1 Deg useggʷas wiss sbeɛṭac n Faqaḥ, mmis n Ramalya, idweř Aḥaz, mmis n Yutam, d ajeǧid n Yahuda. ^■   2 Aḥaz tuɣa ɣares ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec igga babas Dawud. 3 Netta yuyur deg ibriden n ijeǧiden n Israil. Netta ijja ɛad mmis ad yuyur di tmessi am mammec marra jjɛayef n řegnus inni tuɣa iɛarren SIDI zzat i wudem n ayt n Israil. ^■   4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza. 5 Xas uca iffeɣ Raṣin, ajeǧid n Aram, d Faqaḥ, mmis n Ramalya, ajeǧid n Israil, imneɣ ak-d Urcalim. Nitni nnḍen i Aḥaz, maca war zemmaren ad xas ɣeřben. ^■  

6 Di řweqt nni yarra-dd Raṣin, ajeǧid n Aram, Ilat i Aram. Issuffeɣ ayt n Yahuda zi Ilat uca usin-dd Iramiyyen ɣar Ilat, qqimen zeddɣen din ɣares ař ass-a. ^□   7 Aḥaz issekk ireqqasen i Tiɣlat-Falasir, ajeǧid n Accur, inna: “Necc d amsexxar nnek d mmic. Gaɛɛed d tfekked ayi zeg ufus n ujeǧid n Aram d ujeǧid n Israil, inni xafi innqeřben.” 8 Aḥaz yiwi nnuqart d wureɣ i ittwafen di Taddart n SIDI u deg ixxamen n txubay n taddart n ujeǧid uca issekk aya am ict n terzeft i ujeǧid n Accur. ^■   9 Ajeǧid n Accur isřa ɣares u ajeǧid n Accur igeɛɛed ɣar Dimacq uca iṭṭef i-tt. Netta indeh i-tt ɣar lmenfa ɣar Qir u inɣa Raṣin.

10 Ajeǧid Aḥaz iffeɣ ɣar Dimacq i umsagar ak-d Tiɣlat-Falasir, ajeǧid n Accur, uca iẓra ijj n uɛalṭar di Dimacq. Ajeǧid Aḥaz issekk ijj n umedya n uɛalṭar d tweṣṣaf nnes n řebni, qaɛ am mammec t ggin, ɣar ukehhan Uriya.

11 Xas uca ibna ukehhan Uriya aɛalṭar. Ɣar řweqt i di dd-iɛqeb ujeǧid Aḥaz zi Dimacq, aqa ibna t ukehhan Uriya am mammec marra min dd-issekk ujeǧid Aḥaz zi Dimacq.

12 Umi dd-yusa ujeǧid zi Dimacq, iẓra ujeǧid aɛalṭar uca iqarreb-dd ujeǧid ɣar uɛalṭar uca issbexxar xas tiɣarṣa.

13 Netta issbexxar taɣarṣt nnes d tewhibt nnes n řɣiǧet u iseyyeb xas tawhibt n useyyeb nnes. Issfarrɣeɣ uřa d idammen n tɣarṣa nnes n řehna x uɛalṭar.

14 Aɛalṭar n nnḥas nni ibedden zzat i wudem n SIDI, issmuṭṭiy t zeg uɣezdis n zzat n Taddart, zi jar uɛalṭar n jdid d Taddart n SIDI, ɣar uɣezdis n ccamal n uɛalṭar n jdid uca issars i-t dinni.

15 Řexdenni ajeǧid Aḥaz iweṣṣa akehhan Uriya, inna: “Sbexxar taɣarṣt n wecmaḍ n ṣṣbeḥ d tewhibt n řɣiǧet n tmeddit řa taɣarṣt n wecmaḍ n ujeǧid d tewhibt nnes n řɣiǧet d tɣarṣt n wecmaḍ di ṭṭweɛ n marra řgens n temmurt d tewhibin nsen n řɣiǧet d tewhibin nsen n useyyeb, u zeǧeɛ xas marra idammen n marra tiɣarṣa n wecmaḍ u n tɣarṣa nneɣni. Aɛalṭar n nnḥas ad yiři i nnec ḥima ad dayes arzuɣ ɛad.

16 Akehhan Uriya igga am mammec marra s minzi iweṣṣa ujeǧid Aḥaz.

17 Ajeǧid Aḥaz iqess teřwiḥin i yeǧan x tkarrutin uca ikkes zzaysent tabanyut. Ikkes uřa d tarimant n waman zeg ifunasen n nnḥas inni sadu nnes uca issars i-tt x ict n zzellij n weẓru. ^□  ■  

18 Pasu n ssebt i tuɣa ibnan ɣar Taddart uřa d adaf n ujeǧid ɣar uɣezdis n barra zi Taddart n SIDI ikkes i-ten di ssibbet n ujeǧid n Accur.

19 Imezruyen iqqimen n Aḥaz d min igga, ma man aya marra war ittwazemmem ca deg wedlis n imezruyen n ijeǧiden n Yahuda? 20 Aḥaz ittwassars deg wenḍeř jar řejdud nnes, di tendint n Dawud. Mmis Ḥizqiya idweř d ajeǧid deg wemcan nnes.