Řeḥřac n Hazaqiya d usgenfi nnes
20
1 Deg wussan nni iḥřec Ḥizqiya s ijj n řeḥřac ineqqen. Yusa-dd ɣares unabi Icaɛya, mmis n Amuṣ, inna as: “Ammu i iqqar SIDI: ‘Ewc řumurat i taddart nnek, maɣar ad temmted, war tᵉttɣimid teddared ɛad ktar.’ ” ■ 2 Xenni inneqřeb s uɣembub nnes ɣar řḥiḍ uca iẓuǧ i SIDI, inna: 3 “A, SIDI, ɛqeř aqa necc uyureɣ zzat i wudem nnek s řaman u s yijj n wuř ikemmřen u ggiɣ min iǧan nican di tiṭṭawin nnek.” Uca ibda Ḥizqiya ittru s jjhed. 4 Tuɣa ɛad war iffiɣ Icaɛya zi řwest n tendint, řami ɣares dd-yusa wawař n SIDI, inna: 5 “Ɛqeb uca ini i Ḥizqiya, amgewwed n řgens inu: ‘Ammu i iqqar SIDI, AREBBI n babac Dawud: Necc sřiɣ i tẓaǧit nnek u ẓriɣ i imeṭṭawen nnek. Xzar, ad cek ssgenfiɣ. Deg wass wiss třata ad tgeɛɛded ɛawed ɣar Taddart n SIDI. 6 Necc ad arniɣ xemmesṭac n iseggʷusa i wussan n tudart nnek u ad cek ssnejmeɣ zeg ufus n ujeǧid n Accur, uřa d tandint. Necc ad sseřqiɣ x tendint-a di ṭṭweɛ inu u di ṭṭweɛ n umsexxar inu Dawud.’ ” 7 Xas uca inna Icaɛya: “Ksi ijj n weɣrum n tazart!” Nitni iwyen t-i-dd, ssarsen x ubuɛrus uca idweř iggenfa. 8 Ḥizqiya maca inna i Icaɛya: “Man řeɛřamet aqa SIDI ad ayi issgenfa u necc ad geɛɛdeɣ ɣar Taddart n SIDI deg wass wiss třata?” 9 Inna Icaɛya: “Aya ad ac tiři d řeɛřamet n SIDI, aqa SIDI ad isseqfeř awař nni issiweř: ‘Ma ad tuyur tiři ɛecra n treffidin ɣar zzat niɣ ad dd-teɛqeb ɛecra n treffidin ɣar ḍeffar?’ ” 10 Ḥizqiya inna: “Ihwen i tiři maḥend ad tezzuggar ɛecra n treffidin, lla, ejj tiři ad teɛqeb ɛecra n treffidin ɣar ḍeffar.” □
11 Uca iřaɣa unabi Icaɛya ɣar SIDI u Wanita ijja tiři ad teɛqeb x treffidin i x tehwa x ddruj n Aḥaz: ɛecra n treffidin ɣar ḍeffar.
Ireqqasen zi Babil
12 Di řweqt nni issekk Baradux-Baladan, mmis n Baladan, ajeǧid n Babil, tibratin d ict n tarzeft ɣar Ḥizqiya, maɣar netta tuɣa isřa aqa Ḥizqiya ihřec.
13 Ḥizqiya isřa asen uca isscen asen marra taddart n txubay nnes: nnuqart d wureɣ d řeɛṭur d zzect d řehri n řesnaḥ nnes d marra min ittwafen deg ixxamen nnes n txubay. War iqqim walu di taddart nnes u di marra řeḥkamet nnes nni war tuɣi d asen t isscen.
14 Xenni yusa-dd unabi Icaɛya ɣar ujeǧid Ḥizqiya, inna as: “Min nnan iryazen nni u manis dd-usin ɣarek?” Ḥizqiya inna: “Nitni usin-dd zeg ict n temmurt tiggʷej, zi Babil.”
15 Netta inna: “Min ẓrin nitni di taddart nnek?” Ḥizqiya inna: “Nitni ẓrin marra min iǧan di taddart inu. War iqqim ca zi min iǧan deg ixxamen n txubay inu, war d asen t ssecneɣ.”
16 Xenni inna Icaɛya i Ḥizqiya: “Seř i wawař n SIDI!
17 ‘Ad dd-asen wussan meřmi marra min iǧan di taddart nnek uřa d min yarwen řejdud nnek ař ass-a, ad t awyen ɣar Babil. War ittɣimi walu, iqqar SIDI.
18 Ad awyen uřa zeg iḥenjiren nnek inni dd ɣa iffɣen zzayek, inni dd ɣa tejjed ḥima ad iřin d imsexxaren imcennɛen di řeqṣar n ujeǧid n Babil.’ ”
19 Ḥizqiya inna i Icaɛya: “Awař n SIDI i d ayi tennid iṣbeḥ.” Netta inna ɛawed: “Niɣ lla, mařa xenni deg wussan inu ad din yiři řehna d řaman!”
20 Imezruyen iqqimen n Ḥizqiya d marra timegga nnes imeḥḍen d mammec igga ayeřmam d tseǧya i waman u mammec indeh aman di tendint, ma man aya marra war ittwazemmem ca deg wedlis n imezruyen n ijeǧiden n Yahuda? ■ 21 Ḥizqiya ittwassars deg wenḍeř jar řejdud nnes. Mmis Manassa idweř d ajeǧid deg wemcan nnes.