1 Umi isřa ujeǧid Ḥizqiya aya, icarreg arruḍ nnes, idřa ixef nnes s ict n txancet n wecḍan uca yudef ɣar Taddart n SIDI. ^□   2 Xenni issekk netta Alyaqim, řemqeddem n tzeddiɣt n ujeǧid, d Cabna, amarir, d imɣaren n ikehhanen deg warruḍ n txuncay n wecḍan ɣar unabi Icaya, mmis n Amuṣ. ^■   3 Nitni nnan as: “Ammu i iqqar Ḥizqiya: ‘Ass-a d ijj n wass n řeḥṣaret u n weɛqab u n ubehdeř, maɣar iḥenjiren iwḍen-dd ař arzam n uɛeddis n yemmatsen, maca war din jjehd i twarut. 4 Ad taɣ SIDI, AREBBI nnek, isřa marra awařen n ukumandar n řɛeskar wenni ittwassekken zi sidis nnes, ajeǧid n Accur, ḥima ad istehza zi AREBBI iddaren, u ad taɣ SIDI, AREBBI nnek, ad iɛaqeb awařen i isřa. Sgeɛɛed xenni ict n tẓaǧit di ṭṭweɛ n řbaqi nni i ɣa ittwafen ɛad.’ ”

5 Ammu iwḍen imsexxaren n ujeǧid Ḥizqiya ɣar Icaɛya. 6 Inna asen Icaɛya: “Ammu i ittxeṣṣa ad tinim i siditwem: ‘Ammu i iqqar SIDI: War teggʷed ca zeg wawařen i tesřid cek, i zi i d ayi ceqqfen imsexxaren n ujeǧid n Accur. 7 Xzar, Necc ad dayes ggeɣ ijj n buḥbeř u netta ad iseř i ijj n řexbar u ad iɛqeb ɣar temmurt nnes u Necc ad t nɣeɣ din di temmurt nnes s ssif.’ ”

8 Xenni iɛqeb-dd ukumandar n řɛeskar uca yufa ajeǧid n Accur ittmenɣa ak-d tendint n Libna, maɣar isřa aqa iqřeɛ iqiḍan nnes iffeɣ zi Laxic. 9 Umi isřa aqa nnan x Tirhaqa, ajeǧid n Kuc: “Xzar, iffeɣ-dd ḥima akidek imneɣ!”, issekk ɛawed ireqqasen ɣar Ḥizqiya, inna:

10 “Ammu i ɣa tessiwřem ak-d Ḥizqiya, ajeǧid n Yahuda, ad tinim: ‘War ttejji ad cek iɣwa AREBBI nnek wenni x tᵉttecřed am iqqar: Urcalim war tᵉttweṭṭi i ujeǧid n Accur deg ifassen!

11 Xzar, tesřid min ggin ijeǧiden n Accur ak-d marra timmura nneɣnit, tinni tuɣa ad ttwareddǧent. Ma ittɣiř ac ad tᵉttwasnejmed?

12 Ma ssnejmen ten irebbiten n řegnus inni yareddǧen řejdud inu, am Juzan d Ḥaran d Rṣif d ayt n Ɛadan inni tuɣa izeddɣen di Talassar?

13 Mani iǧa ujeǧid n Ḥamat d ujeǧid n Arfad d ujeǧid n tendint n Safarwayim uřa d ajeǧid n Hanaɛ d Ɛiwwa?’ ”

14 Ḥizqiya iksi tibratin zeg ufus n imsexxaren uca iɣra i-tent. Xenni igeɛɛed ɣar Taddart n SIDI uca ibezzeɛ i-tent Ḥizqiya zzat i wudem n SIDI

15 u Ḥizqiya iẓẓuǧ zzat i wudem n SIDI, inna: “A SIDI, AREBBI n Israil, wenni ittɣiman sennej i ikiruben! Cek, wah Cek weḥḥdek d AREBBI n marra tigeldiwin n ddunect. Cek teggid ijenwan d temmurt. ^□  

16 A SIDI, ewc amezzuɣ nnek, seř! Arzem, a SIDI, tiṭṭawin nnek, xẓar! Seř i wawařen n Sanḥarib nni dd-issekk ḥima ad istehza zi AREBBI iddaren.

17 D tidett, a SIDI, ijeǧiden n Accur qḍan řegnus nni, xarrben temmurt nsen

18 u nḍaren irebbiten nsen di tmessi, maɣar tuɣa war ǧin d irebbiten, maca d timegga n ufus n yewdan waha, zeg ukeccuḍ d weẓru uca nitni mḥan ten.

19 Řexxu maca, a SIDI, AREBBI nneɣ, senjem aneɣ zeg ufus nnes, maḥend marra tigeldiwin n ddunect ad ssnen, a SIDI, aqa cek weḥḥdek d AREBBI.”

20 Xenni issekk Icaɛya, mmis n Amuṣ, ijj n ureqqas ɣar Ḥizqiya, inna: “Ammu i iqqar SIDI, AREBBI n Israil: ‘Necc sřiɣ s minzi ɣari d teẓẓuǧed x Sanḥarib, ajeǧid n Accur. 21 Wa d awař i xas issiweř SIDI: Taɛzarct, tayeǧit Ṣihyun, tesseḥqar i cek, testehza zzayek, tayeǧit Urcalim thezza azeǧif awarni ac! 22 Wi i zi testehzid u wi i di tceqqfed u wi xef tessgeɛɛded tmijja nnek, u mixef tessgeɛɛded s nnfaxet tiṭṭawin nnek? Cek tᵉttɣennaned x Umqeddas n Israil! 23 S uqemmum n imsexxaren nnek testehzid Sidi inu, tennid: S ubarru n ikarruten inu geɛɛdeɣ idurar yuɛřan, iɣezdisen n Lubnan. Necc ad zedmeɣ ticejjura nnes n tengelt yuɛřan uřa d řemxeyyer n ssibri nnes u necc ad dd-adfeɣ ɣar wemcan nnes n wareyyeḥ i iggʷejen aṭṭas, ɣar wezɣar n umarjuɛ nnes n uḍiř iṣebḥen. ^□   24 Necc ɣziɣ anuten d swiɣ aman. S tařeqqa n iḍaren inu ssiẓɣeɣ marra iɣezran n Miṣra. 25 Ma war tesřid aqa aṭṭas zeg wami ggiɣ man aya uca wciɣ as udem deg wussan n mecḥař uya? Řexxu jjiɣ t ad dd-iffeɣ, aqa cek d wenni i ɣa yarren tineddam ifaryen d řxirbat. 26 Imezdaɣ nsen tuɣa aten arxun, arẓin u sseḍḥan. Nitni tuɣa aten am ufsu deg iyyar, am uɣemmuy aziza, am uřum x tzeɣwin, u am imendi icemḍen s usemmiḍ qbeř ma ad iffeɣ. 27 Maca necc ssneɣ aɣimi nnek d uffuɣ nnek d weɛqab nnek d uɣewweɣ nnek xafi. 28 Minzi cek tɣewwɣed xafi u tuffet nnek tiweḍ ɣar imezzuɣen inu, ad ac ssekkeɣ tasennart deg wenzaren nnek u ad ggeɣ sřimet jar iyencicen nnek, u Necc ad cek arreɣ x webrid i di dd-tusid da.

29 D ta ad ac tiři d řeɛřamet: Deg useggʷas-a ad teccem min ɣa iɣemmyen s yixef nnes u deg useggʷas wiss tnayen min zzayes ɣa iɣemmyen ɛawed, maca deg useggʷas wiss třata ad tzarɛem u ad temjarem, ad teggen imarjaɛen, ad daysen teẓẓum tzayarin uca ad teccem řɣiǧet nnes. 30 Maɣar min innejmen, min iqqimen zi taddart n Yahuda, ad iwwet ɛawed iẓewran ɣar swadday u sennej ad yawi řɣiǧet. 31 Maɣar zi Urcalim ad dd-iffeɣ min iqqimen u zeg wedrar n Ṣihyun ad iffeɣ min innejmen, cḍaret n SIDI n řɛeskarat ijehden ad igg aya. 32 S uyenni, ammu i iqqar SIDI x ujeǧid n Accur: Netta war dd-ittidef ca di tendint-a u war dayes iccit ca uřa d ict n fřitca u war ɣares-dd iqarreb ca s ict n tseddart n uɛeskari u war xas ttbeqqiḍen ijj n lbaraj i řeḥṣaret. 33 X webrid i x dd ɣa yas, ad dd-iɛqeb. War ittidif ca ɣar tendint-a, inna SIDI. 34 Necc ad sseřqiɣ x tendint-a ḥima ad tt ssnejmeɣ di ṭṭweɛ inu u di ṭṭweɛ n umsexxar inu Dawud.’ ” ^■  

35 Di ǧiřet nni, imsar, aqa iffeɣ Lmalak n SIDI u inɣa mya u-xemsa u-tmenyin-ařef n yeryazen di řmargeḥ n řɛeskar n Accur. Umi i dd kkaren nitni tiwecca nnes, xzar, aqa aten marra idsen d řxecbat. ^■   36 Uca Sanḥarib, ajeǧid n Accur, yarẓa iqiḍan nnes, iruḥ uca iɛqeb ɣar temmurt nnes. Netta iqqim izeddeɣ di Ninwa. 37 Umi yuḍar ijj n wass di taddart n arebbi nnes Nisrux, imsar, aqa iḥenjiren nnes Adrammilik d Caraṣar nɣin t s ssif. Nitni arewřen ɣar temmurt n Ararat. Mmis Asarḥaddun idweř d ajeǧid deg wemcan nnes. ^■