1 Deg wussan nnes igeɛɛed Nabuxadnaṣṣar, ajeǧid n Babil, u Yahuyaqim idweř iṭaɛ as třata n iseggʷusa. Xenni inneqřeb uca iɣewweɣ xas. ^■   2 Issekk-dd ɣares SIDI bandiyyat n Ikaldaniyyen d bandiyyat n Aram d bandiyyat n Mu’ab d bandiyyat n ayt n Ɛammun. Netta issekk i-ten ɣar Yahuda ḥima ad tt xarrben ɛlaḥsab awař n SIDI i tuɣa issiweř s uqemmum n imsexxaren nnes, inabiyyen. ^□  ■   3 Wah, man aya immsar ak-d Yahuda ɛlaḥsab řumur n SIDI ḥima ad t issiggʷej x wudem nnes di ssibbet n ddnub n Manassa, di ssibbet n marra min igga wanita. ^□   4 Uřa di ssibbet n idammen imezdagen i issizzeř řami tuɣa zzaysen iccur Urcalim. S uya SIDI tuɣa war ixs ad as iɣfar. 5 Imezruyen iqqimen n Yahuyaqim d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 6 Yahuyaqim ittwassars deg wenḍeř jar řejdud nnes. Mmis Yahuyakin idweř d ajeǧid deg wemcan nnes. 7 Ajeǧid n Miṣra war iffiɣ ɛad ɣar umenɣi zi temmurt nnes, maɣar ajeǧid n Babil tuɣa iksi marra min tuɣa iǧan n ujeǧid n Miṣra zi Teɣzart n Miṣra ɣares ař iɣzar n Lfuraṭ.

8 Yahuyakin tuɣa ɣares tmenṭac n iseggʷusa umi idweř d ajeǧid. Netta iḥkem třata n iyuren di Urcalim. Yemmas qqaren as Neḥucṭa, yeǧis n Ilnatan zi Urcalim. 9 Netta igga min iǧan d aɛeffan di tiṭṭawin n SIDI, nican am mammec t igga babas.

10 Di řweqt nni ffɣen imsexxaren n Nabuxadnaṣṣar, ajeǧid n Babil, ɣar Urcalim uca tᵉttwaḥsar tendint. ^■  

11 Uřa Nabuxadnaṣṣar, ajeǧid n Babil, netta simant nnes yusa-dd ɣar tendint am tt ḥṣaren imsexxaren nnes.

12 Xenni iffeɣ Yahuyakin, ajeǧid n Yahuda, zi tendint, yuyur ɣar ujeǧid n Babil, netta ak-d yemmas d imsexxaren nnes d imeqqranen nnes d imsexxaren nnes icenɛen. Ajeǧid n Babil iḥebbes i-t deg useggʷas wiss tmenya n tgelda nnes.

13 Netta iḥewwes ssenni marra tixubay zi Taddart n SIDI d txubay zi taddart n ujeǧid uca ikkes ureɣ x marra řeqcuɛ n wureɣ nni tuɣa igga Suliman, ajeǧid n Israil, di Zzawect Tameqqrant n SIDI, am mammec tuɣa issiweř SIDI. ^■  

14 Netta yiwi-dd marra Urcalim ak-d marra imeqqranen d marra ayt n bu-teɣruḍt imeḥḍen, ɛecra-ařaf n imeḥbas, uřa d kuř aneqqac n ukeccuḍ d weẓru d imziřen. War ijji uřa d ijj mɣir imezřaḍ n řgens n temmurt.

15 Indeh Yahuyakin ɣar Babil. Uřa d yemmas n ujeǧid d temɣarin n ujeǧid d imsexxaren nnes icenɛen d marra ayt n jjehd di temmurt yiwyi ten ɣar lmenfa zi Urcalim ɣar Babil. ^■  

16 Marra iryazen imeḥḍen, sebɛa ařef n yeryazen, uřa d ineqqacen n ukeccuḍ d weẓru d imziřen, ařef n yeryazen, d marra abarru n ayt n bu-teɣruḍt inni izemmaren i umenɣi, aqa ajeǧid n Babil indeh i-ten marra ɣar lmenfa ɣar Babil. ^■  

17 Ajeǧid n Babil igga Mattanya, ɛemmis, d ajeǧid deg wemcan nnes uca ibeddeř isem nnes ɣar Ṣidqiya.^■  

18 Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Ḥamuṭal, yeǧis n Irmiya, zi Libna.

19 Netta igga min iǧan d aɛeffan di tiṭṭawin n SIDI, nican am mammec t igga Yahuyaqim. 20 Zi ssibbet n weɣḍab n SIDI, aqa imsar i Urcalim d Yahuda ařami ten i-dd issekk zi zzat i wudem nnes. Awarni as iɣewweɣ Ṣidqiya x ujeǧid n Babil.