1 Yuciya tuɣa ɣares tmenya n iseggʷusa umi idweř d ajeǧid. Netta iḥkem waḥit u-třatin n iseggʷusa di Urcalim. Yemmas qqaren as Yadidya, yeǧis n Ɛadaya zi Buṣqat. ^■   2 Netta igga min iǧan nican di tiṭṭawin n SIDI. Netta yuyur di kuř abrid n babas Dawud, war iḥeyyed x webrid ɣar yeffus uřa ɣar uzeřmaḍ.

3 Deg useggʷas wiss tmenṭac n ujeǧid Yuciya, imsar belli ajeǧid Yuciya issekk amarir Cafan, mmis n Aṣalya, mmis n Macullam ɣar Taddart n SIDI, inna: 4 “Gaɛɛed ɣar Ḥilqiya, arrays n ikehhanen, ḥima yegg ad sswejden tmenyat n nnuqart i dd yiwyen di Taddart n SIDI d tinni i dd-yarwen iɛessasen n tewwura zi řgens. 5 Ejj i-ten ad tent ggen deg ifassen n yinni itteggen řxedmet, i imeḥḍayen n Taddart n SIDI, ḥima nitni ad tent wcen i yenni itteggen řxedmet i din iǧan di Taddart n SIDI, ḥima ad areqqɛen řeḥyuḍ ihruran n Taddart, 6 i ineqqacen n ukeccuḍ d weẓru, i ibennayen, i imassuten u i tmesɣiwt n ukeccuḍ d tṣuḍar ittwasuydan, i weɛdař n Taddart.” 7 Maca war akidsen ggin řeḥsab zi jjihet n ttmenyat n nnuqart i d asen immewcen, maɣar nitni tteggen s utiqqi.

8 Xenni inna arrays n ikehhanen Ḥilqiya i umarir Cafan: “Necc ufiɣ adlis ittwannḍen n Ccariɛa di Taddart n SIDI.” Uca iwca Ḥilqiya i Cafan adlis ittwannḍen u wanita iɣra i-t. 9 Awarni as yuyur umarir Cafan ɣar ujeǧid uca issiweḍ řexbar i ujeǧid, inna: “Imsexxaren nnek ssmunen ttmenyat n nnuqart nni ittwafen di Taddart uca wcin tent deg ifassen n yinni iggin řxedmet, i imeḥḍayen x Taddart n SIDI.”

10 Ɛawed iḥaja umarir Cafan i ujeǧid, inna: “Akehhan Ḥilqiya iwca ayi ijj n wedlis.” Cafan iɣra i-t zzat i wudem n ujeǧid.

11 Umi isřa ujeǧid awařen n wedlis ittwannḍen n Ccariɛa, icarreg arruḍ nnes. ^□  

12 Ajeǧid yumur i ukehhan Ḥilqiya u i Axiqam, mmis n Cafan, u i Ɛakbur, mmis n Mixa, u i Cafan, amarir, u i Ɛasaya, amsexxar n ujeǧid, inna:

13 “Uyurem, arzum SIDI di ṭṭweɛ inu u di ṭṭweɛ n řgens u di ṭṭweɛ n marra Yahuda zi jjihet n wawařen-a n wedlis-a ittwannḍen i ittwafen, maɣar asɛar n SIDI i yarɣin ḍidd nneɣ d ameqqran, minzi řejdud nneɣ war sřin ca ɣar wawařen n wedlis-a ittwannḍen ḥima ad ggen am mammec marra min dayes yuran i neccin.”

14 Xenni yuyur ukehhan Ḥilqiya ak-d Axiqam, Ɛakbur, Cafan d Ɛasaya ɣar tnabit Xulda, tamɣart n Callum, mmis n Tiqwa, mmis n Ḥarḥas, wenni iḥeṭṭan x warruḍen. Nettat tezdeɣ di Urcalim, deg wezyen nneɣni. Nitni ssiwřen akides.

15 Nettat tenna asen: “Ammu i iqqar SIDI, AREBBI n Israil: ‘Ini i weryaz nni kenniw i ɣari dd-issekken:

16 Ammu i iqqar SIDI: Xzar, Necc ad awyeɣ tuɛeffna x wemcan-a u x imezdaɣ nnes, aqa marra awařen n wedlis-a ittwannḍen i iɣra ujeǧid n Yahuda,

17 maɣar nitni semḥen dayi, iwyen tiwhibin n řebxur i irebbiten nneɣni ařami dayi sɛaren s marra řxedmet n ifassen nsen. Asɛar inu ad ittwasarɣ ḍidd i wemcan-a u war ixessi ca ɛad.

18 Maca inim i ujeǧid n Yahuda, wenni kenniw dd-issekken da ḥima ad tᵉttarem i SIDI: Ammu i iqqar SIDI, AREBBI n Israil, x wawařen i tesřid cek:

19 Minzi uř nnek idweř yarḍeb u tesswaḍɛed ixef nnek zzat i wudem n SIDI umi tesřid x min ssiwřeɣ x wemcan-a u x imezdaɣ nnes, - aqa nitni ad dewřen d řxarbet d nneɛřet - , u umi tcarrged arruḍ nnek uca trud zzat i wudem inu, x uya ad ac sřiɣ, inna SIDI. 20 S uyenni, aqa Necc ad cek ssmuneɣ ak-d řejdud nnek uca ad ttwassarsed deg wenḍeř di řehna u tiṭṭawin nnek war ẓarrent tuɛeffna i d ɣa awyeɣ x wemcan-a.’ ” Nitni ssiwḍen tamwarrit ɣar ujeǧid.