Amenɣi n Yuram, ajeǧid n Israil, ḍidd i Mu’ab
3
1 Deg useggʷas wiss tmenṭac n Yahucafaṭ, ajeǧid n Yahuda, idweř Yuram, mmis n Axab, d ajeǧid x Israil di Samarya. Netta iḥkem tenɛac n iseggʷusa. 2 Netta igga min iǧan d aɛeffan di tiṭṭawin n SIDI, maca war t iggi ammu d taɛeffant am babas d yemmas, maɣar ikkes amayḍu iqeddsen n Baɛal wenni igga babas. ■ 3 Maca netta iqqim imenneɛ di ddnub n Yarubɛam, mmis n Nabaṭ, wenni yarrin Israil ad ixḍa, netta war iḥeyyed x ddnub n Yarubɛam. 4 Micaɛ, ajeǧid n Mu’ab, tuɣa d ameksaw u tuɣa ittic i ujeǧid n Israil myat-ařef n izmaren d taḍuft n myat-ařef n icarriyyen. □ 5 Řami immut Axab, imsar, aqa iɣewweɣ ujeǧid n Mu’ab x ujeǧid n Israil. ■ 6 Deg wass nni iffeɣ-dd ujeǧid Yuram zi Samarya uca isedd marra Israil. 7 Iṭṭef abrid uca issekk ijj n ureqqas ɣar Yahucafaṭ, ajeǧid n Yahuda, inna: “Ajeǧid n Mu’ab iɣewweɣ xafi. Mma cek ad kidi teffɣed deg umenɣi ak-d Mu’ab?” Uca netta inna: “Necc ad ffɣeɣ akidek. Necc ad iřiɣ am cek, řgens inu am řgens nnek d iysan inu am iysan nnek.” ■ 8 Inna: “X man abrid i ɣa ngeɛɛed?” Netta inna: “X webrid n řexřa n Idum.”
9 Řexdenni yuyur ujeǧid n Israil d ujeǧid n Yahuda d ujeǧid n Idum. Nitni nnḍen ijj n webrid n sebɛa n wussan uca war tuɣi din aman i řɛeskar u i řebhayem nni ten iḍfaren.
10 Xenni inna ujeǧid n Israil: “Axeyyeb i neccin umi dd-iřaɣa SIDI třata n ijeǧiden-a ḥima ad ten iwc deg ufus n Mu’ab!”
11 Uca Yahucafaṭ inna: “Ma war da iǧi ijj n unabi n SIDI wenni i zi ɣa nesseqsa SIDI?” Xenni yarra-dd ijjen zeg imsexxaren n ujeǧid n Israil, inna: “Ilicaɛ, mmis n Cafat, wenni izeǧɛen aman x ifassen n Iliya, aqa-t danita!” ■
12 Uca inna Yahucafaṭ: “Ɣares netta awař n SIDI.” Uca ajeǧid n Israil d Yahucafaṭ d ujeǧid n Idum hwan-dd ɣares.
13 Ilicaɛ inna i ujeǧid n Israil: “Min dinni jar ayi-dd d cek? Uyur ɣar inabiyyen n babac u ɣar inabiyyen n yemmac!” Maca ajeǧid n Israil yarra-dd xas: “Lla, maɣar SIDI iřaɣa-dd i třata aya n ijeǧiden ɣar da, ḥima ad ten iwc deg ufus n Mu’ab.” ■
14 Ilicaɛ yarra-dd xas: “S tidett am iddar SIDI n řɛeskarat nni umi beddeɣ zzat i wudem nnes, mři necc war ɣari bu uweqqar i Yahucafaṭ, ajeǧid n Yahuda, ad yiři necc war cek ḥessbeɣ u war dayek xezzareɣ. ■
15 Řexxu maca awi ayi-dd ijj iccat x ifiřan. Řami tuɣa ittirar wenni iccaten x ifiřan, imsar aqa afus n SIDI yarsa-dd xas.
16 Inna netta: “Ammu i iqqar SIDI: ‘Ggem di teɣzurt-a tařyiwin d teřyiwin ktar!’
17 Maɣar ammu i iqqar SIDI: ‘Kenniw war tẓarrem asemmiḍ uřa d anẓar, ɛad maca taɣzurt-a ad teccur s waman uca kenniw ad tesswem, kenniw uřa d řebhayem nwem d řmař nwem.’
18 Man aya ɛad drus di tiṭṭawin n SIDI, Netta ad awem iwc uřa d Mu’ab deg ifassen nwem.
19 Kenniw ad tewtem kuř tandint ifaryen s iɣebrawen u kuř tandint icenɛen uca ad tqeḍɛem kuř tacejjart iṣebḥen u ad tbellɛem marra řɛunṣarat n waman u ad tḍeyyɛem kuř iyyar iṣebḥen n temmurt s yeẓra.”
20 Uca di tiwecca ɣar tsaɛɛet i ɣar dd-ttawyen tawhibt n řɣiǧet, imsar, aqa usin-dd waman zi Idum uca tɣebba temmurt s waman. 21 Mu’ab am ikmeř isřa belli ijeǧiden ffɣen-dd i umenɣi akidsen uca xenni řaɣan-dd x marra yenni izemmaren ad sennḥen s webyas n řesnaḥ uřa d kuř ijj sennej i uya, uca nitni settfen ixef nsen ɣar weymir. 22 Nitni kkaren ɣar tuffut n ṣṣbeḥ u umi dd-tenqar tfuct x waman, ẓrin Imu’abiyyen inni x ujemmaḍin aqa aman d izeggʷaɣen, am idammen. 23 Nitni nnan: “Ina d idammen. Ijeǧiden nɣin ixef nsen am mmenɣen jar asen s ssif uca ijj iwta wenneɣni. Iwa ayt n Mu’ab, ṭṭfem takeccaḍt!” □ 24 Maca umi iwḍen nitni ɣar řmargeḥ n řɛeskar n Israil, kkaren-dd ayt n Israil uca wtin ayt n Mu’ab. Arewřen ayt n Mu’ab zzat i wudem nsen uca xenni udfen nitni ɣar temmurt, wtin Mu’ab. 25 Nitni hedmen tineddam u kuř aryaz inḍar aẓru nnes x kuř iyyar iṣebḥen uca dřin t. Ɛawed netyen nitni marra řɛunṣarat n waman uca qeḍɛen kuř tacejjart iṣebḥen ařami ceṭṭen mɣir iẓra n Qir-Ḥarisat. Ayt bu-iǧayen nnḍen as uca ɣeḍřen tt. 26 Umi iẓra ujeǧid n Mu’ab belli amenɣi iwɛar xas aṭṭas, issmun-dd ɣares sebɛa mya n yeryazen nni izemmaren ad jebden ssif ḥima ad icuqq iseddiyyen n řɛeskar ɣar ujeǧid n Idum, maca nitni war zemmaren. 27 Xenni iksi netta mmis nnes amenzu wenni i ɣa idewřen d ajeǧid awarni as uca yiwyi t x řḥiḍ d taɣarṣt n wecmaḍ. Uca yusa-dd uduqqez d ameqqran n weɣḍab x Israil. Nitni ffɣen zzayes uca ɛeqben ɣar temmurt nsen.