Tulaɛ
10
1 Awarni i Abimalik ikkar Tulaɛ, mmis n Fuwa, mmis n Dudu, ijj n weryaz zi teqbič n Issakar, ḥima ad issenjem Israil. Netta tuɣa izeddeɣ di Camir x idurar n Ifrayim. 2 Netta tuɣa d řqaḍi x Israil třata u-ɛicrin n iseggʷusa. Xenni immut, ittwanḍeř di Camir. Ya’ir
3 Awarni as ikkar Ya’ir, Ajilɛadi. Netta tuɣa d řqaḍi x Israil tnayen u-ɛicrin n iseggʷusa. 4 Netta tuɣa ɣares třatin n iḥenjiren, inni innayen x třatin n iɣyař u ɣarsen třatin n tneddam, ttřaɣan asent ‘ředcur n Ya’ir’ ɣares ař ass-a. Aqa atent di temmurt n Jilɛad. 5 Uca immut Ya’ir, neḍřen t di Qamun.
Israil di řeḥṣaret
6 Ayt n Israil arnin ad ggen min iǧan d aɛeffan di tiṭṭawin n SIDI. Nitni sexxaren i Ibaɛlen d Actarutin uřa d irebbiten n Aram d irebbiten n Ṣidun d irebbiten n Mu’ab d irebbiten n Ɛammun d irebbiten n Ifilisṭiniyyen. Nitni jjin SIDI u war d as sexxaren ɛad. ■ 7 Yarɣa weɣḍab n SIDI x i Israil u Netta igga i-ten deg ufus n Ifilisṭiniyyen u deg ifassen n ayt n Ɛammun. 8 Deg useggʷas nni řebzen u arẓin nitni ayt n Israil. Ammu i iggin nitni tmenṭac n iseggʷusa ak-d ayt n Israil inni iǧan x ujemmaḍ n L'Urdun, di temmurt n Imuriyyen, tenni di Jilɛad. 9 Uca ɛawed ẓwan ayt n Ɛammun L'Urdun ḥima ad mmenɣen uřa ak-d Yahuda d Binyamin d taddart n Ifrayim ařami tᵉttwaḥsar Israil aṭṭas.
10 Xenni sɣuyyen ayt n Israil ɣar SIDI, nnan: “Neccin nexḍa akidek, minzi neccin nesmeḥ di AREBBI nneɣ, nsexxar ibaɛlen.”
11 Xenni inna SIDI i ayt n Israil: “Ma war kenniw ssnejmeɣ zeg ufus n Imiṣriyyen d Imuriyyen u zeg ufus n ayt n Ɛammun d Ifilisṭiniyyen
12 u zeg ufus n ayt n Ṣidun u zeg ufus n Iɛamaliqiyyen d Imaɛuniyyen, inni tuɣa kenniw iḥṣaren umi kenniw i d ɣari tesɣuyyem, ma xenni Necc war ssnejmeɣ kenniw zeg ufus nsen?
13 Waxxa amenni kenniw tsemḥem dayi u tsexxarem i irebbiten nneɣni. S uyenni war kenniw ssenjimeɣ ɛad. ■
14 Uyurem, tesɣuyyem ɣar irebbiten nni tareccḥem i yixef nwem. Jjem ten ad kenniw ssnejmen di řweqt n řeḥṣaret.
15 Maca ayt n Israil nnan i SIDI: “Neccin aqa nexḍa. Egg akidneɣ marra min i d ac iɛejben di tiṭṭawin nnek, mɣir senjem aneɣ ass-a waha!”
16 U nitni ssiggʷejen irebbiten iɣriben zi řwest nsen uca sexxaren i SIDI. Xenni war izemmar řeɛmar nnes ad tarbu ɛad řeɣben n Israil.
17 Ttwasmunen ayt n Ɛammun uca wtin iqiḍan nsen di Jilɛad. Uřa d ayt n Israil munen u nitni wtin iqiḍan nsen di Miṣfa.
18 Xenni inna řgens, řḥukkam n Jilɛad, i wayawya: “Man aryaz i ɣa immenɣen d amezwaru ak-d ayt n Ɛammun? Netta ad idweř d azeǧif x marra imezdaɣ n Jilɛad.” ■