1 Nuɛman, akumandar n řɛeskar n ujeǧid n Aram, tuɣa-t d ijj n weryaz ɣares ssumɛet zzat i wudem n sidis nnes u tuɣa ɣares ccan aṭṭas, maɣar zzayes i yiwi SIDI asenjem i Aram. Aryaz nni tuɣa d ijj n bu-teɣruḍt imeḥḍen, maca tuɣa dayes řbarṣ. 2 Tuɣa din bandiyyat zi Aram, iwyent-dd ict n teḥramt zi temmurt n Israil d tameḥbust. Tuɣa-tt txeddem i temɣart n Nuɛman. 3 Tenna i lallas: “Mři, tuɣa sidi ɣar unabi di Samarya, xenni iři netta ad t issgenfa zi řbars nnes.”

4 Xenni yuyur wanita ḥima ad t iḥaja i sidis nnes, inna: “Ammu d wammu i tessiweř teḥramt zi temmurt n Israil.” ^□   5 Xenni inna ujeǧid n Aram: “Uyur din u necc ad ssekkeɣ ict n tebrat i ujeǧid n Israil.” Netta yuyur deg webrid uca iksi ɛecra n talintat n nnuqart d setta-ařaf n iciqlen n wureɣ d ɛecra n warruḍ icnan. 6 Netta issiweḍ tabrat i ujeǧid n Israil, ammu i yura: “Řexxu xenni mařa tiweḍ-dd tebrat-a ɣarek, xzar, aqa necc ssekkeɣ-dd ɣarek ɛawed amsexxar inu Nuɛman maḥend ad t tessgenfid zi řbarṣ nnes.” 7 Umi iɣra ujeǧid n Israil tabrat, icarreg arruḍ nnes, iřaɣa: “Necc maɣar ma d AREBBI ařami zemmareɣ ad sseddareɣ ijj n umettin ařami netta dd-issekk ijj n weryaz ɣari, maḥend ad t ssgenfiɣ zi řbarṣ nnes? Iwa, ssnem uca xzarem, aqa netta yarezzu ayi řesbab waha!” ^■  

8 Umi isřa Ilicaɛ, aryaz n AREBBI, belli ajeǧid n Israil icarreg arruḍ nnes, imsar aqa netta issekk ijj ɣar ujeǧid ḥima ad as yini: “Mayemmi tcarrged arruḍ nnek? Ejj i-t ad ɣari-dd yas ḥima xenni netta ad issen, aqa ijj n unabi di Israil i iǧan.” 9 Ammu dd-yusa Nuɛman ak-d iysan d ukarru nnes uca ibedd ɣar tewwart n taddart n Ilicaɛ.

10 Xenni issekk Ilicaɛ ijj n ureqqas ɣares, iqqar: “Uyur u ssird ixef nnek sebɛa n twařawin di L'Urdun, xenni ad tedweř arrimet nnek teggenfa uca cek ad tiřid d amezdag.”

11 Idweř Nuɛman iffugem, uca yuyur, iqqar: “Xzar, necc nniɣ deg ixef inu: ‘Netta ad iffeɣ ɣar barra, ad ibedd din maḥend ad iřaɣa Isem n SIDI, AREBBI nnes, uca ad issekk s ufus nnes amcan i dayes iǧan řbarṣ u ammu i ɣa iggenfa řbarṣ.’

12 Ma war iǧi d Abana d Farfar, iɣezran n Dimacq, ḥsen x marra iɣezran n Israil? Ma war zemmareɣ ad dinni ssirdeɣ ḥima ad zedgeɣ?” Netta inneqřeb uca yuyur, isɛar aṭṭas.

13 Imsexxaren nnes usin-dd ɣares uca ssiwřen akides, nnan: “Baba, mři anabi nni ittar zzayek ca min iwɛaren, iři teggid t? I mařa inna xak ɛad: ‘Sird ixef nnek uca ad tdewřed cek tizdiged?’ ”

14 Xenni ihwa-dd ɣar L'Urdun uca isseɣḍeṣ ixef nnes sebɛa n twařawin di L'Urdun am mammec inna wawař n unabi n AREBBI uca tedweř arrimet nnes teggenfa amecnaw arrimet n ijj n uḥenjir u netta idweř izdig. ^■  

15 Xenni iɛqeb ɣar weryaz n AREBBI ak-d marra řɛeskar nnes uca yiweḍ din, ibedd zzat i wudem nnes, inna: “Xzar, řexxu ssneɣ, aqa war iǧi AREBBI mani ma x marra tammurt mɣir di Israil waha. Xenni řexxu, ɛafek, ksi zeg umsexxar nnek ict tarzeft n uqadi!”

16 Maca netta inna: “S tidett am iddar SIDI wenni umi beddeɣ zzat i wudem nnes, necc war kessiɣ walu!” U netta issḥeccem i-t ḥima ad iksi ca, maca netta yugi.

17 Inna Nuɛman: “Mařa lla, iři xenni ad immewc i umsexxar nnek aṭṭas n ucař anect zemmaren tnayen n iserdan ad arbun, maɣar amsexxar nnek war ittiwi ɛad taɣarṣt n wecmaḍ niɣ taɣarṣt i irebbiten inneɣni mɣir i SIDI waha.

18 Maca iři ad iɣfar SIDI i umsexxar nnek ta waha, mařa sidi inu ad yadef ɣar zzawect n Rimmun ḥima ad yaḍar am ittɛemmed dinni x uɣiř inu, aqa necc xenni ad aḍareɣ ammu di zzawect n Rimmun. Mařa ad aḍareɣ ammu di zzawect n Rimmun, iři ad iɣfar SIDI tamesřact nni i umsexxar nnek.”

19 Inna as: “Uyur di řehna!” U netta isafar tammurt, iggʷej xas ijj n webrid.

20 Inna Jiḥazi, aḥudri n Ilicaɛ, aryaz n AREBBI: “Xzar, sidi inu issɛizz x Naɛman, Aramiyu, maḥend ad iksi ca zeg ufus nnes zi min tuɣa i dd-yiwi netta. S tidett am iddar SIDI, necc ad t areddfeɣ uca ad zzayes ksiɣ ca!” 21 Jiḥazi yuyur, yardef Nuɛman. Umi Nuɛman iẓra, aqa netta yusa-dd awarni as, iḍra-dd zeg ukarru maḥend akides imsagar, inna: “Mliḥ?” 22 Netta yarra-dd xas: “Mliḥ. Sidi inu issekk ayi-dd maḥend ad yini: ‘Aqa, ɣar řexxu ɛad usin-dd tnayen n iḥudriyyen zeg ayt n inabiyyen zeg idurar n Ifrayim. Ewc asen xenni ict n talint n nnuqart d tyuya n warruḍ icnan.’ ” 23 Inna Nuɛman: “Ɛafak, ksi zzayi tnayen n talintat n nnuqart.” Netta iḥeccem i-t u igga tnayen n talintat n nnuqart di tnayen n tecyarin uca iwca tnayen n warruḍ icnan i tnayen n iḥudriyyen nnes inni ten yarbun ɣar zzat nnes. 24 Umi yiweḍ ɣar řgeɛɛdet, iksi ten zeg ifassen nsen uca innuffar i-ten di taddart. Ijja iryazen ad uyuren uca ffɣen nitni.

25 Awarni i man aya yudef uca ibedd zzat i bab nnes. Ilicaɛ isseqsa t: “Manis dd-tusid, a Jiḥazi?” Uca netta inna: “Amsexxar nnek war dd-iffiɣ ca mani.” 26 Maca Ilicaɛ inna as: “Ma war tuɣi uř inu din iḥḍar umi dd-iḍra weryaz zeg ukarru nnes i umsagar akidek? Maɣar ma d řḥař ad tmenɛed nnuqart d warruḍ d tcejjura n zzitun d imarjaɛen n uḍiř d wuǧi d ifunasen d tfunasin d imsexxaren d tiyya? 27 Řbarṣ n Nuɛman ad iřṣeq i řebda dayek u i zzariɛet nnek!” Xenni iffeɣ zi zzat i wudem nnes s řbarṣ, d acemřař am wedfeř. ^■