǧan di Bayt-Il d řgeɛɛdet wenni iggin Yarubɛam d wenni yarrin Israil ad ixḍa, aqa aɛalṭar nni d řgeɛɛdet nni, ihdem i-ten s tnayen idsen. Netta issecmeḍ řgeɛɛdet, iddez i-t ařami tedweř d taɛejjajt uca issecmeḍ tarebbit n cwarti. ^■  

16 Umi dd-inneqřeb Yuciya, iẓra imeḍřan i tuɣa dinni x wedrar uca issekk din ca n yeryazen uca iksi-dd ixsan zeg imeḍřan uca issecmeḍ i-ten x uɛalṭar. Netta issexmej i-t ɛlaḥsab awař n SIDI i zi ibarreḥ weryaz n AREBBI wenni ibarrḥen awařen-a. ^■  

17 Yarni inna: “Mana weẓru war ẓriɣ ɛemmars i din twařiɣ?” Nnan as yeryazen n tendint: “Wa d anḍeř n weryaz n AREBBI wenni tuɣa dd-yusin zi Yahuda u wenni ibarrḥen s tmesřayin-a nni teggid ak-d uɛalṭar n Bayt-Il.”

18 Netta inna: “Jjem t din! Uřa d ijjen war ittḥidi ixsan nnes!” Ammu i jjin nitni ixsan nnes jmiɛ ak-d yexsan n unabi wenni dd-yusin zi Samarya.

19 Ikkes Yuciya marra tudrin n řegɛudi nni iǧan di tneddam n Samarya i tuɣa ssbedden ijeǧiden n Israil maḥend ad sɛaren SIDI. Netta igga zzaysen am mammec igga di Bayt-Il. ^■   20 Marra ikehhanen n řegɛudi inni tuɣa iǧan din, iɣarṣ asen x iɛalṭaren uca issecmeḍ ixsan n iwdan. Awarni as iɛqeb ɣar Urcalim.

21 Ajeǧid yumur i marra řgens: “Swejdem Taɣarṣt n Useɛdu i SIDI, AREBBI nwem, am mammec ittwari deg wedlis-a n Řɛahd.” ^■   22 Ict n Tɣarṣt n Useɛdu am ta tuɣa war tᵉttwagg ɛemmarṣ zeg wussan n řquḍat nni tuɣa iḥekkmen Israil uřa di marra ussan n ijeǧiden n Israil d ijeǧiden n Yahuda. 23 Maca deg useggʷas wiss tmenṭac n ujeǧid Yuciya sswejden Taɣarṣt-a n Useɛdu i SIDI di Urcalim.

24 Yuciya ikkes uřa d yenni issawařen ak-d imettan d igezzanen d řexyařat imeẓyanen n l’aṣnam d imeyḍa n l’aṣnam d marra nnɛawat n ṣṣanam i tuɣa ttwařan di temmurt n Yahuda u di Urcalim, ḥima ad igg awařen n Ccariɛa i tuɣa ittwarin deg wedlis ittwannḍen i tuɣa yufa ukehhan Ḥilqiya di Taddart n SIDI. ^■   25 Qbeř nnes tuɣa war din uřa d ijj n ujeǧid am netta, idweř-dd ɣar SIDI s marra uř nnes u s marra řeɛmar nnes d s marra tizemmar nnes, ɛlaḥsab Ccariɛa n Musa, u awarni as tuɣa war iǧi uřa d ijjen am netta.

26 Maca SIDI war ijji zi řḥaduq n weɣḍab nnes d ameqqran i zi tuɣa yarɣa weɣḍab nnes x Yahuda zi ssibbet n marra asɛar i d as igga Manassa. 27 SIDI inna: “Ad ssiggʷjeɣ uřa d Yahuda x wudem inu, am mammec ssiggʷejeɣ Necc Israil u Necc ad nḍareɣ tandint-a Urcalim i farzeɣ uřa d Taddart i xef nniɣ: ‘Ad yiři Isem inu diha!’ ”^■  

28 Imezruyen iqqimen n Yuciya d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda?

29 Deg wussan nnes igeɛɛed Firɛun Nixu, ajeǧid n Miṣra, ḍidd i ujeǧid n Accur ɣar yeɣzar n Lfuraṭ. Ajeǧid Yuciya iffeɣ maḥend ad t iřqa, maca Firɛun Nixu inɣa i-t ɣar Majiddu řami t yeẓra. 30 Imsexxaren nnes iwyen t d amettin x ijj n ukarru zi Majiddu ɣar Urcalim, ssiwḍen t ɣar Urcalim uca neḍřen t deg wenḍeř nnes. Řgens n temmurt iksi Yahuyaḥaz, mmis n Yuciya, uca dehnen t, ggin t d ajeǧid deg wemcan n babas. ^■  

31 Yahuyaḥaz tuɣa ɣares třata u-ɛicrin n iseggʷusa, umi idweř d ajeǧid. Netta iḥkem třata n iyuren di Urcalim. Yemmas qqaren as Ḥamutal, yeǧis n Irmiya zi Libna. 32 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes. 33 Firɛun Nixu ijja ad t ibelleɛ di Ribla di temmurt n Ḥamat ḥima war iḥekkem ɛad di Urcalim. Netta igga i temmurt ijj n multa n mya n talintat n nnuqart d ict n talint n wureɣ. 34 Xenni igga Firɛun Alyaqim, mmis n Yuciya d ajeǧid deg wemcan n babas uca ibeddeř isem nnes ɣar Yahuyaqim. Maca Yahuyaḥaz yiwyi i-t uca yusa-dd ɣar Miṣra uca immut dinni. ^■  

35 Yahuyaqim iwca nnuqart d wureɣ i Firɛun, maca netta tuɣa iqeddar tammurt ḥima izemmar ad isellem nnuqart nni ɛlaḥsab řumur n Firɛun. Iqeddar kuř ijj n weryaz ɛlaḥsab řeqdar nnes, ammu i ittar nnuqart d wureɣ n řgens n temmurt ḥima ad t iwc i Firɛun Nixu. 36 Yahuyaqim tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Zabida, yeǧis n Fidaya zi Rumat. 37 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes.