1 Xenni inna Ilicaɛ: “Sřem i wawař n SIDI! Ammu i iqqar SIDI: ‘Tiwecca ɣar řweqt-a ad teswa ijj n řeqyas n waren n ssmid ɣar tewwart n Samarya mɣir d ijj n uciql u ad mmenzen tnayen n řeqyas n imendi i yijj n uciql waha!” ^□   2 Ijj n uneɣraf n řɛeskar nni x uɣiř nnes iɛemmed ujeǧid, yarra-dd x weryaz n AREBBI: “Xzar, waxxa mařa SIDI igga řekwaza deg ujenna, ma izemmar aya ad imsar?” Maca netta inna: “Xzar, ad t tẓared s tiṭṭawin nnek, maca war zzayes tᵉttetted.”

3 Tuɣa din arebɛa n yeryazen zzat i wadaf n tewwart. Nnan ijj i wenneɣni: “Mayemmi i ɣa neqqim da, ɣares ař ɣa nemmet? ^■   4 Mařa ad nini: ‘Ejj aneɣ ad nadef ɣar tendint!’, xenni iǧa řaẓ di tendint u neccin ad dayes nemmet. U mařa neqqim neccin da, ad nemmet ɛawed. Xenni řexxu, ejj aneɣ ad neffeɣ ad newḍa deg ifassen n řmargeḥ n řɛeskar n Aram. Mařa nitni jjin aneɣ neddar, ad neqqim neddar, u mařa nitni nɣin aneɣ, xenni ad nemmet.” 5 Nitni kkaren di tbambast ḥima ad uyuren ɣar řmargeḥ n řɛeskar n Aram. Maca umi udfen nitni ɣar ṭṭarf n řmargeḥ n řɛeskar n Aram, war din tuɣi uřa d ijjen. 6 Maɣar Sidi ijja řɛeskar n Aram ad iseř i yijj n ujarri n ikarruten d ijj n ddriz n iysan d ǧɣareɣ n ijj n řɛeskar d ameqqran, ařami nitni nnan ijjen i wenneɣni: “Xzar, ajeǧid n Israil iḥarrec-dd xaneɣ ijeǧiden n Iḥittiyyen d ijeǧiden n Imiṣriyyen.” ^□  ■   7 Nitni xenni kkaren uca arewřen di tbambast uca jjin iqiḍan nsen d yeysan nsen d yeɣyař nsen uřa d řmargeḥ n řɛeskar am mammec ten tuɣa, uca arewřen maḥend ad ssnejmen řeɛmar nsen.

8 Řami dd-iwḍen ayt n bu-řbarṣ ɣar ṭṭarf n řmargeḥ n řɛeskar, udfen ɣar ijj n uqiḍun, ccin, swin u iwyen ssenni nnuqart d wureɣ d warruḍen uca ffɣen, ssnuffaren aya. Awarni man aya ɛeqben-dd, udfen ɣar ijj n uqiḍun nneɣni uca iwyen uřa ssenni ca uca ffɣen, ssnuffaren aya ɛawed. 9 Xenni nnan i wayawya: “Neccin war nettegg min iǧan nican. Ass-a d ijj n wass n řexbar aṣebḥan u neccin nesseɣd. Mařa nraja da ɣares ař ggur ad iffu řḥař, ad aneɣ teřqef řmuɛṣiyyet. Xenni řexxu, asem-dd, ejj aneɣ ad nuyur, ad t nɛawed di taddart n ujeǧid.”

10 Nitni iwḍen din, řaɣan x uɛessas n tewwart n tendint, ḥajan asen, nnan: “Neccin nudef ɣar řmargeḥ n řɛeskar n Aram, u xzar, war din uřa d ijj u war nesři i ca n řḥess n yewdan, mɣir iysan tuɣa qqnen d yeɣyař tuɣa carfen d iqiḍan am mammec ǧan.”

11 Iřaɣa x iɛessasen uca ssiwḍen nitni areqqas ɣar daxeř n taddart n ujeǧid.

12 Ikkar ujeǧid di ǧiřet, inna i imsexxaren nnes: “Necc ad awem iniɣ min akidneɣ i ɣa yegg Aram. Nitni ssnen, aqa neccin d ayt n bu-ǧuẓ. X uyenni ffɣen zi řmargeḥ n řɛeskar ḥima ad nuffaren deg iyyar, qqaren: ‘Mařa nitni ad ffɣen zi tendint, ad ten neṭṭef ddaren uca ad nadef ɣar tendint.’ ”

13 Ijjen zeg imsexxaren yarra-dd, inna: “Ejj ad ksin maca xemsa n iysan nni ɛad din iǧan, inni iqqimen di tendint u xenni ad nẓar ma ad asen imsar am waṭṭas n ayt n Israil inni da iqqimen, niɣ am waṭṭas n ayt n Israil inni ittwahellken. Ejj aneɣ ad ten nessekk uca xenni ad nẓar min i ɣa yiři.”

14 Ksin nitni tnayen n iysan n tazřa. Ajeǧid issekk i-ten awarni i řɛeskar n Aram, inna: “Uyurem u texzarem!”

15 Nitni ḍfaren ten ař L'Urdun, u xzar, abrid marra inti s warruḍ d řeḥwayej nni immenḍaren Iramiyyen am tuɣa ttqeǧiqen di tarewřa nsen. Ireqqasen ɛeqben u ssiwḍen řexbar i ujeǧid.

16 Xenni iffeɣ řgens zi tendint uca keccḍen řmargeḥ n řɛeskar n Aram uca temmenz ijj n řeqyas n waren n ssmid s yijj n uciql d tnayen n řeqyas n imendi s yijj n uciql ɛlaḥsab awař n SIDI. ^□  

17 Igga ujeǧid aneɣraf n řɛeskar wenni x ittcař, ḥima ad yiři x tewwart uca iɛfes xas řgens di tewwart ařami immut am mammec tuɣa inna weryaz n AREBBI, wenni issiwřen umi tuɣa ɣares dd-ihwa ujeǧid.

18 Aqa imsar am mammec tuɣa issiweř weryaz n AREBBI i ujeǧid, i innan: “Tiwecca ɣar řweqt-a ad mmenzen ɣar tewwart n Samarya tnayen n řeqyas n imendi s yijj n uciql d yijj n řeqyas n waren n yirden s yijj n uciql.”

19 Tuɣa yarra-dd uneɣraf n řɛeskar x weryaz n AREBBI, inna: “Xzar, waxxa mařa SIDI igga řekwaza deg ujenna, ma izemmar ad imsar uya?” U netta tuɣa inna: “Xzar, ad t tẓared s tiṭṭawin nnek, maca war zzaysen tᵉttetted.” 20 Ammu i d as temsar, maɣar řgens iɛfes xas di tewwart ařami immut.