1 Deg useggʷas wiss třata n Huciɛa, mmis n Ila, ajeǧid n Israil, imsar belli Ḥizqiya idweř d ajeǧid. Netta tuɣa d mmis n Aḥaz, ajeǧid n Yahuda. ^■   2 Netta tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem tesɛa u-ɛicrin n iseggʷusa di Urcalim. Yemmas qqaren as Abi, yeǧis n Zakariyya. 3 Netta igga min iǧan nican di tiṭṭawin n SIDI, nican am mammec t igga babas Dawud. 4 Netta ikkes řegɛudi, yarẓa imayḍuten iqeddsen, ihdem tarebbit n cwarti uca iřbez afiɣar n nnḥas i tuɣa igga Musa minzi ayt n Israil tuɣa i d as dd-yiwyen tiwhibin n řebxur ɣares ař ussan nni. Netta iřaɣa as Naḥuctan. ^■   5 Netta ittceř x SIDI, AREBBI n Israil. Jar marra ijeǧiden n Yahuda inni dd-yusin awarni as niɣ ddaren qbeř nnes, war tuɣi iǧi uřa d ijj am netta. 6 Netta tuɣa iḍfar abrid n SIDI, war xas iḥeyyed ca zi ḍeffar nnes. Netta tuɣa iḥeṭṭa řumurat nnes nni tuɣa yumur SIDI i Musa. 7 SIDI tuɣa akides. Mani ma tuɣa ittraḥ, tuɣa ifřeḥ. Netta iɣewweɣ x ujeǧid n Accur u war xas isexxar ɛad. 8 Netta iɣřeb x Ifilisṭiniyyen ɣares ař Ɣazza ak-d jjwayeh nnes, zi lburj n iɛessasen ɣares ař tandint ifaryen s iɣebrawen. ^■  

9 Deg useggʷas wiss arebɛa n ujeǧid Ḥizqiya, d aseggʷas wiss sebɛa n Huciɛa, mmis n Ila, ajeǧid n Israil, imsar belli Calmanassar, ajeǧid n Accur, igeɛɛed ḍidd i Samarya uca iṭṭef i-tt. ^■  

10 Nitni ṭṭfen tt awarni i třata n iseggʷusa. Deg useggʷas wiss setta n Ḥizqiya, aqa-t d aseggʷas wiss tesɛa n Ḥuciɛa, ajeǧid n Israil, ṭṭfen nitni Samarya. ^■  

11 Ajeǧid n Accur indeh ayt n Israil di lmenfa ɣar Accur uca yiwyi ten ɣar Ḥalaḥ, ɣar Xabur, zzat n yeɣzar n Juzan d tneddam n Imadayen,

12 maɣar nitni tuɣa war sřin ɣar min d asen inna SIDI, AREBBI nsen, uca arẓin Řɛahd nnes. Marra min yumur Musa, amsexxar n SIDI, war d as sřin u war t ggin. ^□  

13 Deg useggʷas wiss arbeɛṭac n ujeǧid Ḥizqiya iffeɣ Sanḥarib, ajeǧid n Assur, ɣar marra tineddam ifaryen s iɣebrawen n Yahuda uca iḥewwes i-tent. ^■  

14 Ḥizqiya, ajeǧid n Yahuda, issekk ireqqasen ɣar ujeǧid n Accur, ɣar Laxic, inna: “Necc xḍiɣ! Beɛɛed xafi! Marra min xafi ɣa tegged, ad t xeǧṣeɣ.” Xenni igga ujeǧid n Accur ict n ljizya x Ḥizqiya, ajeǧid n Yahuda: teřt mya n talintat n nnuqart d třatin n talintat n wureɣ.

15 Ḥizqiya iwca marra nnuqart nni ittwafen di Taddart n SIDI u deg ixxamen n txubay n taddart n ujeǧid.

16 Di řweqt nni iqess Ḥizqiya, ajeǧid n Yahuda, marra wureɣ n tewwura n Zzawect Tameqqrant n SIDI u n řeḍruf ɣar uɣezdis n tewwart inni tuɣa iɣeǧef Ḥizqiya, ajeǧid n Yahuda, s wureɣ uca iwca i-t i ujeǧid n Accur.

17 Xenni issekk ajeǧid n Accur ljiniral ak-d uzeǧif n imsexxaren icenɛen d ukumandar n řɛeskar ak-d ijj n řɛeskar d ameqqran aṭṭas zi Laxic ɣar ujeǧid Ḥizqiya di Urcalim. Nitni geɛɛden, iwḍen ɣar Urcalim. Uca awarni řami geɛɛden uca iwḍen nitni, bedden ɣar tseǧya n uyeřman n sennej, wenni iǧan ɣar webrid yuɛřan ɣar Weḥwic n Uṣebban.

18 Nitni řaɣan ḥima ad dd-yas ujeǧid. Xenni uyuren ɣarsen Alyaqim, mmis n Ḥilqiya, wenni d řemqeddem n tzeddiɣt n ujeǧid, ak-d umarir Cibna d Yuwax, mmis n Asaf, amarir n umezruy.

19 Akumandar n řɛeskar inna asen: “Inim i Ḥizqiya: ‘Ammu i iqqar ujeǧid ameqqran, ajeǧid n Accur: Man atecři aya i x tᵉttecřed? 20 Aqa-t d řhard n iyencicen waha, umi tennid: Aqa ɣarneɣ timeẓra d jjehd i umenɣi! Man wen i x tᵉttecřed, aqa cek tɣewwɣed xafi? 21 Xzar, řexxu tᵉttecřed x Miṣra, x uɣanim nni innḍefsen wenni, umi ḥed xas i ɣa iɛemmed, ittejju deg ufus nnes uca issnuqqeb i-t. Ammu i yeǧa Firɛun, ajeǧid n Miṣra, i marra inni xas ittecřen. ^■   22 Mařa kenniw ad d ayi tinim: Neccin nettceř x SIDI, AREBBI nneɣ, xenni necc ad iniɣ, ma netta war iǧi d wenni i zi iḥeyyed Ḥizqiya řegɛudi d iɛalṭaren u xenni inna i Yahuda d Urcalim: Ad taḍarem zzat i uɛalṭar-a di Urcalim! ? 23 Xenni řexxu, egg maca ak-d sidi inu, ajeǧid n Accur, ijj n umḥarrem. Necc ad ac wceɣ ařfayen n iysan mařa cek zeg uɣezdis nnek ad asen dd-tawyed imnayen. 24 Mammec texsed ad tennqeřbed x wudem n lwali, wenni qaɛ d ameẓyan n imsexxaren n sidi inu, uca ad tᵉttecřed x Miṣra di ssibbet n ikarruten d imnayen? 25 Ɛawed, maɣar ma necc geɛɛdeɣ-dd ḍidd n wemcan-a ḥima ad t areddǧeɣ břa SIDI? SIDI ini ayi: Gaɛɛed ḍidd i temmurt-a, areddeǧ i-tt.’ ”

26 Uca nnan Alyaqim, mmis n Ḥilqiya d Cibna d Yuwax i ukumandar n řɛeskar: “Siweř ɛafek s iřes n Tramit ak-d imsexxaren nnek, minzi nefhem as mliḥ. War kidneɣ ssiwiř s Tyahudect deg imezzuɣen n řgens i iǧan x řḥiḍ.” 27 Maca akumandar n řɛeskar inna asen: “Ma issekk ayi-dd sidi inu ɣar sidi nnek u ɣarek waha ḥima ad ssiwřeɣ awařen-a, war iǧi i yeryazen nni iqqimen x řḥiḍ, maḥend ad iniɣ aqa aten jmiɛ akidwem ad ccen asuffeɣ nsen u ad swen ibeccicen nsen?” 28 Xenni ikkar ukumandar, iřaɣa s jjhed s Tyahudect uca issiweř, inna: “Sřem i wawař n ujeǧid ameqqran, ajeǧid n Accur! 29 Ammu i iqqar ujeǧid: ‘Ḥḍam war kenniw ittɣecci Ḥizqiya minzi netta war izemmar ad kenniw ifekk zeg ufus nnes. 30 War ttejjim Ḥizqiya ad kenniw yarr ad tᵉttecřem x SIDI, ad tinim: SIDI ad aneɣ issenjem nican u tandint-a war tᵉttmewci ca deg ifassen n ujeǧid n Accur.’ 31 War tesřim ca ɣar Ḥizqiya, maɣar ammu i iqqar ujeǧid n Accur: ‘Ggem ayi array uca ffɣem-dd zi tendint ɣari, xenni izemmar kuř ijjen zzaywem ad icc zi tzayart nnes u zeg wartu n tazart nnes u ad isu aman zeg wanu nnes, 32 ɣares ař d ɣa dd-aseɣ u ad kenniw awyeɣ ɣar ict n temmurt amecnaw tammurt nwem: ɣar ict n temmurt teccur s imendi d binu n jdid, ɣar ict n temmurt teccur s weɣrum d imarjaɛen n uḍiř, ict n temmurt n zzitun d zzect d tamment. Ammu i ɣa teqqimem teddarem, war tmettim ca. War ttesřim ɣar Ḥizqiya, maɣar netta ittɣarra kenniw xmi iqqar: SIDI ad aneɣ issenjem! 33 Ma zemmaren xenni irebbiten n řegnus, kuř ijj zzaysen, ad fekken tammurt nsen zeg ufus n ujeǧid n Accur? 34 Mani ǧan irebbiten n Ḥamat d Arfad? Mani ǧan irebbiten n Safarwayim d Haniɛ d Ɛiwa? Ma ssnejmen nitni Samarya zeg ufus inu? 35 Man wen zi marra irebbiten n temmura nneɣni i issnejmen tammurt nnes zeg ufus inu ařami i ɣa issenjem SIDI Urcalim zeg ufus inu?’ ”

36 Řgens maca isseɣd, war xas dd-yarri s uřa d ijj n wawař, maɣar řumur n ujeǧid inna: “Kenniw war xas dd-tarrim ca!” 37 Xenni yusa-dd Alyaqim, mmis n Ḥilqiya, řemqeddem n tzeddiɣt n ujeǧid, ak-d Cibna amarir, d Yuwax, mmis n Asaf, amarir n umezruy s warruḍ icarrgen ɣar Ḥizqiya. Nitni ḥajan as marra awařen n ukumandar n řɛeskar.