1 Camwil immut u marra Israil imun u wtin xas agejdur u neḍřen t di taddart nnes di Rama. Xas uca ikkar Dawud, ihwa ɣar řexřa n Faran. ^■   2 Tuɣa di Maɛun ijj n weryaz wenni tuɣa ɣar iǧa wagřa di Karmil. Aryaz tuɣa d bu-wagřa ař ṭṭarf. Netta iǧa ɣares teřt-ařaf n wuǧi d ařef n iɣayḍen. Netta tuɣa iǧas uǧi nnes di Karmil. 3 Aryaz ttřaɣan as Nabal u tamɣart nnes ttřaɣan as Abijayil. Tamɣart tuɣa ɣares řeɛqeř mliḥ u tuɣa-tt d musbiḥ i řxezrat, maca aryaz tuɣa iqseḥ u timegga nnes d tiɛeffanin i ǧant. Netta tuɣa-t am wuř nnes. ^□  

4 Umi isřa Dawud di řexřa aqa Nabal tuɣa iǧas uǧi nnes, 5 issekk Dawud ɛecra n yeryazen din, inna i iḥudriyyen: “Gaɛɛdem ɣar Karmil u xmi i ɣa tawḍem ɣar Nabal, ittxeṣṣa awem ad tesseqsam x umeddur nnes deg yisem inu. 6 Ittxeṣṣa ad tinim ammu: ‘Iři ad xak yiři řehna uca ad yiři řehna x taddart nnek d řehna ɣar marra min iǧan nnek! 7 Aqa necc sřiɣ belli cek ɣarek irewwan. Iwa xenni, imeksawen nni ɣarek tuɣa aten akidneɣ uca neccin war ten nxewwej ca uca war ten inqiṣ walu zi min ɣarsen marra ussan i ikkin nitni di Karmil. 8 Seqsa iḥudriyyen nnek u nitni ad ac inin. Ad afen iḥudriyyen-a arḍa di tiṭṭawin nnek, maɣar nusa-dd ɣar ijj n wass n wurar. Ttzawgeɣ, ewc i imsexxaren nnek u i mmic Dawud min ɣa yaf ufus nnek.’ ”

9 Umi iwḍen iḥudriyyen n Dawud din uca ssiwřen ak-d Nabal marra awařen-a deg yisem n Dawud, uca xenni qqimen nitni ttrajan.

10 Nabal maca yarra-dd x imsexxaren n Dawud, inna: “Man wen i iǧan d Dawud d man wen i iǧan d mmis n Yassa? Ass-a aqa din aṭṭas n imsexxaren nni yarewřen. Kuř ijj yarweř zi zzat n wudem n bab nnes.

11 Ma ad ksiɣ xenni aɣrum inu d waman inu d tɣarṣt i ɣarṣeɣ i irewwan inu uca ad t wceɣ i yeryazen x yenni war ssineɣ uřa d manis dd-usin nitni?”

12 Xenni nnqeřben iḥudriyyen n Dawud ɣar webrid i zi dd-usin uca ɛeqben uca usin-dd ɣares u ḥajan as marra awařen-a. ^□  

13 Xas uca inna Dawud i yeryazen nnes: “Kur aryaz ad ibyes ssif nnes!” Uca kuř aryaz ibyes ssif nnes, uřa d Dawud ibyes ssif nnes. Nitni geɛɛden awarni i Dawud, amenni arebɛa-mya n yeryazen, u qqimen mitayen ɣar řeḥwayej.

14 Ijjen zeg iḥudriyyen tuɣa iḥaja aya i Abijayil, tamɣart n Nabal, inna as: “Xzar, Dawud issekk-dd ireqqasen zi řexřa ḥima ad ssiwḍen lbaraka i siditneɣ, maca wanita iqřeɛ xasen s tzawart.

15 Iryazen tuɣa aten cnan i neccin u nitni war d aneɣ seddɛen ca uca war nefqid walu marra ussan i dinni nesseɛdu akidsen deg iyyar n tarewsa.

16 Nitni tuɣa aten amecnaw ijj n řḥiḍ i neccin, ǧiřet d wass, di marra ussan i kidsen neǧa u tuɣa neccin narwes uǧi.

17 Řexxu maca, xzar mliḥ, min ittxeṣṣan ad t tegged, maɣar řɣar x siditneɣ d marra taddart nnes imten. Netta d ijj n weryaz war isekkwi wawař akides.”

18 Tqeǧeq Abijayil, teksi mitayen n tecnifin d tnayen n txuncay n yiřem i binu d xemsa n texsiwin wejdent d xemsa n řeqyas n teɣwawin d mya n tɣayiṭatin n zzbib d mitayen n iɣrumen n tazart, u nettat tessars manawenni marra x yeɣyař. ^□  

19 Tenna i iḥudriyyen nnes: “Uyurem zzat i wudem inu. Xzar necc ad kenniw dd-areddfeɣ.” Maca nettat war d as tenni aya i weryaz nnes Nabal. ^□  

20 Umi tenya nettat x weɣyuř, tehwa x udurriy n wedrar, xzar, imsar aqa Dawud d yeryazen nnes hwan-dd ad msagaren akides u nettat temmeřqa akidsen. 21 Dawud tuɣa inna: “S tidett, baṭeř i ḥḍiɣ x marra min ɣares iǧan di řexřa, ařami war iweddar walu zi min ɣares. Netta ixeǧeṣ ayi min iṣebḥen s min war iḥřin. 22 Ad igg ammu SIDI ak-d řɛedyan n Dawud u ad yarni di man aya, mařa necc zi marra min ɣares, ad jjeɣ, ɣares ař tiwecca, uřa d ijj wenni t itteggen x řḥiḍ!”

23 Umi teẓra Abijayil Dawud, teḍra deɣya x weɣyuř nnes, tewḍa zzat i Dawud x uɣembub nnes uca tuḍar ař temmurt. 24 Nettat tewḍa as ɣar iḍaren, tenna: “Necc, waha, i di iǧa řɛib, a Sidi. Ejj ad tessiweř tayya nnek akidek u seř i wawařen n tayya nnek. 25 Ejj sidi inu war ixezzar ɣar weryaz-a i war isekkwin, ɣar Nabal, maɣar am mammec d as qqaren, ammu i yeǧa netta. Nabal d isem nnes u tubbuheřya aqa-tt dayes. Necc, tayya nnek, war ẓriɣ ca iḥudriyyen n Sidi inu i dd-tessekked. 26 Xenni řexxu, a sidi, s tidett am iddar SIDI u iddar řeɛmar nnek, aqa SIDI d wenni cek immenɛen maḥend ad tessizzřed idammen u ad tfekked ixef nnek s ufus nnek. Xenni řexxu, ad dewřen řɛedyan nnek d inni yarezzun ad ggen řɣar di sidi inu am Nabal. 27 Iwa řexxu, man aya d lbaraka i dd-tiwi tayya nnek i sidi inu maḥend ad temmewc i iḥudriyyen nni yuyuren deg iṣuraf n sidi. 28 Ttzawgeɣ, ɣfar axeṭṭu i tayya nnek, maɣar SIDI ad issbedd i sidi inu ict n taddart temten, minzi sidi inu ittegg garrat n SIDI u s minzi war dayek iǧi řɣar zeg wussan imezwura nnek. 29 Mařa ijj n bnadem ikkar xak ḥima ad cek iḍfar u ḥima ad yarzu x řeɛmar nnek, xenni ad yiři řeɛmar n sidi inu di řaman iqqen di tecyart n yinni iddaren ɣar SIDI, AREBBI nnek, maca řeɛmar n řɛedyan nnek ad zzayes iḥejjar netta ɣar řaggʷaj zeg ukemmic n iǧiy. 30 Ad imsar, mařa SIDI ad igg ak-d sidi inu ɛlaḥsab marra taṣebḥant i xak issiweř u ad cek yegg d amgewwed x Israil, 31 xenni war ittiři aya i cek, a sidi, d ssibbet i zi ɣa tenqarḍed uřa d taɛenkrift i wuř, aqa cek tessizzřed idammen baṭeř u aqa sidi inu igga ad ifekk ixef nnes. U mařa SIDI ad igg řxar di sidi inu, ɛqeř xenni x tayya nnek.”

32 Xenni inna Dawud i Abijayil: “Ad ittwabarek SIDI, AREBBI n Israil, wenni cem dd-issekken ass-a i umsagar akidi! 33 Aqa tᵉttwabarek řefhamet nnem uca tᵉttwabarked uřa d cem, řami d ayi tessbedded ass-a zeg usizzeř n idammen u ad ntaqmeɣ i yixef inu s ifassen inu! 34 Maɣar s tidett, am iddar SIDI, AREBBI n Israil, wenni d ayi issbedden ad am ggeɣ řɣar, mařa cem war ɣari dd-teffiɣed deɣya, xenni war ittɣimi ɣar tfawt n tuffut uřa d ijjen zeg iwdan n Nabal, wenni t itteggen x řḥiḍ!” 35 Uca iksi Dawud zeg ufus nnes min tuɣa i d as dd-tiwi, inna as: “Uyur di řehna ɣar taddart nnem! Xzar, necc sřiɣ-dd ɣarem u ggur ad ssgeɛɛdeɣ udem nnem iḥeznen.” ^□  

36 Umi dd-tusa Abijayil ɣar Nabal, xenni ggur ittegg zzardet n tissit di taddart nnes am zzardet n ijj n ujeǧid. Uř n Nabal tuɣa-t x řxaḍar nnes, isscar ař ṭṭarf. S uyenni war d as tenni uřa d ijj n wawař, ameẓyan niɣ ameqqran, x min imsaren ɣares ař tafawt n tuffut. 37 Ɣar tuffut, xenni řami iffeɣ binu x Nabal, imsar, aqa tamɣart nnes tenna as man aya. Uca ijmed wuř nnes uca netta idweř am ijj n weẓru. 38 Awarni i ɛecra n wussan, imsar, aqa SIDI iwta Nabal ařami immut.

39 Umi isřa Dawud belli Nabal immut, inna netta: “Ad ittwabarek SIDI. Di řḥukm x ddeɛwa inu x řḥegra i d ayi ittwaggen, ittar i-t zeg ufus n Nabal. Uca issbedd umsexxar nnes ḥima ad yegg řɣar. SIDI yarra řɣar n Nabal ad dd-idweř x uzeǧif nnes!” Uca Dawud issekk ijj u wanita issiweř ak-d Abijayil ḥima ad tt yawi d tamɣart i netta.

40 Umi dd-usin imsexxaren n Dawud ɣar Abijayil ɣar Karmil, ssiwřen akides, nnan: “Dawud issekk aneɣ-dd ɣarem ḥima ad cem nawi d tamɣart i netta.” 41 Řexdenni nettat tekkar, tuḍar ɣares ař tammurt s uɣembub nnes, tenna: “Xzar, tismeɣt nnek am ict n tayya ḥima ad tessird iḍaren i imsexxaren n sidi inu.” 42 Tqeǧeq Abijayil, tekkar. Nettat tenya x weɣyuř nnes ak-d xemsa n tiyya nnes tinni tt yareddfen x iḍaren. Nettat teḍfar ireqqasen n Dawud uca tedweř d tamɣart nnes.

43 Yiwi Dawud ɛawed Axinuɛam zi Yazraɛil d tamɣart. Nitenti s tnayen idsent dewřent d tamɣart i netta. 44 Cawul maca tuɣa iwca yeǧis nnes Mixal, tamɣart n Dawud, i Palti, mmis n Layic wenni iǧan zi Jallim. ^■