1 Deg useggʷas wiss tnayen n Yuwac, mmis n Yahuyaḥaz, ajeǧid n Israil, idweř Amaṣya, mmis n Yuwac, d ajeǧid. Netta idweř d ajeǧid x Yahuda. 2 Netta tuɣa ɣares xemsa u-ɛicrin n iseggʷusa, umi idweř d ajeǧid. Netta iḥkem di Urcalim. Yemmas qqaren as Yahuɛadan, zi Urcalim. ^■   3 Netta igga min iǧan nican di tiṭṭawin n SIDI, maca war iǧi am babas Dawud. Igga nican am mammec igga babas Yuwac. 4 Mɣir war ttwakksen řegɛudi. Řgens yiwi ɛad tiɣarṣa d tewhibin n řebxur di řegɛudi. 5 Umi tuɣa tagelda temten deg ifassen nnes, imsar belli netta inɣa imsexxaren nni inɣin ajeǧid, babas. 6 Maca iḥenjiren n iqettařen war ten inɣi ca, am mammec t yura deg wedlis ittwannḍen n Ccariɛa n Musa, i di iweṣṣa SIDI, inna: “Ibabaten war ttwaneqqen di ssibbet n iḥenjiren nsen uřa iḥenjiren war ttwaneqqen di ssibbet n ibabaten nsen, maɣar kuř ijj ad ittwaneɣ x ddnub n yixef nnes.” ^■  

7 Netta iɣřeb x ayt n Idum di Teɣzurt n Tmeǧaḥt, ɛecra ařef n yeryazen, u iṭṭef Salaɛ deg umenɣi u igga as Yaqtayil, ař ass-a. ^□  

8 Xenni issekk Amaṣya ireqqasen ɣar Yuwas, mmis n Yahuyaḥaz, mmis n Yahu, ajeǧid n Israil, inna: “As-dd, ejj aneɣ ad nemmeřqa i umenɣi.” 9 Maca Yuwac, ajeǧid n Israil, issekk ijj n ureqqas ɣar Amaṣya, ajeǧid n Yahuda, inna: “Cbarq ak-d isennanen i iɣemmyen x idurar n Lubnan, issekk ict n tebrat ɣar tcejjart n tengelt x idurar n Lubnan, inna: ‘Ewc yeǧis d tamɣart i mmi!’ Maca ijj n řewḥuc i din yuyuren x idurar n Lubnan, ikka u iɛfes x cbarq ak-d isennanen.

10 Iwa cek tɣeřbed x Idum u řexxu tdewřed dayek nnfaxet deg wuř nnek. Iři tᵉttweqqared u qqim di taddart nnek, minzi mayemmi i ɣa temmenḍared ixef nnek di řɣar u ad tewḍid, cek d Yahuda akidek?”

11 Maca Amaṣya war ixs ad iseř uca Yuwac, ajeǧid n Israil, igeɛɛed ařami netta d Amaṣya, ajeǧid n Yahuda, mqabařen ɣar Bayt-Cams i iǧan di Yahuda.

12 Yahuda ittwaɣřeb s ufus n Israil uca nitni arewřen, kuř ijj ɣar uqiḍun nnes.

13 Yuwac, ajeǧid n Israil, iṭṭef Amaṣya, ajeǧid n Yahuda, mmis n Yuwac, mmis n Axazya, di Bayt-Cams uca yiweḍ t-i-dd ɣar Urcalim. Dinni igga ict n tazzit di řḥiḍ n Urcalim, zi Tewwart n Ifrayim ɣares ař Tewwart n Teɣmart, x ijj n webrid n arebɛa mya n iɣaǧen.

14 Yiwi marra ureɣ d nnuqart d marra řeqcuɛ i ittwafen di Taddart n SIDI u deg ixxamen n txubay n taddart n ujeǧid, uřa d irehhanen uca iɛqeb ɣar Samarya.

15 Imezruyen iqqimen n Yuwac d min igga d tmegga nnes imeḥḍen d mammec imneɣ ak-d Amaṣya, ajeǧid n Yahuda, ma man aya marra war ittwazemmem ca deg wedlis n imezruyen n ijeǧiden n Israil?

16 Yuwac ittwassars deg wenḍeř jar řejdud nnes. Netta ittwanḍeř di Samarya jar ijeǧiden n Israil. Mmis Yarubɛam idweř d ajeǧid deg wemcan nnes.

17 Amaṣya, mmis n Yuwac, ajeǧid n Yahuda, iddar ɛad xemmesṭac n iseggʷusa awarni i řmewt n Yuwac, mmis n Yahuyaḥaz, ajeǧid n Israil.

18 Imezruyen iqqimen n Amaṣya, ma nitni war ttwazemmemen ca deg wedlis n imezruyen n ijeǧiden n Yahuda?

19 Nitni ggin ict n tmeɛmuč xas di Urcalim, ařami netta yarweř ɣar Laxic, maca nitni ssekken awarni as inni t iḍfaren ɣar Laxic uca nɣin t dinni. ^■   20 Nitni iwyen t-i-dd x yeysan u netta ittwanḍeř di Urcalim, jar řejdud nnes, di tendint n Dawud. 21 Marra řgens n Yahuda yiwi Ɛazarya, wenni umi ɣar iǧa seṭṭac n iseggʷusa, u ggin t d ajeǧid deg wemcan n babas Amaṣya. ^■   22 Netta ibna Ilat u yarra t deg ufus n Yahuda, awarni umi ittwassars ujeǧid deg wenḍeř ak-d řejdud nnes.

23 Deg useggʷas wiss xemmesṭac n Amaṣya, mmis n Yuwac, ajeǧid n Yahuda, idweř Yarubɛam, mmis n Yuwac, ajeǧid n Israil di Samarya. Netta iḥkem waḥit u-ɛicrin n iseggʷusa di Samarya. 24 Netta igga min iǧan d aɛeffan di tiṭṭawin n SIDI. Netta war iḥeyyed x marra ddnub n Yarubɛam, mmis n Nabaṭ, wenni yarrin Israil ad ixḍa. 25 Netta yarra-dd marra tammurt n Israil sadu ufus nnes zi mani i ɣa tiwḍed ɣar Ḥamat ař Rebḥar n Řewḍa ɛlaḥsab awař n SIDI, AREBBI n Israil, i tuɣa issiweř s uqemmum n umsexxar nnes Yunus, mmis n Amittay zi Jat-Ḥafir. ^■   26 Maɣar SIDI iẓra aqa řeɣben n Israil d amerzag aṭṭas u war din iqqim ɛad wenni ittwaṭṭfen d wenni umi ijjin u war tuɣi wenni iɛawnen i Israil. 27 SIDI tuɣa war yini ad imḥa isem n Israil zi sadu ijenwan u issenjem i-ten s ufus n Yarubɛam, mmis n Yuwac.

28 Imezruyen iqqimen n Yarubɛam d marra min igga d marra timegga nnes imeḥḍen d mammec imneɣ u mammec ikesseb twařa nneɣnit Dimacq d Ḥamat inni tuɣa iǧan ɣar Yahuda, ma man aya marra war ittwazemmem ca deg wedlis n imezruyen n ijeǧiden n Israil? 29 Yarubɛam ittwassars deg wenḍeř jar řejdud nnes, jar ijeǧiden n Israil. Mmis Zakariyya idweř d ajeǧid deg wemcan nnes.