1 Ifilisṭiniyyen ssmunen řɛeskarat nsen i umenɣi u nitni nnyarwen ɣar Suku di temmurt n Yahuda. Wtin iqiḍan nsen jar Suku d Ɛaziqqa ɣar Afas-Dammim. 2 Maca Cawul d yeryazen n Israil nnyarwen uca wtin iqiḍan nsen di Řewḍa n Teɣzurt n Tcejjura n Yigg. Nitni sedden ixef nsen i umenɣi qibač i Ifilisṭiniyyen. 3 Ifilisṭiniyyen bedden ɣar wedrar nni ɣar uɣezdis ajemmaḍ u Israiliyyen bedden ɣar wedrar ɣar uɣezdis-a u taɣzurt tuɣa jar asen. 4 Xenni iffeɣ-dd ijj n uɛeskari d azeɛɛam zi řmargeḥ n řɛeskar n Ifilisṭiniyyen, qqaren as Juliyat. Tuɣa-t zi Jat. Řuɛřa nnes setta n iɣaǧen d ijj n ccbar n ufus. 5 X uzeǧif nnes tuɣa ijj n lkask n nnḥas u yarḍ arruḍ n wuzzař n uɛeskari s teqcurin. Tuɣa řewzen n warruḍ n wuzzař xemsa-ařaf n iciqlen n nnḥas. 6 Netta tuɣa ɣares iseřqan n ifadden n nnḥas i uḥeṭṭu n iḍaren u jar tiɣarḍin nnes yarbu ijj n uḥric n nnḥas. 7 Aɛmud n lansa nnes tuɣa t am ijj n ukeccuḍ n uxeyyeḍ u tixeft n wuzzař n lansa nnes tewzen setta-mya n iciqlen n wuzzař u wenni d as yarebbun taseddart nnes tameqqrant n uɛeskari izwar as.

8 Netta tuɣa ibedd din, iřaɣa i iseddiyyen n řɛeskar n Israil, inna asen: “Mayemmi i dd-teffɣem u tseddem ixef nwem i umenɣi? War iǧi necc d Afilisṭini u kenniw d imsexxaren n Cawul? Farzem ijj n weryaz i kenniw wenni ɣari dd ɣa ihwan. 9 Mři xafi izemmar deg umenɣi, ad ayi iwwet, xenni neccin ad niři d imsexxaren nwem, maca mařa necc arebḥeɣ as uca ad ɣeřbeɣ, xenni kenniw ad tiřim d imsexxaren nneɣ, ad xaneɣ tsexxarem.”

10 Inna Ufilisṭini ɛawed: “Deg wass-a stehziɣ zeg iseddiyyen n řɛeskar n Israil, ad awem iniɣ: ‘Ewc ayi ijj n weryaz maḥend ad nemmneɣ ak-d wayawya!’ ”

11 Cawul d marra Israil sřan awařen-a n Ufilisṭini uca nnxeřɛen u ggʷeden aṭṭas.

12 Dawud tuɣa d mmis n ijj weryaz zi Ifrata, zi Bayt-Laḥm di temmurt n Yahuda, qqaren as Yassa. Netta tuɣa ɣares tmenya n iḥenjiren u deg wussan n Cawul tuɣa ḥessben t d awessar umi dd-yusa jar yeryazen.

13 Třata n iḥenjiren imeqqranen n Yassa ḍfaren Cawul ɣar umenɣi. Ismawen n třata n iḥenjiren nnes, inni dd-iffɣen ɣar umenɣi, aqa aten Iliyab, amenzu, u wenni wiss tnayen d Abinadab u wenni wiss třata d Camma.

14 Tuɣa Dawud d ameẓyan qaɛ uca třata n iḥenjiren imeqqranen tuɣa ḍfaren Cawul.

15 Dawud tuɣa innum ittraḥ dinni u xenni ittareggʷeḥ-dd zi Cawul ḥima ad yarwes uǧi n babas di Bayt-Laḥm. ^■  

16 Afilisṭini tuɣa ittas-dd ɣar tuffut u ɣar tmeddit, isscan ixef nnes din, arebɛin n wussan.

17 Inna Yassa i mmis Dawud: “Ksi ɛafak i aytmac ijj n ifa n teɣwawin-a d ɛecra n tecnifin, awyi tent deɣya ɣar řmargeḥ n řɛeskar ɣar aytmac

18 u ɛecra n trussi n uɣi awyi tent ɣar imeqqranen x wařef. Arzu x yaytmac, ma mliḥ i iǧan u awyi zzaysen ict n weḍman d jjurret n tudart!”

19 Cawul d nitni d marra iryazen n Israil, tuɣa ttmenɣan ak-d Ifilisṭiniyyen di Řewḍa n Teɣzurt n Tcejjura n Yigg.

20 Ikkar Dawud zic ɣar tuffut, ijja tḥimart n wuǧi ɣar ijj n uɛessas u yiwi marra aya akides uca yuyur, am mammec tuɣa i d as t yumur Yassa. Umi dd-yiweḍ ɣar řmargeḥ n ikarruten, řexdenni i iffeɣ řɛeskar ɣar useddi n umenɣi, bdan ad sɣuyyen s iɣuyyan n umenɣi. ^■   21 Israil d Ifilisṭiniyyen sedden ixef nsen i umenɣi, aɣembub n ijj n useddi deg uɣembub n ijj n useddi nneɣni. 22 Dawud ijja řeḥwayej nni ɣares deg ifassen n ijj n uɛessas n řexzin uca yuzzeř ɣar useddi n řɛeskar. Umi din yiweḍ, isseqsa x yaytmas mammec ǧan nitni. 23 Řami tuɣa akidsen issawař, iffeɣ-dd umjahed azeɛɛam nni. Tuɣa qqaren as Julyat zi Jat, zi řɛeskar n Ifilisṭiniyyen. Netta issiweř s wawařen d ijjen u Dawud isřa xas. 24 Umi ẓrin marra iryazen n Israil aryaz nni, arewřen. Nitni ggʷeden aṭṭas. 25 Nnan yeryazen n Israil: “Ma teẓrim kenniw mammec i dd-igeɛɛed weryaz nni? Netta igeɛɛed-dd ḥima ad istehza zi Israil. Aryaz, wenni t i ɣa iɣeřben, ad t yarr ujeǧid d bu-wagřa ameqqran. Netta ad as iwc yeǧis u ad ikkes x řaǧ n taddart n babas ḍḍariba di Israil.” 26 Xenni issiweř Dawud ak-d yeryazen inni ɣares dd-ibedden, inna: “Min i ɣa ittwaggen i weryaz nni i ɣa iwten Afilisṭini aya u ad ikkes astehzi x Israil? Min iɛna Afilisṭini aya i war ittwaxetnen, aqa istehza x iseddiyyen n řɛeskar n AREBBI iddaren?” 27 Yarra-dd xas řgens s wawař d ijjen, nnan: “D man aya i ɣa ittwaggen i weryaz nni t i ɣa iɣeřben.”

28 Umas ameqqran Iliyab isřa as issawař ak-d yeryazen. Yarɣa uxeyyeq n Iliyab x Dawud, inna: “Mayemmi i dd-tehwid cek u man wen i umi tejjid taḥimart tameẓyant n wuǧi di řexřa? Necc ssneɣ maca aɛeffar nnek d tuɛeffna n wuř nnek, minzi cek tehwid-dd ḥima ad texzared ɣar umenɣi.” 29 Dawud inna: “Min ggiɣ řexxu ɛawed? Ma war iǧi mɣir ijj n wawař i sseqsiɣ?” 30 Netta iḥeyyed xas, iruḥ ɣar ijjen nneɣni uca isseqsa aseqsi d ijjen uca yarra-dd xas řgens s wawař d ijjen amecnaw mammec dd-arrin nitni twařa tamezwarut.

31 Nitni sřan i wawařen i tuɣa issawař Dawud uca ssiwřen x man aya zzat i wudem n Cawul u netta ijja ad t-i-dd-awyen. 32 Inna Dawud i Cawul: “Uřa d ijj n bnadem war ittefciř wuř nnes zeg Ufilisṭini. Amsexxar nnek ad yuyur ad imneɣ ak-d Ufilisṭini.” 33 Cawul inna i Dawud: “Cek war tzemmared ad traḥed ɣar Ufilisṭini aya ḥima akides tmenɣed maɣar cek d aḥudri ɛad, umi netta maca d aryaz aɛeskari zi temẓi nnes.” 34 Xas uca inna Dawud i Cawul: “Amsexxar nnek tuɣa yarekkwes taḥimart n wuǧi n babas. Mařa yusa-dd ijj n weyrad niɣ ijj n ddub, uca iṭṭef ijjen zeg wuǧi n tḥimart, 35 xenni ḍfareɣ t, wtiɣ t u fekkeɣ-dd izmar zeg uqemmum nnes. Řami dd-ikkar akidi, cebbareɣ as di tmart, wtiɣ t uca nɣiɣ t. 36 Amsexxar nnek inɣa ayrad uřa d ddub. Ammu i ɣa yiři ak-d Ufilisṭini aya i war ittwaxetnen, ad as temsar am ak-d ijj n zzaysen, minzi netta istehza zeg iseddiyyen n řɛeskar n AREBBI iddaren.” 37 Inna Dawud ɛawed: “SIDI wenni d ayi ifekken zeg iceqřaḍen n wayrad u zeg iceqřaḍen n ddub, ad ayi ifekk zeg ufus n Afilisṭini aya.” Xenni inna Cawul i Dawud: “Uyur, ad kidek yiři SIDI!” 38 Cawul issyarḍ i Dawud arruḍ nnes n umenɣi, igga as ijj n lkask n nnḥas x uzeǧif nnes u iḥezzem as s yijj n warruḍ n wuzzař. 39 Icedd Dawud ssif nnes tiwa i warruḍ nnes, inwa ad yuyur cwayt, minzi war t iqeǧeb ɛemmarṣ ammu. Xenni inna Dawud i Cawul: “Necc war zemmareɣ ad uyureɣ di řeḥwayej-a, war t qeǧbeɣ ɛemmarṣ!”, u Dawud issars i-ten ɛawed. 40 Iksi aɛekkaz deg ufus nnes, ixḍar xemsa n iẓra iḥnunnyen zi teɣzart uca igga i-ten di tecyart nnes n tarewsa tenni ɣares tuɣa, maca mani tt i ɣa yaweḍ deɣya, u tuɣa iǧiy deg ufus nnes. Ammu i iffeɣ ɣar umsagar ak-d Ufilisṭini. 41 Afilisṭini yuyur, iqarreb-dd ɣar Dawud u wenni d as yarebbun taseddart tameqqrant izwar as. 42 Umi dd issgeɛɛed Ufilisṭini tamuɣři nnes, iẓra Dawud, isseḥqar i-t, maɣar Dawud tuɣa d aḥudri ɛad, netta tuɣa arrubyu d muṣbiḥ i řxezrat. 43 Afilisṭini inna i Dawud: “Ma necc d ijj n weqzin, aqa cek tusid-dd ɣari s ikecwaḍ?” Uca Afilisṭini tuɣa ineɛɛeř x Dawud ɣar irebbiten nnes. 44 Inna Ufilisṭini ɛawed i Dawud: “As-dd ɣari, xenni necc ad wceɣ aysum nnek ad t ṣarḍen ijḍaḍ n ujenna d řmař n řexřa.”

45 Xenni inna Dawud i Ufilisṭini: “Cek tusid-dd ɣari s ssif d lansa d uḥric, maca necc usiɣ-dd ɣarek deg Yisem n SIDI n řɛeskarat, AREBBI n iseddiyyen n řɛeskar n Israil nni zi testᵉhezzid.” 46 Ass-a ad cek igg SIDI deg ufus inu. Necc ad cek ɣeřbeɣ. Ad ac kkseɣ azeǧif u deg wass-a ad wceɣ řxecbat n řɛeskar n Ifilisṭiniyyen ad tent ṣarḍen ijḍaḍ n ujenna d řmař n řexřa. Marra ddunect ad tessen aqa Israil ɣares ijj n AREBBI, 47 uřa d marra agraw-a n řgens ad tessen aqa SIDI war ittfekki s ssif uřa s lansa, maɣar amenɣi n SIDI u netta ad cek igg deg ifassen nneɣ.” ^□   48 Uca imsar, umi Afilisṭini ikkar, iqarreb ɣar Dawud, Dawud igga s tazřa uca yuzzeř ɣar useddi n řɛeskar n řeɛdu i umsagar ak-d Ufilisṭini. 49 Iwta Dawud ɣar tecyart nnes n tarewsa, ikkes-dd ijj n weẓru, iḥejjar i-t s iǧiy uca iřqef Afilisṭini di tenyart nnes. Aẓru indef i tenyart nnes ařami iwḍa netta x uɣembub nnes ɣar temmurt. 50 Ammu i iɣřeb Dawud Afilisṭini s ijj n yiǧiy u s ijj n weẓru. Netta iřqef Afilisṭini, inɣa i-t. War ɣares tuɣi i Dawud qaɛ ssif deg ufus nnes. 51 Xenni yuzzeř Dawud din ɣar Ufilisṭini u umi dd-ibedd zzates, iṭṭef ssif nnes, ijbed i-t-i-dd zeg weɣraf, inɣa i-t. Ɛawed iqess as azeǧif zzayes. Umi t ẓrin Ifilisṭiniyyen, aqa bu-teɣruḍt nsen immut, arewřen nitni. 52 Iryazen n Israil u n Yahuda kkaren, sɣuyyen ařaɣi n umenɣi uca ḍfaren Ifilisṭiniyyen ɣares ař Jat u ɣares ař tiwwura n Ɛaqrun. Inni ittwanɣen zeg Ifilisṭiniyyen wḍan deg webrid zi Caɛarayim ař Jat d Ɛaqrun. 53 Awarni aya ɛeqben-dd ayt n Israil zeg weḍfar s wecnaq n Ifilisṭiniyyen uca keccḍen řemrageḥ n řɛeskar nsen. 54 Iksi Dawud azeǧif n Ufilisṭini, yiwyi t ɣar Urcalim, maca řesnaḥ nnes igga i-ten deg uqiḍun nnes. ^□  

55 Umi iẓra Cawul Dawud iggur ɣar umsagar ak-d Ufilisṭini, inna netta i Abnir, akumandar n řɛeskar nnes: “Umi igga mmis uḥudri aya?” Abnir yarra-dd xas: “S tidett am iddar řeɛmar nnek, a ajeǧid, necc war t ssineɣ.” 56 Ajeǧid inna: “Seqsa xenni umi igga mmis uḥuḍri aya!” 57 Umi dd-iɛqeb Dawud awarni umi tuɣa iɣřeb x Ufilisṭini, yiwyi t akides Abnir, indeh i-t ɣar Cawul. Dawud tuɣa ɣares ɛad azeǧif n Ufilisṭini deg ufus nnes. 58 Cawul isseqsa t: “Umi teggid mmis cek, a aḥudri?” Dawud yarra-dd xas: “Mmis n umsexxar nnek, n Yassa zi Bayt-Laḥm.”