Yaftaḥ
11
1 Yaftaḥ, zi temmurt n Jilɛad, tuɣa-t d ijj n bu-teɣruḍt imeḥḍen, maca netta tuɣa d mmis n ict n temɣart n farq-ccɣeř. Jilɛad aqa ijja-dd Yaftaḥ ɣares. ■ 2 Uřa d tamɣart n Jilɛad turuw as-dd iḥenjiren. Umi iḥenjiren n temɣart-a mɣaren, uẓẓřen x Yaftaḥ, nnan as: “Cek war tᵉṭṭifed ca tasɣart di taddart n babatneɣ, maɣar cek d mmis n ict n temɣart nneɣnit.” 3 Uca yarweř Yaftaḥ zeg wudem n aytmas u netta iqqim izeddeɣ di temmurt n Ṭub. Uca ict n tewrawt n yeryazen xwan usin-dd ɣar Yaftaḥ, ffɣen-dd akides. 4 Awarni aṭṭas n wussan imsar, kkaren ayt n Ɛammun mmenɣen ak-d Israil. 5 Uca imsar, umi ayt n Ɛammun mmenɣen ak-d Israil, aqa imɣaren n Jilɛad ṭṭfen abrid ḥima ad awyen Yaftaḥ zi temmurt n Ṭub. 6 Nitni nnan i Yaftaḥ: “As-dd, iři d akumandar nneɣ u ejj aneɣ ad nemneɣ ak-d ayt n Ɛammun.” 7 Yaftaḥ inna i imɣaren n Jilɛad: “Ma war d ayi tɛiffem u tuẓẓřem xafi zi taddart n baba? Mayemmi i dd ɣari tusim řexxu, řexxu umi teǧam di řeḥṣaret?” 8 Arrin-dd imɣaren n Jilɛad x Yaftaḥ: “S uya i dd ɣarek nusa řexxu, ḥima cek akidneɣ tuyured ad temmenɣed ak-d ayt n Ɛammun. Cek ad ɣarneɣ tiřid d azeǧif x marra imezdaɣ n Jilɛad.” 9 Xenni inna Yaftaḥ i imɣaren n Jilɛad: “Mařa kenniw tarrim ayi ɣar umenɣi ak-d ayt n Ɛammun u SIDI isellem i-ten zzat i wudem inu, ad dewřeɣ d azeǧif nwem!” 10 Imɣaren n Jilɛad nnan i Yaftaḥ: “Ad yiři SIDI d wenni ittesřan jar aneɣ. Uct xaneɣ mařa war nettegg ɛlaḥsab awařen nnek.”
11 Xas uca yuyur Yaftaḥ ak-d imɣaren n Jilɛad u řgens igga i-t d azeǧif d akumandar x yixef nnes. Uca issiweř Yaftaḥ marra awařen nnes zzat i wudem n SIDI di Miṣfa.
12 Uca issekk Yaftaḥ ireqqasen ɣar ujeǧid n ayt n Ɛammun, inna: “Min din jar ayi d cek, aqa cek teffɣed, ḥima ad temmenɣed ḍidd i temmurt inu?”
13 Inna ujeǧid n ayt n Ɛammun i ireqqasen n Yaftaḥ: “Minzi Israil tuɣa iṭṭef tammurt inu zeg Arnun ař Yabbuq u ař L'Urdun, umi dd-iffeɣ zi Miṣra. Arr ayi-tt řexxu s řehna!”
14 Issekk Yaftaḥ ɛawed ireqqasen ɣar ujeǧid n ayt n Ɛammun.
15 Inna as: “Ammu i iqqar Yaftaḥ: ‘Israyil war iṭṭif ca tammurt n Mu’ab d temmurt n ayt n Ɛammun, ■
16 minzi umi dd-ffɣen zi Miṣra, yuyur Israil di řexřa ař Řebḥar n Telga uca ɣar uneggar yusa-dd ɣar Qadac.
17 Xenni issekk Israil ireqqasen ɣar ujeǧid n Idum, inna: “Ejj ayi ad cuqeɣ di temmurt nnek!” Maca ajeǧid n Idum war isři ca. Issekk ɛawed ireqqasen ɣar ujeǧid n Mu’ab uca uřa d netta war iwc ttesriḥ. Ammu iqqim Israil di Qadac. ■
18 Uca yuyur řgens di řexřa, inneḍ i temmurt n Idum d temmurt n Mu’ab uca yusa-dd ammu ɣar uɣezdis n temmurt n Mu’ab i iǧan ɣar mani tneqqar tfuct uca nitni wtin iqiḍan nsen aɣirin i Arnun, maca war dd-usin daxeř i weymir n temmurt n Mu’ab, maɣar Arnun d aymir n Mu’ab.
19 Xenni issekk Israil ireqqasen ɣar Siḥun, ajeǧid n Imuriyyen, ajeǧid n Ḥacbun, uca inna as Israil: “Ejj aneɣ ad ncuqq tammurt nnek ař amcan nneɣ.” ■ 20 Maca Siḥun war ittiqq Israil ad yejj ad icuqq aymir nnes. U Siḥun issmun marra řgens nnes uca wtin iqiḍan nsen di Jahaṣ uca netta imneɣ ak-d Israil. 21 SIDI, AREBBI n Israil, igga xenni Siḥun d marra řgens nnes deg ufus n Israil uca ɣeřben xasen. Marra tammurt n Imuriyyen, inni tuɣa izeddɣen di temmurt nni, iṭṭef i-tt Israil d řwart. 22 Nitni ṭṭfen marra tammurt n Imuriyyen d tasɣart, zeg Arnun ař Yabbuq u zi řexřa ař L'Urdun. ■ 23 Xenni řexxu, aqa yuẓẓeř SIDI, AREBBI n Israil, x Imuriyyen zzat i wudem n řgens n Israil zi řwart nsen u ma cek xenni ad tt tᵉṭṭfed d tasɣart? 24 Ma war tᵉṭṭifed ca d tasɣart min d ac ɣa iwc arebbi nnek Kamuc d řwart? Ammu i-t i ɣa neṭṭef marra d řwart min d aneɣ ɣa iwc SIDI, AREBBI nneɣ, d řwart. 25 Xenni řexxu, ma cek xar s waṭṭas x Balak, mmis n Ṣiffur, ajeǧid n Mu’ab? Ma netta ɛemmarṣ ma imcubbec ak-d Israil? Ma ɛemmarṣ ma imneɣ akidsen? ■ 26 Israil tuɣa izeddeɣ ɛad teřt-mya n iseggʷusa di Ḥacbun u di tneddam i ɣares dd-iqqnen u di Ɛaruɛir d tneddam i ɣares dd-iqqnen u di marra tineddam nni iǧan ɣar tmuwwa n Arnun. Mayemmi war tent tfekkem xenni di marra řweqt nni? 27 Necc war kik xḍiɣ, maca cek tegged ayi řɣar umi akidi temmenɣed. SIDI, wenni d Řqaḍi, ad iḥkem ass-a jar ayt n Israil u jar ayt n Ɛammun!” 28 Maca ajeǧid n ayt n Ɛammun war isři ɣar wawařen nni d as dd-issekk Yaftaḥ s ufus n ijj n ureqqas. 29 Uca ihwa-dd Arruḥ n SIDI x Yaftaḥ u netta iẓwa Jilɛad d Manassa u iẓwa ɛawed x Miṣfa di Jilɛad uca iẓwa xenni ɣar ayt n Ɛammun. 30 Yaftaḥ iwaɛd ijj n lwaɛd i SIDI, inna: “Mařa Cek ad tegged ayt n Ɛammun qaɛ deg ufus inu, 31 xenni, mařa ɛeqbeɣ-dd di řehna zeg ayt n Ɛammun, min i dd ɣa iffɣen zi tewwura n taddart inu ḥima ad kidi immeřqa, ad yiři i SIDI u necc ad as t qeddmeɣ d tasɣart n wecmaḍ.”
32 Xas uca iẓwa Yaftaḥ ɣar ayt n Ɛammun ḥima ad kisen imneɣ uca SIDI igga i-ten deg ufus nnes. 33 Netta iɣřeb xasen zi Ɛaruɛir ɣares ař mani tiwḍed ɣar Minnit, ɛicrin n tneddam, ař Abal-Kurum. Tuɣa-t d ict n tecti d tameqqrant aṭṭas. Ammu i dd-ttwasehwan ayt n Ɛammun zzat i wudem n ayt n Israil. □
34 Umi dd-yusa Yaftaḥ ɣar Miṣfa ɣar taddart nnes, xzar, teffeɣ-dd ɣares yeǧis ḥima ad t-i-dd teřqa barra s ibendiren d ccḍiḥ s nnubtat. Nettat tuɣa d ayenni ɣares n yeǧis, netta tuɣa war ɣares aḥenjir uřa d taḥenjirt nneɣnit. 35 Umi tt iẓra, icarreg arruḍ nnes, inna: “A wayyaw, yeǧi, cem tessehwid ayi-dd aṭṭas u tdewřed ɣar yenni i d ayi itteggen řeḥřiq minzi necc arzmeɣ aqemmum inu i SIDI, war zemmareɣ ad dd-dewřeɣ ɛad.” 36 Nettat tenna as: “Baba inu! Mařa cek tarzmed aqemmum nnek i SIDI, xenni egg kidi ɛlaḥsab awař i dd-iffɣen zeg uqemmum nnek, maɣar intaqem SIDI qaɛ di ṭṭweɛ nnek x řɛedyan nnek, x ayt n Ɛammun.” 37 U nettat tenna ɛawed i babas: “Iři ad kidi ittwagg ɛlaḥsab awař-a. Ejj ayi tnayen n iyuren, maḥend necc ad uyureɣ, ad dd-hwiɣ x idurar, ad ruɣ x tuɛezriya inu, necc ak-d tmeddukař inu.” 38 Netta yarra-dd xas: “Uyur!” Uca ijja i-tt ad traḥ tnayen n iyuren. Nettat maca tᵉṭṭef abrid ak-d tmeddukař nnes uca tru x tuɛezriya nnes deg idurar. 39 Imsar, umi qefřen tnayen n iyuren, tareggʷweḥ-dd ɣar babas u netta iqfeř lwaɛd i iwaɛd. Nettat tuɣa ɛemmarṣ war tessin uřa d ijj n weryaz. Ammu idweř d lɛada di Israil, □ 40 aqa aseggʷas awarni i useggʷas yessis n Israil ṭṭfent abrid ḥima ad idarent i yeǧis n Yaftaḥ, Ajilɛadi, arebɛa n wussan deg useggʷas.