1 Umi ikemmeř Dawud řhard ak-d Cawul, imsar, aqa řeɛmar n Yunatan iqqen ɣar Dawud u Yunatan ittexs Dawud am řeɛmar nnes. 2 Cawul iksi ɣares Dawud deg wass nni u war t ijji ɛad ad iɛqeb ɣar taddart n babas. 3 Yunatan d Dawud ggin ijj n řɛahd ak-d wayawya, minzi netta ittexs i-t amecnaw ixef nnes. 4 Yunatan ikkes aseřham nnes i tuɣa yarḍ, iwca i-t i Dawud, uřa d arruḍ nnes, uca ɛawed ssif nnes d řqews nnes d webyas nnes i řesnaḥ. 5 Dawud iffeɣ ɣar umenɣi mani ma issekk i-t Cawul. Tuɣa abrid nnes mliḥ ařami t yarra Cawul x iɛeskariyyen nnes. Tuɣa Dawud d lemliḥ di tiṭṭawin n marra řgens uřa di tiṭṭawin n imsexxaren n Cawul. 6 Umi dd-areggʷḥen, uca uřa d Dawud iɛqeb awarni i řeɣřeb x Ifilisṭiniyyen, imsar, aqa ffɣent-i-dd temɣarin zi marra tineddam n Israil i umsagar ak-d Cawul uca ɣennjent u ceḍḥent s ibendiren, s řefraḥet u s řgambriyat s třata n ifiřan. 7 Timɣarin arrint meẓri nsent, ɣennjent s nnubat, nnant: “Cawul iɣřeb x řuřuf nnes, maca Dawud x ɛecra n řuřuf nnes!” ^■   8 Cawul iffugem aṭṭas u tuɣa d man aya d řɛib di tiṭṭawin nnes, inna: “Wcint i Dawud ɛecra n řuřuf, maca wcint ayi mɣir řuřuf. Maca teqqim as mɣir tgelda waha?” 9 Zeg wass nni sennej ibda Cawul iḥeṭṭa Dawud.

10 Tiwecca nnes imsar, aqa iwḍa-dd ɛawed řaryaḥ d aɛeffan n AREBBI x Cawul u iṭṭef-i-t idweř ittekk x uzeǧif di taddart nnes, am tuɣa ittirar Dawud am wussan nneɣni s ufus nnes x řgambri uca Cawul tuɣa ɣares lansa deg ufus.

11 Cawul inḍar lansa, inna: “Necc ad řeqfeɣ Dawud u ad t semmareɣ ɣar řḥiḍ.” Izemmar Dawud ad as ixnes tnayen n twařawin.

12 Tuɣa Cawul itteggʷed zi Dawud, minzi SIDI tuɣa-t ak-d Dawud, maca tuɣa ismeḥ di Cawul.

13 S uyenni issiggʷej Cawul Dawud x yixef nnes, igga i-t d ameqqran x wařef. Netta itteffeɣ u ittareggʷaḥ zzat i wudem n řgens.

14 Tuɣa Dawud ifřeḥ di marra ibriden nnes u SIDI tuɣa-t akides.

15 Umi iẓra Cawul, aqa Dawud ifřeḥ, tuɣa netta itteggʷed zzat i wudem nnes.

16 Maca marra Israil d Yahuda ttexsen Dawud, minzi netta itteffeɣ u ittareggʷaḥ zzat i wudem nsen.

17 Cawul inna i Dawud: “Xzar, necc ad ac wceɣ Mirab, yeǧi tameqqrant qaɛ, d tamɣart. Mɣir iři d ijj n uḍeggʷař imḥeḍ deg umenɣi i necc u mneɣ imenɣan n SIDI.” Inna Cawul ak-d yixef nnes: “Ḥima war ittiři ufus inu ḍidd nnes, maca afus n Ifilisṭiniyyen ad yiři ḍidd nnes.”

18 Inna Dawud i Cawul: “Min ɛniɣ necc d min teɛna tudart inu d min teɛna řaǧ n baba di Israil, aqa necc ad dewřeɣ d aḍeggʷař n ujeǧid?”

19 Umi dd-tiweḍ řweqt i di i ɣa temmewc Mirab, yeǧis n Cawul, d tamɣart i Dawud, imsar, aqa temmewc nettat d tamɣart i Ɛadriyil zi Maḥula. 20 Mixal, yeǧis n Cawul, tuɣa tᵉttexs Dawud. Xebbaren as t i Cawul u tuɣa aya d ict n tmesřact tecna di tiṭṭawin nnes. 21 Inna Cawul: “Necc ad as tt wceɣ ḥima ad as tt tedweř d taxceft u ḥima ad yiři ufus n Ifilisṭiniyyen ḍidd nnes.” Inna Cawul i Dawud: “Ass-a ad tdewřed d aḍeggʷař inu s yijj n webrid nneɣni.” ^□   22 Yumur Cawul i imsexxaren nnes: “Siweř ak-d Dawud di tnuffra, ini: ‘Aqa cek tusid-dd i ujeǧid x řxaḍar u marra imsexxaren ttexsen cek. Xenni dweř řexxu d aḍeggʷař n ujeǧid.’ ” 23 Ssiwřen imsexxaren n Cawul awařen-a deg imezzuɣen n Dawud. Xenni inna Dawud: “Ma d tamesřact tehwen di tiṭṭawin nwem ad idweř ijj d aḍeggʷař n ujeǧid? Ma war ǧiɣ d ijj n weryaz d amezřuḍ d amuqřiř?” 24 Imsexxaren n Cawul ḥajan as t, nnan: “Issiweř Dawud awařen-a.” 25 Xenni inna Cawul: “Ammu i ɣa tinim i Dawud: ‘Ajeǧid war d as teɛjib řeɣramet, maca iɛjeb as mya n řeɛdařeyyat n Ifilisṭiniyyen, ḥima ad intaqem zi řɛedyan n ujeǧid.” Tuɣa Cawul ittxarraṣ ad ineɣ Dawud s ufus n Ifilisṭiniyyen.

26 Ixeddamen nnes ɛawden awařen-a i Dawud. Xenni tuɣa aya d ict n tmesřact tecna di tiṭṭawin n Dawud ḥima ad idweř d aḍeggʷwar n ujeǧid. Řmijař n wussan ittwaggen tuɣa ɛad war ɛdun. 27 Xenni ikkar Dawud. Netta d yeryazen nnes ṭṭfen abrid uca iwta netta mitayen n yeryazen n Ifilisṭiniyyen. Yiwi-dd Dawud řeɛdařeyyat nsen u s uya sedden nitni qaɛ řqedd-a i ujeǧid, ḥima ad idweř d aḍeggʷař n ujeǧid. Xenni iwca as Cawul yeǧis Mixal d tamɣart. ^■   28 Cawul iẓra u issen, aqa SIDI tuɣa-t ak-d Dawud u Mixal, yeǧis n Cawul, tuɣa tᵉttexs i-t. 29 Idweř Cawul iggʷed ɛad ktar zi Dawud uca Cawul idweř d řeɛdu n Dawud marra ussan n tudart nnes.

30 Umi dd-ffɣen řḥukkam n Ifilisṭiniyyen, imsar, meřmi ma ffɣen tuɣa Dawud yarenni mahu di řefřaḥet nnes x marra imsexxaren n Cawul, maḥend ad yiři isem nnes d ccenɛet ař ṭṭarf.