1 Umi Ɛatalya, yemmas n Axazya, teẓra, aqa mmis immut, tegga ad teqḍa x marra tarrawt n řaǧ n ujeǧid. ^■   2 Maca Yahuciba, yeǧis n ujeǧid Yahuram, učmas n Axazya, teksi Yuwac, mmis n Axazya, s tnuffra zi jar iḥenjiren n ujeǧid nni ittwanɣen uca tiwyi t ak-d temɣart i t issuṭṭuḍen deg wexxam n tassut uca tessnuffar i-t dinni zi Ɛatalya ḥima war ittwaneqq. 3 Netta iqqim inuffar akides setta n iseggʷusa di Taddart n SIDI, umi teḥkem Ɛatalya x temmurt.

4 Deg useggʷas wiss sebɛa issekk Yahuyadaɛ uca ijja ad dd-asen řqebṭanat x mya n iɛessasen n arrimet u n ireqqasen n tazřa uca issmun i-ten ɣares di Taddart n SIDI. Netta igga akidsen ijj n řɛahd uca ijja i-ten ad jjaǧen di Taddart n SIDI. Xas uca isscen asen mmis n ujeǧid. ^■   5 Netta yumur i-ten, inna: “D man aya i ɣa teggem: ict n ttuřut nwem, inni i ɣa yadfen deg wass n ssebt, ad ɛessen ɣar taddart n ujeǧid. 6 Ict n ttuřut ad tbedd ɣar tewwart n Ṣur u ict n ttuřut ɣar tewwart awarni i ireqqasen n tazřa. Ammu i ɣa tɛessem x taddart di tnubbat. 7 Tnayen n izeynat nwem, zi marra inni i ɣa iffɣen di ssebt, ad ḥḍan ɣar Taddart n SIDI, ɣar ujeǧid. 8 Kenniw ad tennḍem i ujeǧid, kuř aryaz s řesnaḥ nnes deg ufus nnes, u wenni i ɣa yarzun ad yadef jar řeṣfuf ad ittwaneɣ. Ittxeṣṣa kenniw ad teqqimen ak-d ujeǧid mařa netta iffeɣ niɣ mařa yudef.

9 Řqebṭanat x mya ggin am mammec iweṣṣa ukehhan Yahuyadaɛ uca kuř ijj zzaysen iksi iryazen nnes inni yudfen deg wass n ssebt, jmiɛ ak-d yenni iffɣen deg wass n ssebt uca usin-dd ɣar ukehhan Yahuyadaɛ. ^■  

10 I řqebṭanat n mya iwca ukehhan lansat d tseddariyin iqesḥen n uɛeskar i tuɣa iǧan n ujeǧid Dawud, tinni tuɣa iǧan di Taddart n SIDI.

11 Ireqqasen n tazřa bedden s řesnaḥ deg ufus zeg uɣezdis afusi n wudem n Taddart ař aɣezdis azeřmaḍ n wudem n Taddart, ɣar uɛalṭar u ɣar Taddart, ammu quwwaren-dd i ujeǧid.

12 Xenni issuffeɣ-dd mmis n ujeǧid ɣar barra uca igga as temrist n weɛzař x uzeǧif uca iwca as Cchadet. Ammu i t ggin d ajeǧid, dehnen t. Nitni wtin deg ifassen, nnan: “Tudart i ujeǧid!”

13 Ɛatalya tesřa řḥess n iɛeskariyyen n tazřa d wenni n řgens uca tusa-dd nettat ɣar řgens ɣar Taddart n SIDI.

14 Teẓra, u xzar, ajeǧid ibedd ɣar upilar am mammec teǧa di lqaɛida uca řqebṭanat d inni iṣuden di řɣayṭat bedden ɣar ujeǧid. Marra řgens n temmurt ifraḥ u iṣuḍ di řɣayṭat. Xenni tcarreg Ɛatalya arruḍ nnes uca tesɣuyy: “Tamenziwt, tamenziwt!”

15 Maca yumur ukehhan Yahuyadaɛ i řqebṭanat x mya, inni tuɣa iǧan x řɛeskar, uca inna asen: “Suffɣem tt-i-dd ɣar barra uca nɣem wi tt ɣa iḍfaren s ssif.” Maɣar akehhan tuɣa inna: “War tt ttejji ad tᵉttwaneɣ di Taddart n SIDI.”

16 Nitni ssarsen xas ifassen uca řami truḥ x webrid n wadaf n iysan ɣar taddart n ujeǧid, tᵉttwaneɣ nettat dinni. ^□  

17 Yahuyadaɛ igga ijj n řɛahd jar SIDI d ujeǧid d řgens, ḥima ad iřin d ijj n řgens i SIDI uca uřa jar ujeǧid d řgens. ^■  

18 Xas uca yudef marra řgens n temmurt ɣar zzawect n Baɛal u hedmen tt. Iɛalṭaren nnes d řexyařat nnes arẓin ten qaɛ. U nitni nɣin Mattan, akehhan n Baɛal, zzat i iɛalṭaren. Akehhan yařeqqem iweqqafen x Taddart n SIDI.

19 Netta yiwi řqebṭanat x mya d iɛessasen n arrimet d ireqqasen n tazřa d marra řgens n temmurt u nitni ssehwan ajeǧid zi Taddart n SIDI uca kkin x webrid n Tewwart n Ireqqasen n Tazřa tenni ɣar taddart n ujeǧid u dinni iqqim x řɛarc n ijeǧiden. 20 Marra řgens n temmurt ifarḥ uca tarsa tendint. Aqa nɣin Ɛatalya s ssif ɣar taddart n ujeǧid.