1 Ict zi temɣarin n ayt n inabiyyen třaɣa i Ilicaɛ, tenna: “Amsexxar nnek, aryaz inu, immut, uca cek tessned belli amsexxar nnek tuɣa itteggʷed SIDI. Řexxu maca yusa-dd bab n wareṭṭař ḥima ad iksi akides tnayen n iḥenjiren inu d isemɣan.” ^■   2 Inna as Ilicaɛ: “Min zemmareɣ ad am ggeɣ? Ini ayi min ɣarem di taddart.” Nettat tarra-dd xas: “Tamsexxart nnek war ɣares walu mɣir ict n tɣarraft dayes zzect.” 3 Xenni inna :“Ttar i yixef nnem tiqduḥin barra i taddart, tiqduḥin n jjiran nnem xwant, ḥḍa war iřint drus. 4 Xenni adef ɣar daxeř uca belleɛ tawwart awarni am u awarni i iḥenjiren nnem. Farreɣ xenni zzect di marra tiqduḥin nni u min iǧan iccur, sars i-tt ɣar uɣezdis!” 5 Xenni nettat tuyur xas uca tbelleɛ tawwart awarni as u awarni i iḥenjiren nnes. Nitni iwyen ɣares tiqduḥin u nettat tfarreɣ daysent zzect. 6 Umi ccuren marra iɣarrafen, imsar, tenna i mmis: “Awi ayi-dd ɛad ict n teqduḥt!”, maca netta yarra-dd xas: “War da teqqim ca teqduḥt ɛad!” U zzect tuɣa teqḍa. 7 Nettat tuyur ad tt txebbar i weryaz n AREBBI u wanita inna: “Uyur, zenz zzect u xeǧeṣ bab n wareṭṭař nnem u zi min ɣa iqqimen ad zzayes teddared, cem ak-d iḥenjiren nnem.”

8 Deg ijj n wass umi dd-ikka Ilicaɛ x Cunam, imsar, aqa ict n temɣart icenɛen issbedd i-t din ḥima ad ɣares icc. Řebda umi tuɣa dd-ittekk x tendint nni, imsar, aqa iḥeyyed x webrid nnes ɣar din ḥima ad icc ca n macca. 9 Nettat maca tenna i weryaz nnes: “Xzar, necc uciɣ aqa aryaz-a i ɣarneɣ-dd yusin řebda, aqa-t d amqeddas.

10 Ejj aneɣ ad nebna sennej ijj n wexxam d tameẓyant s řeḥyuḍ uca ad negg din ijj n qama, ict n ṭṭabřa, ijj n řkursi d ijj n řefnar i netta. Mařa netta xenni yusa-dd ɣarneɣ, izemmar ad dinni iɛzeř ixef nnes.”

11 Deg ijj n wass imsar aqa Ilicaɛ yusa-dd din uca iɛzeř ixef nnes deg wexxam n nnej uca iruḥ izzeř dinni.

12 Xenni inna netta i uḥudri nnes Jiḥazi: “Řaɣa-dd i Tcunamect tanita!” Netta iřaɣa as u nettat tbedd zzat i wudem nnes.

13 Netta tuɣa i d as innan i umsexxar nnes: “Ini as: ‘Cem tᵉthillid dayneɣ aṭṭas. Min izemmar ad am ittwagg? Ma ad taɣ din ict n řḥajjet min xef nzemmar ad nessiweř ak-d ujeǧid niɣ ak-d ukumandar ameqqran n řɛeskar di ṭṭweɛ nnem?’ ” Maca nettat tenna: “Necc zeddɣeɣ di řwest n řgens inu.”

14 Xenni tuɣa inna: “Min izemmaren ad as ittwagg?” Uca inna Jiḥazi: “Nettat war ɣares aḥenjir u aryaz nnes iwsar.”

15 Xenni tuɣa inna netta “Řaɣa-dd xas!” U netta iřaɣa-dd xas uca teqqim nettat tbedd di tewwart

16 uca netta inna: “Di řweqt-a ittwaggen, ɣar tsaɛɛet n tudart, ad teksid aḥenjir deg iɣaǧen nnem.” Uca nettat tenna: “Lla, a sidi inu, a aryaz n AREBBI, war sxarriq zeɛma x temsexxart nnek!” ^■  

17 Tamɣart tedweř teksi s ddeyset uca turuw-dd ijj n uḥenjir di řweqt ittwaggen, ɣar řweqt n tudart nni x tuɣa issiweř Ilicaɛ akides.

18 Umi imɣar uḥenjir, imsar deg ijj n wass, iffeɣ-dd barra ɣar babas, ɣar icewwaren.

19 Inna i babas: “Ay azeǧif inu, ay azeǧif inu!” Uca babas inna i yijj n uḥudri: “Arbu t ɣar yemmas!” ^□   20 Netta yarbu t uca yiwyi t ɣar yemmas. Netta tuɣa ittɣima x ifadden nnes ɣares ař azal, xenni immut. 21 Nettat tgeɛɛed ɣar sennej, tessars i-t x qama n weryaz n AREBBI. Tbelleɛ tawwart xas uca teffeɣ. 22 Třaɣa-dd x weryaz nnes, tenna as: “Sekk ayi-dd ijjen zeg iḥudriyyen d ijj zi teɣyař ḥima ad uyureɣ deɣya ɣar weryaz n AREBBI u xenni ad ɛeqbeɣ ɛawed.” 23 Netta inna: “Mayemmi i ɣa tuyured ɣares ass-a? Aqa war iǧi d abeddi n uyur u war iǧi d ssebt.” Nettat tenna: “Kuřci ad yiři mliḥ!” 24 Nettat tbardeɛ i teɣyuč u tenna i uḥudri nnes: “Ndeh i-tt, qqim ggur. Am tnedhed war tbeddi di ṭṭweɛ inu mɣir xmi d ac t i ɣa iniɣ.”

25 Nettat teffeɣ uca tiweḍ-dd ɣar weryaz n AREBBI, ɣar wedrar n Karmil. Umi tt iẓra netta zi řaggʷaj, inna i Jiḥazi, aḥudri nnes: “Xzar, aqa din d Tacunamect.” 26 Řexxu, uyur, řqa tt uca ini as: ‘Ma aqa cem mliḥ? Ma aryaz nnem aqa-t mliḥ? Ma aḥenjir nnem aqa-t mliḥ?’ ” Uca nettat tenna: “Aqa-ten mliḥ!” 27 Umi maca dd-tusa ɣar weryaz n AREBBI x wedrar, tqebbeḍ nettat x iḍaren nnes. Jiḥazi yudef-dd din, ḥima ad tt iɛarn ɣar uɣezdis, maca aryaz n AREBBI inna: “Aḥta as, maɣar řeɛmar nnes icḍen dayes u SIDI issnuffar xafi min xef u war d ayi issargeb ca.” 28 Tenna nettat: “Ma necc ttareɣ i sidi inu ijj n mmi? Ma war nniɣ necc: ‘War d ayi cemmet!’?”^■   29 Inna netta i Jiḥazi: “Byes tajɛinna nnek, ksi taɣɣarct inu deg ufus nnek uca ṭṭef abrid! Mařa cek temmeřqid ca n yijj, war xas ttseǧam, u mařa iseǧem xak ḥed, war xas dd-ttarra ca! Sars taɣɣarct inu x uɣembub n uḥenjir!” ^■   30 Maca yemmas n uḥenjir tenna: “S tidett am iddar SIDI u iddar řeɛmar inu, necc war xak ttḥeyyideɣ ca!” Netta ikkar, iḍfar i-tt.

31 Tuɣa Jiḥazi izwar deɣya zzatsen u issars taɣɣarct x uɣembub n uḥenjir, maca netta war iggi ca řḥess uřa d twarrit. Xenni iɛqeb ḥima ad xas iřqa uca iḥaja as t, inna: “Aḥenjir war dd-ifiq.” 32 Umi dd-yusa Ilicaɛ ɣar taddart, tuɣa immut uḥenjir u immars x qama nnes. 33 Yudef netta ɣar wexxam, ibelleɛ tawwart awarni asen s tnayen idsen uca iẓẓuǧ i SIDI. ^■   34 Xenni ibedd zzat i qama uca iwḍa tiwa n uḥenjir uca issars netta aqemmum nnes x uqemmum nnes, tiṭṭawin nnes x tiṭṭawin nnes, ifassen nnes x ifassen nnes. Netta issbuzzeř tiwa nnes uca teḥma arrimet n uḥenjir. 35 Xenni iɛqeb-dd, yuyur di taddart da d diha, igeɛɛed twařa nneɣnit uca issbuzzeř ixef nnes tiwa nnes. Řexdenni iɛḍes uḥenjir sebɛa n twařawin uca xenni yarzem uḥenjir tiṭṭawin nnes.^■   36 Iřaɣa-dd netta i Jiḥazi, inna: “Řaɣa-dd x Tcunamect!” Uca netta iřaɣa-dd xas uca tusa-dd nettat ɣares, uca inna Ilicaɛ: “Arbu mmim!” 37 Tudef nettat din, tewḍa ɣar iḍaren nnes uca tuḍar ɣařs ař tammurt uca xenni teksi mmis uca teffeɣ ɣar barra.

38 Umi dd-iɛqeb Ilicaɛ ɣar Jiljal, tuɣa din řaẓ di temmurt u řaǧ n inabiyyen qqimen zzates. Inna netta i uḥudri nnes: “Egg marmita d tameqqrant u egg taḥrirt i ayt n inabiyyen.” ^□   39 Xenni dd-iffeɣ ijjen zzaysen yuyur ɣar weḥwic barra ḥima ad dd-yawi tibbi. Netta yufa ijj n wezbir n řexřa uca iřqeḍ-dd zzayes ařami iccur ubeḥrur n warruḍ nnes s texsact n řexřa. Xenni iɛqeb-dd uca iqess i-ten di marmita. Aqa nitni war tt ssinen. 40 Xenni farɣen aya i iryazen ḥima ad ccen. Umi qqasen nitni zi teḥrirt-a, imsar, aqa nitni sɣuyyen deg ujenna, řaɣan: “Ay aryaz n AREBBI, řmewt aqa-tt di marmita!” Uca nitni war zemmaren ad zzayes ccen. 41 Netta inna: “Awi ayi-dd drus n waren!” Netta issuyes i-t di marmita, inna: “Farɣem aya i řgens ḥima ad ccen!” Xenni idweř war dinni ca war iḥři di marmita. ^■  

42 Yusa-dd ijj n weryaz zi Baɛl-Calica, yiwi-dd i weryaz n AREBBI aɣrum zi ṣṣabet tamenzut, ɛicrin n iɣrumen n imendi d řḥebb ibaryen n imendi deg ict n tecyart uca netta inna: “Ewc man aya i řgens.” 43 Maca wanita inna: “Mammec t i ɣa ssarseɣ i mya n yeryazen?” Netta maca inna: “Ewc i-t i řgens ad t yecc, maɣar ammu i iqqar SIDI: ‘Ad ccen u ɛad ad iceṭṭ’.” ^■   44 Netta issars asen t uca ccin nitni u iceṭṭ xasen am mammec tuɣa inna wawař n SIDI.