Amenɣi ḍidd i ujeǧid Yabin d ijeǧiden nni akis iǧan
11
1 Umi Yabin, ajeǧid n Ḥaṣur, isřa aya, issekk ɣar Yubab, ajeǧid n Madun, ɣar ujeǧid n Cimrun, ɣar ujeǧid n Akcaf, 2 u ɣar ijeǧiden inni tuɣa izeddɣen ɣar ccamal di Temmurt n Idurar u di Řewḍa ɣar ljanub zi Kinnarut u di Temmurt Iwaṭan u x tiwririn n Dur ɣar řɣarb, 3 ɣar Ikenɛaniyyen di ccarq d řɣarb u ɣar Imuriyyen, Iḥittiyyen d Ifiriziyyen d Iyabusiyyen deg idurar u ɣar Iḥiwiyyen, ɣar uḍar n wedrar n Hirmun di temmurt n Miṣfa. 4 Ffɣen-dd nitni s marra řɛeskar nsen akidsen, ijj n ubarra ameqqran n řgens, am ijdi ɣar tma n řebḥar, anect aṭṭas, uca arni ɣars aṭṭas s waṭṭas n iysan d ikarruten. 5 Marra ijeǧiden-a řaɣan-dd xasen uca usin-dd, wtin iqiḍan nsen jmiɛ ɣar waman n Mayrum i umenɣi ḍidd i Israil.
Aṭeffu n ccamal n Kenɛan (Yac. 11)
6 Inna SIDI i Yacuwa: “War zzaysen tteggʷed, minzi tiwecca ɣar řweqt ammu řexxu ad ten ggeɣ ttwaɣeřben marra zzat i wudem n Israil. Cek ad tqessem iḍaren n iysan nsen uca ad tesscemḍed ikarruten nsen di tmessi.”
7 Yacuwa s marra řɛeskar akides, iffeɣ-dd ɣarsen s ict n řɣefřet ɣar waman n Mayrum uca wḍan-dd xasen. 8 SIDI igga i-ten deg ufus n Israil uca nitni wtin ten, ḍfaren ten ɣares ař Ṣidun-Ameqqran d Misrafut-Mayim, u ɣares ař taysart n Miṣfa ɣar ccarq. Nitni qḍan ten ařami war zzaysen iqqim uřa d ijj i inejmen. 9 Yacuwa igga akidsen am mammec d as inna SIDI. Netta iqess iḍaren n iysan nsen uca issecmeḍ ikarruten nsen s tmessi.
10 Di řweqt nni iɛqeb Yacuwa uca iṭṭef Ḥaṣur uca iwta ajeǧid nnes s řeqḍeɛ n ssif, minzi Ḥaṣur tuɣa-t qbeř d azeǧif x marra tigeldiwin-a.
11 Wtin marra řeɛmar iddaren nni dayes iǧan s řeqḍeɛ n ssif uca ḥarrmen ten u nɣin ten. War iqqim walu zi marra min ittarran nnefs uca issecmeḍ Ḥaṣur s tmessi.
12 Iṭṭef Yacuwa marra tineddam n ijeǧiden-a s marra ijeǧiden nsen uca iwta i-ten s řeqḍeɛ n ssif uca iḥarrem i-ten, am mammec tuɣa yumur Musa, amsexxar n SIDI. ■
13 Marra tineddam nni ibedden x tiwririn war tent sscemḍen Israiliyyen s tmessi, mɣir Ḥaṣur umi issecmeḍ Yacuwa s tmessi.
14 Keccḍen ayt n Israil marra takeccaḍt n tneddam d řebhayem i ixef nsen. Nɣin maca marra iwdan s řeqḍeɛ n ssif, ařami ten teḥḥan. Marra min ittaran nnefs, war zzayes jjin uřa d ijj.
Lista n marra min iṭṭef Yacuwa n temmurt n Kenɛan
15 Am mammec t yumur SIDI i umsexxar nnes Musa, ammu i yumur Musa Yacuwa, uca ammu i-t igga Yacuwa. Netta war ismiḥ uřa deg ijj n wawař zi marra awařen i yumur SIDI i Musa. ■
16 Ammu iṭṭef Yacuwa marra tammurt nni, Tammurt n Idurar d marra Tammurt n Ljanub d marra tammurt n Jucan d Temmurt Iwaṭan d Řewḍa d idurar n Israil d řwaṭa nnes,
17 marra tammurt zeg Wedrar d Aqeccar, wenni isgeɛɛaden ɣar Saɛir ɣares ař Baɛl-Jad, di teysart n Lubnan, swadday i wedrar n Ḥirmun. Marra ijeǧiden nsen iḥebbes i-ten, iwta i-ten uca inɣa i-ten.
18 Aṭṭas n wussan i imneɣ Yacuwa ak-d marra ijeǧiden-a.
19 War iǧi uřa d ict n tendint i iggin řehna ak-d ayt n Israil, mɣir Iḥiwiyyen, inni tuɣa izeddɣen di Jibɛun. Nitni ṭṭfen tent marra s umenɣi. 20 Minzi SIDI tuɣa igga ad isseqseḥ uř nsen ař dd ɣa ffɣen ad mmenɣen ak-d Israil, ḥima ad ten iḥarrem uca war xasen yareḥḥem, ḥima ad ten iqḍa, am mammec tuɣa yumur SIDI i Musa.
21 Di řweqt nni iffeɣ Yacuwa uca iteḥḥa Iɛanaqiyyen zi temmurt n idurar, zi Ḥabrun, zi Dabir, zi Ɛanab, zi marra Tammurt n Idurar n Yahuda u zi marra tammurt n idurar n Israil. Yacuwa iḥarrem i-ten ak-d tneddam nsen i uteḥḥi. 22 Di temmurt n ayt Israil war qqimen ɛad Iɛanaqiyyen, qqimen mɣir di Ɣazza, Jat d Acdud.
23 Iṭṭef Yacuwa marra tammurt nni, am mammec marra min tuɣa issiweř SIDI ɣar Musa, uca Yacuwa iwca i-tt d řwart i Israil ɛlaḥsab tarbiɛin n tqebbař nsen. Xenni tuɣa tammurt tareyyeḥ zeg umenɣi.