1 Tuɣa ɣar Yuwac sebɛa n iseggʷusa umi idweř d ajeǧid. 2 Deg useggʷas wiss sebɛa n Yahu idweř Yuwac d ajeǧid. Netta iḥkem arebɛin n iseggʷusa di Urcalim. Yemmas qqaren as Ḍibya zi Bi’r-Sebɛa. 3 Yuwac igga min iǧan nican di tiṭṭawin n SIDI, marra ussan min ikka ukehhan Yahuyadaɛ isseřmed i-t. 4 Meɛlik war ttwakksent řegɛudi. Uca řgens tuɣa ittqeddem ɛad tiɣarṣa d tewhibin n řebxur x řegɛudi. 5 Yuwac inna i ikehhanen: “Marra nnuqart n tewhibin ittwaqeddsen nni i ɣa ittwawyen di Taddart n SIDI, řa nnuqart n uɛeddu umi ttwaḥesben iɛeskariyyen, řa nnuqart n řeɛmur ɛlaḥsab aqeddar nnes, uřa marra nnuqart i x dd-yusa deg wuř n ijj n weryaz ḥima ad tt yawi ɣar Taddart n SIDI, ^■  

6 ggur ad tt ksin ikehhanen i yixef nsen, kuř aryaz zeg inni issen uca nitni ad zzayes areqqɛen řeḥyuḍ ihruran n Taddart, marra min din ittwafen n řeḥyuḍ icarrgen.” 7 Deg useggʷas wiss třata u-ɛicrin n ujeǧid Yuwac war ɛeddřen ikehhanen ɛad řeḥyuḍ icarrgen n Taddart. 8 Xenni iřaɣa ujeǧid Yuwac i ukehhan Yahuyadaɛ u i ikehhanen inneɣni, inna asen: “Mayemmi war tɛeddřem řeḥyuḍ icarrgen n Taddart? Xenni řexxu, zi ssa tsawent war tkessim ɛad nnuqart i dd-ittasen zeg inni tessnem mɣir ḥima ad tt tessiwḍem i weɛdař n min icarrgen di řeḥyuḍ di Taddart.”

9 Qebřen ikehhanen maḥend war kessin ɛad nnuqart zi řgens u xenni war ḥdijen ca ɛad ad ɛedřen řeḥyuḍ icarrgen n Taddart.

10 Akehhan Yahuyadaɛ iksi ict n tsenduqt, igga ijj n unuqqib di tqebbart nnes uca issars i-tt zzat i uɛalṭar ɣar yeffus n kuř ijj n wenni ittadfen Taddart n SIDI uca ikehhanen, inni iḥḍan x wadaf ɣar Taddart, ggin dayes marra nnuqart i dd-ittwawyen di Taddart n SIDI.

11 Umi ẓrin belli din aṭṭas n nnuqart di tsenduqt, imsar aqa igeɛɛed umarir n ujeǧid ak-d arrays n ikehhanen. Nitni ssmunen tt di txunca uca weznen nnuqart nni ittwafen di Taddart n SIDI.

12 Nitni wcin řqedd iweznen n nnuqart deg ufus n yinni iggin řxedmet, i imeḥḍayen n Taddart n SIDI. U nitni wcin tt ɛawed i ineqqacen n ukeccuḍ u i ibennayen nni tuɣa ixeddmen di Taddart n SIDI

13 u i imassuten d isuydayen u i tmesɣiwt n ukeccuḍ d tṣuḍar yuydan itteḥwajan i wareqqeɛ n min iqeṭṭsen zi řeḥyuḍ di Taddart n SIDI u i marra min seyyaren i wareqqeɛ n taddart.

14 Mɣir war ttwaggen řa ṭṭbaṣi n nnuqart řa tjeqqaḍin řa ṭṭawyat i urucci d řɣayṭat řa d řeqcuɛ n wureɣ uřa d nnuqart i Taddart n SIDI zi marra nnuqart i ittwawyen di Taddart n SIDI,

15 maɣar nitni wcin tt marra i yenni iggin řxedmet uca areqqɛen zzayes Taddart n SIDI.

16 War mmseḥsiben ca ak-d yeryazen nni umi wcin nnuqart deg ufus nsen, ḥima ad tt wcen i yenni iggin řxedmet, minzi nitni tuɣa tteggen s utiqqi.

17 Nnuqart n ict n tɣarṣt n umarwas d nnuqart n tɣarṣa n ddenb war tt ssidfen ɣar Taddart n SIDI. Tuɣa-tt i ikehhanen.

18 Xenni igeɛɛed Ḥazayil, ajeǧid n Aram, imneɣ ak-d Jat, iṭṭef i-t. Awarni man aya iɛewweř Ḥazayil tamuɣři nnes ɣar Urcalim ḥima ad igeɛɛed ḍidd nnes. ^■  

19 Maca Yuwac iksi marra řeqcuɛ iqeddsen nni tuɣa issqeddes i-tent Yahucafaṭ ak-d Yahuram d Axazya, řejdud nnes, ijeǧiden n Yahuda, uřa d řeqcuɛ iqeddsen nnes d marra wureɣ nni tuɣa iǧan deg ixxamen n txubay n Taddart n SIDI u n taddart n ujeǧid uca issekk aya ɣar Ḥazayil, ajeǧid n Aram. Xas uca iggʷej netta x Urcalim. ^■   20 Imezruyen iqqimen n Yuwac d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 21 Imsexxaren nnes ɣewwɣen xas uca ggin xas ict n tmeɛmuč uca nɣin Yuwac di taddart n lqelɛa manis hekkwan ɣar Silla. ^■   22 Aqa Yuzakar, mmis n Cimɛat, d Yahuzabad, mmis n Cumir, imsexxaren nnes, wtin t ařami immut. Nitni neḍřen t ɣar řejdud nnes di tendint n Dawud. Amaṣya, mmis, idweř d ajeǧid deg wemcan nnes.