1 Deg useggʷas wiss třata u-ɛicrin n Yuwac, mmis n Axazya, ajeǧid n Yahuda, idweř Yahuyaḥaz, mmis n Yahu, d ajeǧid x Israil, di Samarya. Netta iḥkem sbeɛṭac n iseggʷusa. 2 Netta igga min iǧan d aɛeffan di tiṭṭawin n SIDI u netta iḍfar ddnub n Yarubɛam, mmis n Nabaṭ, wenni yarra Israil ad ixḍa. Netta war iḥeyyed x man aya. 3 X uyenni yarɣa weɣḍab n SIDI x Israil. Marra ussan nni iwca i-ten deg ifassen n Ḥazayil, ajeǧid n Aram, u deg ifassen n Binhadad, mmis n Ḥazayil.

4 Maca Yahuyaḥaz iḥeccem zzat i wudem n SIDI u SIDI isřa as, maɣar Netta iẓra řeḥṣaret n Israil, mammec i ten iḥṣař ujeǧid n Aram. 5 SIDI iwca ijj n umsenjem i Israil, ařami zemmaren ad nfekken zeg ufus n Iramiyyen uca xenni tuɣa ayt n Israil zeddɣen ɛawed am qbeř deg iqiḍan nsen. 6 Maca nitni war ḥeyyden ca x ddnub n taddart n Yarubɛam wenni yarrin Israil ad ixḍa. Uřa d netta iqqim iggur ammu, u teqqim tarebbit n cwarti tbedd di Samarya.

7 Maɣar netta war ijji zi řɛeskar n Yahuyaḥaz mɣir xemsin n imnayen d ɛecra n ikarruten d ɛecra ařef n yeryazen x iḍaren, maɣar ajeǧid n Aram tuɣa iqḍa i-ten, igga i-ten am tɛejjajt ɣar usarwet.

8 Imezruyen iqqimen n Yahuyaḥaz, d marra min igga d marra timegga nnes imeḥḍen, ma man aya marra war ittwazemmem ca deg wedlis n imezruyen n ijeǧiden n Israil? 9 Yahuyaḥaz ittwassars deg wenḍeř jar řejdud nnes. Neḍřen t di Samarya. Mmis Yuwac idweř d ajeǧid deg wemcan nnes.

10 Deg useggʷas wiss sebɛa u-třatin n Yuwac, ajeǧid n Yahuda, idweř Yuwac, mmis n Yahuyaḥaz, d ajeǧid x Israil. Netta iḥkem seṭṭac n iseggʷusa di Samarya.

11 Netta igga min iǧan d aɛeffan di tiṭṭawin n SIDI. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa, maca netta yuyur amenni.

12 Imezruyen iqqimen n Yuwac d marra min igga d marra timegga nnes imeḥḍen i zi imneɣ ak-d Amaṣya, ajeǧid n Yahuda, ma man aya marra war ittwazemmem ca deg wedlis n imezruyen n ijeǧiden n Israil?

13 Yuwac ittwassars deg wenḍeř jar řejdud nnes. Yarubɛam inya x řɛarc nnes. Yuwac ittwanḍeř di Samarya jar ijeǧiden n Israil.

14 Ilicaɛ ittwařqef s řehřac i zi ɣa immet u Yuwac, ajeǧid n Israil, ihwa-dd ɣares uca iru zzates, inna: “Baba inu, baba inu! Akarru n Israil d imnayen nnes!” ^□  ■  

15 Ilicaɛ inna: “Ksi řqews d fřitcat!” Netta iṭṭef i yixef nnes ijj n řqews d fřitcat.

16 Xenni inna netta i ujeǧid n Israil: “Sars afus nnek x řqews!” Uca issars netta afus nnes x řqews uca issars Ilicaɛ ifassen nnes x ifassen n ujeǧid,

17 inna: “Arzem řkazi i iǧan ɣar manis dd-tneqqar tfuct!”, uca netta yarzem i-t. Xenni inna Ilicaɛ: “Wwet!”. U netta iwta s řqews nnes. Uca inna Ilicaɛ: “Aqa-tt d ict n fřitca n usenjem s ufus n SIDI uřa d ict n fřitca n usenjem zeg ifassen n Aram, minzi ad tɣeřbed Aram di Ɛafik ař ɣa ittwareddeǧ.” ^■  

18 Xas uca inna netta: “Ksi fřitcat!” Uca netta iṭṭef i-tent. Xenni inna i ujeǧid n Israil: “Wwet x temmurt!” Uca wanita iwta třata n twařawin x temmurt uca řexdenni ibedd.

19 Aryaz n AREBBI iffugem xas aṭṭas, inna: “Tuɣa ittxeṣṣa ad tewted xemsa niɣ setta n twařawin, iři ad teɣřeb x Aram ařami t i ɣa teqḍid qaɛ. Řexxu maca ad tɣeřbed x Aram mɣir třata n twařawin.

20 Ilicaɛ immut uca neḍřen t. Bandiyyat n Imu’abiyyen tuɣa nnument ad adfent ɣar temmurt ɣar umezwaru n useggʷas. 21 Xzar, umi tuɣa neṭṭřen ict n twařa ijj n weryaz, imsar aqa ẓrin ict n bandiyya. Nitni nḍaren aryaz deg wenḍeř n Ilicaɛ. Umi dayes iwḍa weryaz, iḥada iysan n Ilicaɛ, idweř iddar ɛawed uca ikkar ibedd x iḍaren nnes.

22 Ḥazayil, ajeǧid n Aram, iḥṣar x Israil, marra ussan n Yahuyaḥaz. 23 Maca SIDI iḥinn x řgens nnes uca yarḥem xasen uca inneqřeb ɣarsen di ṭṭweɛ n Řɛahd nnes ak-d Ibrahim, Isḥaq d Yaɛqub. Netta tuɣa war ixs ad ten yaredeǧ u war ixs ad ten issekk zi zzat n wudem nnes, ař řexxu. 24 Ḥazayil, ajeǧid n Aram, immut u mmis Binhadad idweř d ajeǧid deg wemcan nnes. 25 Yuwac, mmis n Yahuyaḥaz, ikkes-dd zeg ifassen n Binhadad, mmis n Ḥazayil, tineddam nni tuɣa wanita iṭṭef zeg ifassen n babas Yahuyaḥaz. Yuwac iɣřeb xas třata n twařawin uca yarra-dd tineddam ɛawed ɣar Israil.