1 Ayt n inabiyyen nnan i Ilicaɛ: “Xzar, amcan mani nzeddeɣ zzat i wudem nnek, iḥṣar i neccin.” 2 Ejj aneɣ ad nuyur ɣar L'Urdun u dinni qaɛ ijj zzayneɣ ad dd-yawi ijj n ukeccuḍ, maḥend ad negg ict n tzeddiɣt i neccin.” Netta inna: “Uyurem!” 3 Ijjen zzaysen maca inna: “Ɛafak, uyur-dd ak-d imsexxaren nnek.” Netta inna: “Necc akidwem uyureɣ.” 4 Xenni yuyur akidsen. Umi dd-usin ɣar L'Urdun, zedmen izeɣran. 5 Řami izdem ijj ict n tcejjart, imsar, aqa řeqḍeɛ n wuzzař n ccaqur iwḍa deg waman uca netta iřaɣa, inna: “Axeyyeb, sidi inu, ccaqur tuɣa ittwarḍeř!” 6 Aryaz n AREBBI inna: “Mani iwḍa?” Umi d as isscen amcan, iqess ijj n ukeccuḍ, inḍar i-t din u ammu yiwi-dd uzzař iggur sennej. 7 Inna netta: “Sgeɛɛed i-t-i-dd ɣarek!” Xenni isswiẓẓeḍ s ufus nnes uca iṭṭef i-t.

8 Ajeǧid n Aram imneɣ ak-d Israil uca imcawar ak-d imsexxaren nnes, inna: “Deg wemcan-in d win ad wteɣ iqiḍan i řɛeskar inu.” 9 Maca aryaz n AREBBI issekk ijj ɣar ujeǧid n Israil, inna: “Ḥḍa ixef nnek ad tekked x wemcan nni, maɣar din ihwan Iramiyyen.”

10 Ajeǧid n Israil issekk ireqqasen ɣar wemcan i x tuɣa akides issiweř weryaz n AREBBI u i zi tuɣa i d as iɛřem uca igga ad ḥḍan din. U aya war imsar ca ict n twařa niɣ tnayen n twařawin waha.

11 Uř n ujeǧid n Aram ihaj x man aya u netta iřaɣa i imsexxaren nnes, inna asen: “Ma war tzemmarem kenniw ad ayi tinim man wen jar aneɣ ittraḥ ak-d ujeǧid n Israil?”

12 Ijjen zeg imsexxaren nnes inna: “Lla, sidi inu, ajeǧid! Maca Ilicaɛ, anabi wenni iǧan di Israil, issargeb ujeǧid n Israil awařen i tessawařed deg wexxam nnek n yiḍeṣ.”

13 Inna netta: “Uyurem uca xzarem mani ittiři netta. Xenni ad ssekkeɣ iryazen inu, ad t ṭṭfen.” Xebbaren t, nnan: “Netta aqa-t di Dutan.”

14 Xenni issekk netta iysan d ikarruten d ijj n řɛeskar ameqqran. Nitni iwḍen din di ǧiřet uca nnḍen-dd i tendint.

15 Amsexxar n AREBBI ikkar ɣar tuffut uca iffeɣ ɣar barra, u xzar, ijj n řɛeskar tuɣa inneḍ i tendint s yeysan d ikarruten. Xenni inna as aḥudri: “Ayyaw, sidi inu, min ɣa negg?”

16 Netta inna: “War tteggʷed ca, maɣar inni ɣarneɣ aṭṭas xasen.”

17 Ilicaɛ iẓẓuǧ, inna: “A SIDI, arzem as tiṭṭawin, maḥend ad iẓar!” U SIDI yarzem i uḥudri tiṭṭawin ařami itwařa. U xzar, adrar iccur s yeysan d ikarruten n tmessi i dd-innḍen i Ilicaɛ.

18 Umi ɣares dd-usin nitni, iẓẓuǧ Ilicaɛ i SIDI, inna: “Wwet maca řgens-a s tuddarɣeč!” Uca netta iwta ten s tuddarɣeč ɛlaḥsab awař n Ilicaɛ.

19 Xas uca inna asen Ilicaɛ: “Wa war iǧi d abrid nican u war teǧi d tandint nican. Ḍfarem ayi-dd! Necc ad kenniw nedheɣ ɣar weryaz nni x tarezzum!” U netta indeh i-ten ɣar Samarya. 20 Umi iwḍen nitni ɣar Samarya, imsar, aqa Ilicaɛ inna: “A SIDI arzem tiṭṭawin n iryazen-a maḥend ad ẓaren!”. Uca yarzem asen SIDI tiṭṭawin ařami ẓrin. U xzar, aqa nitni tuɣa aten di řwest n Samarya. 21 Umi ten iẓra, inna ujeǧid n Israil i Ilicaɛ: “Ma ad ten nɣeɣ, a baba inu?” 22 Maca wanita inna: “War ten neqq ca! Cek s yixef nnek ma ad tenɣed inni tḥebbsed s ssif nnek d řqews nnek? Sars asen-dd aɣrum d waman maḥend ad ccen ad swen uca xenni ad ɛeqben ɣar sidi nsen.” 23 Issewjed asen ijj n umensi d ameqqran uca nitni ccin, swin. Awarni aya yarxu asen uca ffɣen ɣar sidi nsen. Xenni war dd-usint bandiyyat n Aram ɛad di temmurt n Israil.

24 Awarni i uya imsar, aqa Binhadad, ajeǧid n Aram, issmun marra řɛeskar nnes, iffeɣ ḥima ad inneḍ i Samarya. 25 Imsar ijj n řaẓ d ameqqran di Samarya, maɣar xzar, nitni nnḍen as-dd ařami idweř ijj n uzeǧif n ijj weɣyuř isekkwa tmenyin n uqiyyat n nnuqart d yijj n arrbeɛ n ijj n řeqyas s řeɣbar n wedbir idweř isekkwa xemsa n uqiyyat n nnuqart. 26 Umi iɛdu ujeǧid n Israil x řḥiḍ, imsar, belli třaɣa as-dd ict n temɣart, tenna: “Ewc ayi-dd afus, a sidi inu, ajeǧid!” 27 Netta inna: “Mařa SIDI war d am iwci afus, mammec necc d am ɣa wceɣ afus? Ma ad yiři s ca zeg unedrar niɣ zi tsirt n uḍiř?” 28 Inna as ujeǧid: “Min cek yuɣin?” Nettat tenna: “Tamɣart-a tenna ayi: ‘Awi-dd mmim ḥima ass-a ad t necc u mmi ad t necc xenni tiwecca.’ ” 29 Ammu neccin nessegʷ mmi uca necci t. Maca řami d as nniɣ tiwecca nnes: ‘Ewc řexxu mmim ḥima ad t necc!’, řexdenni tessnuffar nettat mmis.” ^■  

30 Umi isřa ujeǧid awařen n temɣart-a, icarreg arruḍ nnes uca ammu i yuyur x řḥiḍ uca iẓra řgens illa aqa yarḍ ict n txancet x arrimet nnes. 31 Netta inna: “Ejj ad ayi igg AREBBI ammu d ɛad ktar, mařa iqqim uzeǧif n Ilicaɛ, mmis n Cafat, xas ař ass-a!” ^■  

32 Ilicaɛ iqqim di taddart nnes d imeqqranen qqimen ɣares. Tuɣa ujeǧid issekk ijj n weryaz ɣar zzat nnes, maca qbeř ma yaweḍ ureqqas ɣares, inna Ilicaɛ i imeqqranen: “Ma teẓrim aqa wanita, mmis n ijj n uneqqay, issekk-dd wenni d ayi ɣa iqessen azeǧif? Ḥḍam řexxu, xmi dd ɣa yas ureqqas, bellɛem tawwart u sbeddem t ɣar tewwart! Ma war ittwaseř řḥess n iṣuraf n sidis awarni as?” 33 Řami tuɣa akidsen issawař ɛad, xzar, ihwa-dd ureqqas ɣares. Uca ajeǧid inna: “Xzar, tuɛeffna aya zi SIDI. Min i ɣa rajiɣ ɛad xenni zi SIDI?”