1 Izifiyyen usin-dd ɣar Cawul ɣar Jibɛa, nnan: “Ma war issnuffar Dawud ixef nnes x tewrirt n Ḥaxila zzat i wudem n tnezruft?” 2 Xenni ikkar Cawul uca ihwa ɣar řexřa n Zif u akides teřt-ařaf n yeryazen nni ittwafarzen zi Israil, ḥima ad yarzu x Dawud di řexřa n Zif. 3 Iwta Cawul iqiḍan nnes ɣar webrid x tewrirt n Ḥaxila tenni zzat i wudem n tnezruft. Dawud iqqim di řexřa, iẓra Cawul iḍfar i-t-i-dd ɣar řexřa. 4 Maɣar Dawud tuɣa issekk ixbarjiyyen u netta tuɣa issen aqa Cawul igga ad dd-yas. 5 Dawud ikkar u yusa-dd mani tuɣa iwta Cawul iqiḍan nnes. Dawud tuɣa ittwařa mani tuɣa izzeř Cawul, ak-d ukumandar n řɛeskar Abnir, mmis n Nir. Cawul iṭṭeṣ di řmargeḥ n ikarruten u řgens tuɣa inneḍ as-dd s iqiḍan nnes. 6 Xenni iṭṭef Dawud deg wawař. Issiweř ak-d Aximalik, Aḥitti, u ak-d Abicay, mmis n Ṣiruya, umas n Yuwab, inna: “Man wen akidi i ɣa ihwan ɣar Cawul di řmargeḥ n řɛeskar?” Abicay inna: “Necc ad kidek hwiɣ.”

7 Yusa-dd Dawud d Abicay di ǧiřet ɣar řgens, u xzar, Cawul tuɣa iṭṭeṣ di řmargeḥ n ikarruten u lansa nnes tejju zzat i uzeǧif nnes di temmurt. Innḍen as-dd Abnir d řgens. 8 Xenni inna Abicay i Dawud: “Ass-a iqqen SIDI řeɛdu nnek deg ufus nnek. Ejj ayi řexxu ad t ssnuqqbeɣ ak-d temmurt s ict n tecti n lansa. War tteḥdijiɣ ad tt teggeɣ ict n twařa nneɣnit.” 9 Dawud maca inna i Abicay: “War t neqq ca, maɣar man wen izemmaren ad yarr afus nnes ɣar umedhun n SIDI uca ad iqqim d afurri?”

10 Xenni inna Dawud: “S tidett am iddar SIDI, SIDI ad t iwwet: niɣ ad dd-yas wass nnes i di i ɣa immet niɣ ad dd-ihwa ɣar umenɣi uca ad ittwaneɣ.

11 Iři ad ayi imneɛ SIDI aqa necc ad wteɣ s ufus inu amedhun n SIDI. Ttzawgeɣ cek, ksi lansa i iǧan zzat i uzeǧif nnes d tebriqt n waman uca ejj aneɣ ad nuyur!”

12 Iksi Dawud lansa d tebriqt n waman i tuɣa din iǧan zzat i uzeǧif n Cawul uca nitni ffɣen. Uřa d ijj war t iẓri u uřa d ijj war t yuci u uřa d ijj war ifiq, maɣar marra ṭṭṣen, minzi SIDI tuɣa isseɣḍes i-ten deg ijj n yiḍeṣ yuǧeɣ.

13 Dawud iɛdu ɣar uɣezdis nneɣni uca ibedd ɣar řaggʷaj x tqiccat n wedrar. Tuɣa iǧa ttasiɛ d ameqqran jar asen.

14 Iřaɣa-dd Dawud i řgens u i Abnir, mmis n Nir, inna: “Ma war dd-tarrid ca, Abnir?” Xenni yarra-dd Abnir, inna: “Min teɛnid cek wenni d ittřaɣan x ujeǧid?”

15 Xenni inna Dawud i Abnir: “Ma cek war teǧid d aryaz n yeryazen, man wen di Israil i iǧan am cek? Mayemmi xenni war teḥḍid x sidi nnek, ajeǧid? Aqa ijjen zi řgens yudef-dd ḥima ad ineɣ ajeǧid, sidi nnek.

16 Min teggid war iǧi ca mliḥ. S tidett am iddar SIDI, kenniw d tarwa n řmewt, minzi kenniw war tɛessem x sidi nwem, amedhun n SIDI! Xzar mani ǧant řexxu lansa n ujeǧid d tebriqt n waman tinni tuɣa zzat i uzeǧif nnes!”

17 Cawul iɛqeř tmijja n Dawud, inna: “Ma ta d tmijja nnek, a mmi Dawud?” Dawud inna: “Aqa-tt d tmijja inu, sidi inu, ajeǧid!”

18 Xenni inna: “Mayemmi iḍeffar sidi inu amsexxar nnes ammu? Minzi min ggiɣ u man t řɛib i yumsen ɣar ufus inu?

19 Xenni řexxu, ejj ad iseř sidi inu, ajeǧid, i wawařen n umsexxar nnes. Mařa SIDI issehweř i cek xafi, iři ad icemm netta tawhibt n řɣiǧet, maca mařa d iwdan i iǧan, xenni ad ttwaneɛřen nitni zzat i wudem n SIDI, maɣar nitni uẓẓřen xafi ass-a ařami war zemmareɣ ad qqimeɣ qqneɣ ɛad i řwart n SIDI, u maɣar nitni qqaren: ‘Ruh, sexxar i irebbiten inneɣni!’ 20 Xenni řexxu, ejj maca idammen inu war ttizzřen ɣar temmurt iggʷejen x SIDI. Minzi ajeǧid n Israil iffeɣ, ḥima ad yarzu x ijj n uyenni n ucurdu waha, am mammec yemmaren tasekkurt deg idurar.” ^■  

21 Xas uca inna Cawul: “Necc xḍiɣ, ɛqeb-dd, a mmi Dawud, maɣar necc war d ac tteggeɣ ɛad řɣar, minzi tudart inu tuɣa ass-a tsekkʷa ɣarek di tiṭṭawin nnek. Xzar necc ggiɣ tubbuheřya u weddareɣ s waṭṭas.” ^□   22 Dawud yarra-dd, inna: “Xzarem, aqa da lansa n ujeǧid. Ejj ijj zeg iḥudriyyen nnek ad iẓwa, ad tt-i-dd yawi. 23 Ad ixeǧeṣ SIDI kuř ijj x tsegda nnes d řaman nnes, minzi SIDI tuɣa isellem i cek ass-a deg ufus inu, maca war xseɣ ca ad ggeɣ afus inu deg umedhun n SIDI. 24 Xzar, am mammec tuɣa tudart nnek ass-a di tiṭṭawin inu tiɣřa, ammu i ɣa tiři tudart inu di tiṭṭawin n SIDI tiɣřa u ad yiři aqa Netta ad ayi ifekk zi marra řeḥṣaret.” ^□   25 Cawul inna i Dawud: “Aqa cek tᵉttwabarked, mmi Dawud. Min ma i ɣa tegged, aqa ad tawḍed ɛawed.” Xenni yuyur Dawud abrid nnes u Cawul iɛqeb ɣar wemcan nnes n tzeddiɣt.