1 Deg useggʷwas wiss tenɛac n Aḥaz, ajeǧid n Yahuda, idweř Huciɛa, mmis n Ila, d ajeǧid x Israil di Samarya. Netta iḥkem tesɛa n iseggʷusa. 2 Netta igga min iǧan d aɛeffan di tiṭṭawin n SIDI, maca war iǧi anect n ijeǧiden n Israil, inni tuɣa qbeř nnes. 3 Calmanassar, ajeǧid n Accur, ihjem xas uca Huciɛa idweř d amsexxar nnes uca s uɣiř iwca as ljizya. 4 Ajeǧid n Accur yufa aqa Huciɛa igga ict n tmeɛmuč. Wanita tuɣa issekk ireqqasen nnes ɣar Su, ajeǧid n Miṣra, uca war dd-yiwi ɛad tirzifin ittxeṣṣan am qbeř i ujeǧid n Accur, zeg useggʷas ař aseggʷas. Ajeǧid n Accur iṭṭef i-t uca icedd i-t s iceddiyyen di řeḥbes. 5 Ajeǧid n Accur iwḍa x marra tammurt uca igeɛɛed ɣar Samarya u inneḍ as-dd třata n iseggʷusa. ^■   6 Deg useggʷas wiss tesɛa n Huciɛa, iḥewwes ajeǧid n Accur Samarya uca indeh ayt n Israil di lmenfa ɣar Accur u issezdeɣ i-ten di Ḥalaḥ u di Xabur ɣar iɣzar n Juzan u di tneddam n Imadayen. ^■  

7 Aya imsar minzi ayt n Israil xḍan x SIDI, AREBBI nsen, wenni ten dd-issgeɛɛden zi Miṣra, zi sadu i ufus n Firɛun, ajeǧid n Miṣra, umi ggʷeden nitni irebbiten nneɣni 8 u ggin ad ddaren ɛlaḥsab tiweṣṣa n řegnus nni iɛarren i-ten SIDI zi zzat i wudem nsen, u ɛlaḥsab tiweṣṣa n ijeǧiden n Israil inni ten iggin. ^■   9 Ayt n Israil tuɣa dřin timesřayin i war ittřiqin zzat i SIDI. Nitni ssbedden i ixef nsen řegɛudi di marra tineddam nsen, wah zi lburj n tɛessast ař tandint ifaryen s řeḥyuḍ.

10 Nitni ssbedden imayḍuten iqeddsen d trebbin n cwarti x kuř tawrirt yuɛřan u sadu kuř azɣar d aziza.

11 Nitni qeddmen tiwhibin n řebxur x marra řegɛudi, am mammec ggin řegnus nni tuɣa issuffeɣ SIDI zi zzat n wudem nsen. Nitni ggin timesřayin d tiɛeffanin ařami sɛaren SIDI.

12 Nitni sexxaren i imeyḍa n l’aṣnam i x tuɣa d asen inna SIDI: “War iɛeddeř ad teggem aya!” ^■  

13 SIDI iɛřem i Israil d Yahuda s uqemmum n marra inabiyyen, s kuř ijj n umwařaw, inna: “Tubem zi tebridin nwem tiɛeffanin u ḥḍam x lfarayiḍ inu d tweṣṣa inu ɛlaḥsab marra Ccariɛa i zi umureɣ řejdud nwem u wenni d awem dd-ssekkeɣ s ufus n imsexxaren inu, inabiyyen. ^■  

14 Nitni maca war sřin ca u tuɣa qesḥen aṭṭas amecnaw mammec tuɣa qesḥen aṭṭas řejdud nsen, inni war iggin ttiqet di SIDI, AREBBI nsen. ^■  

15 Nitni nḍaren tiweṣṣa nnes d Řɛahd nnes, wenni igga Netta ak-d řejdud nsen, uřa d cchadat nnes nni tuɣa xasen iched. Nitni ḍfaren min iǧan ixwan u ammu i dewřen uřa d nitni xwan. Nitni ḍfaren ɛawed řegnus nni d asen dd-innḍen i x tuɣa d asen inna SIDI aqa ad tteggen am mammec ggin nitni.

16 Nitni ggʷejen x marra tiweṣṣa n SIDI, AREBBI nsen, u ggin i yixef nsen řexyařat ifesyen: tnayen n iyenduzen. Nitni ggin ɛawed ict n trebbit n cwarti uca uḍaren i marra řɛeskar n ujenna u sexxaren i Baɛal. ^□  ■  

17 Nitni arrin iḥenjiren nsen d tḥenjirin nsen ad cuqqen di tmessi uca ssxedmen aɛezzem d tgezzant. Nitni zzenzen ixef nsen maḥend ad ggen min iǧan d aɛeffan di tiṭṭawin n SIDI, ḥima ad t sɛaren. ^■  

18 X uyenni isɛar SIDI aṭṭas x Israil, ařami inḍar i-ten x wudem nnes. War zzaysen iqqim walu mɣir taqbič n Yahuda. ^■  

19 Maca uřa d Yahuda war iḥḍa lfarayiḍ n SIDI, AREBBI nnes. Nitni uyuren di tweṣṣa n Israil nni ggin s yixef nsen. ^■  

20 SIDI inḍar marra zzariɛet n Israil. Netta issbehdeř i-ten uca iwca i-ten deg ufus n imkeccaḍen ařami inḍar i-ten x wudem nnes. 21 Maɣar Netta tuɣa iqřeɛ Israil zi taddart n Dawud uca ggin Yarubɛam, mmis n Nabaṭ d ajeǧid. Yarubɛam maca ibḍa Israil x SIDI uca yarra i-ten ad ggen ijj n ddenb d ameqqran. ^■   22 Ayt n Israil kkin di marra ddnub i igga Yarubɛam. Nitni war xasen ḥeyyden ca, 23 ařami inḍar SIDI Israil zi zzat i wudem nnes am mammec tuɣa issiweř s uqemmum n marra imsexxaren nnes, inabiyyen. Ssuffɣen Israil zeg wudem n temmurt nnes ɣar Accur, ař ass-a.

24 Ajeǧid n Accur yiwi-dd iwdan zi Babil d Kuta d Ɛawa d Ḥamat d Safarwayimu, uca issezdeɣ i-ten di tneddam n Samarya, deg wemcan n ayt n Israil. Nitni ṭṭfen Samarya d řwart i yixef nsen u ggin ad zedɣen di tneddam nnes. 25 Umi dinni zedɣen ɛad cwayt, imsar aqa nitni war ggʷiden ca SIDI. Xenni issekk SIDI iyraden jar asen inni inɣin ca zzaysen. 26 Nitni ssiwřen x man aya ak-d u ujeǧid n Accur, nnan: “Řegnus nni tessufɣed u tesszedɣed di tneddam n Samarya, war ssinen mammec teǧa tubbart n AREBBI n temmurt. X uya Netta issekk iyraden jar asen, u xzar, nitni nɣin ten, maɣar war ssinen ca tubbart n AREBBI n temmurt.

27 Ajeǧid n Accur yumur, inna: “Jjem ad din iraḥ ijjen zeg ikehhanen nni tnedhem ssenni. Nitni ad din raḥen u ad din zedɣen u netta ad asen isseřmed tubbart n AREBBI n temmurt.” 28 Yusa-dd ijjen zeg ikehhanen nni tuɣa nedhen zi Samarya uca netta izdeɣ di Bayt-Il. Isseřmed i-ten mammec i ɣa weqqaren SIDI. 29 Maca kuř řgens yarni ad igg irebbiten n yixef nnes uca ssbedden ten di tudrin x řegɛudi nni tuɣa bnan imezdaɣ n Samarya, kuř řgens di tneddam nsen mani tuɣa zeddɣen. 30 Iryazen n Babil ggin i yixef nsen Sukkut-Bnut, u iryazen zi Kuta ggin Narjal, u iryazen zi Ḥamat ggin Acima, 31 u Iɛawiyyen ggin iwrafen n Nibḥaz d Tartaq, uca Isafarwayimiyyen sscemḍen iḥenjiren nsen i Adrammilik d Ɛanammilix, irebbiten n Safarwayim. 32 Nitni ggʷeden ɛawed SIDI u zi marra řeṣfuf nsen ggin nitni ikehhanen i yixef nsen, inni d asen isexxaren di tudrin x řegɛudi. ^■   33 Nitni ggʷeden SIDI uca sexxaren uřa i irebbiten n ixef nsen am mammec tuɣa teǧa tubbart n řegnus i zi tuɣa ttwanedhen nitni. ^■  

34 Ɣares ař ass-a tteggen nitni ɛlaḥsab ṭṭbayeɛ nsen n zic. Nitni war tteggʷden ca SIDI u war tteggen ca ɛlaḥsab tiweṣṣa nsen d lfariḍa nsen, ixs ad yini Ccariɛa d řumur i igga SIDI x ayt n Yaɛqub wenni umi tuɣa iwca isem ‘Israyil’. ^■   35 SIDI igga ijj n Řɛahd akidsen uca Netta yumur i-ten, inna: “Kenniw war tzemmarem ad tweqqarem irebbiten nneɣni, war d asen ttaḍarem, war d asen ttsexxaram u war d asen ttawyem taɣarṣt. ^■   36 Maca ittxeṣṣa ad teggʷdem SIDI, wenni kenniw dd-issuffɣen zi Miṣra s jjhed ameqqran u s uɣiř isswiẓẓḍen, u ad taḍarem zzates u ad as tawyem taɣarṣt. 37 Ad teḥḍam tiweṣṣa d lfarayiḍ d Ccariɛa d řumur nni d awem yura maḥend ad tent teggem kuř ass. War iḥeǧeř ad teggʷdem irebbiten nneɣni. 38 War tᵉttᵉttum Řɛahd i ggiɣ akidwem u war tᵉttweqqarem i irebbiten nneɣni, 39 maɣar ad teggʷedem SIDI, AREBBI nwem. Netta ad kenniw issenjem zeg ufus n marra řɛedyan nwem.”

40 Maca nitni war xsen ad sřen, maca ggin ɛlaḥsab tubbart nsen n zic. 41 Řegnus ggʷeden SIDI u sexxaren uřa i řexyařat nsen ineqcen deg umur d ijjen. Uřa d iḥenjiren nsen d iḥenjiren n iḥenjiren nsen tteggen ɛad am mammec ggin řejdud nsen, ɣares ař ass-a.