1 Issiweř SIDI ak-d Musa, inna:

2 “Siweř ak-d ayt n Israil uca ini asen: ‘Mařa ijj n weryaz niɣ ict n temɣart i iwejden maḥend ad iwc awař n temrist n weɛzař maḥend ad iɛzeř ixef nnes i SIDI, 3 xenni ad iggʷej x binu d ccrab. War isess řxeǧ zi binu niɣ řxeǧ zi ccrab u war isess aman n uḍiř, u war ittett zeg uḍiř azeyza niɣ wenni yuẓɣen. ^□   4 Marra ussan n weɛzař nnes war ittett ca min dd-iffɣen zi tzayart, zeg uɛeqqa nnes ař taqcurt nnes.

5 Marra ussan n wawař i dd ttasen ak-d weɛzař nnes war ittekk řmus x uzeǧif nnes ař ɣa qeffřen wussan nni iɛzeř i SIDI uca ad yiři iqeddes uca ad yejj iɛeyyacen n ucewwaf n uzeǧif nnes ad mɣaren. ^■   6 Marra ussan i issḥuzz i SIDI, war dd-ittqarrib ca ɣar řxecbet n ijj n umettin. ^□   7 War issxemmij ixef nnes x babas niɣ x yemmas niɣ x umas niɣ x učmas mařa gguren ad mmten, minzi tamrist n weɛzař n AREBBI nnes aqa-tt x uzeǧif nnes.

8 Marra ussan n weɛzař nnes ad yiři iqeddes i SIDI. 9 Mařa wenni ittmettan ad immet deɣya deg wermac n wabřiwen uca issexmej azeǧif nnes s temrist n weɛzař nnes, xenni ad iḥeff azeǧif nnes deg wass n usizdeg nnes, deg wass wiss sebɛa ittxeṣṣa ad t iḥeff.

10 Deg wass wiss tmenya ad yawi tnayen n tejliliḥin niɣ tnayen n iḍbiren ɣar ukehhan ɣar wadaf n Uqiḍun n Umsagar.

11 Akehhan ad issewjed ict d taɣarṣt n ddenb d ict d taɣarṣt n wecmaḍ uca ad ifdi x řeɛmar nni minzi netta aqa ixḍa di ssibbet n umettin u netta ad issqeddes azeǧif nnes ɛawed deg wass nni ^□  

12 uca ad ineyyec nican ussan n weɛzař nnes i SIDI uca ad iqeddem ijj n izmar n ijj n useggʷas d taɣarṣt n umarwas. Ussan iɛdun ad iřin wḍan minzi aqa tᵉttwasexmej temrist n weɛzař nnes.

13 Wa d azerf n wenni iɛezzřen ixef nnes s temrist n weɛzař: deg wass min di ttwakemmřen wussan n weɛzař nnes, ad t awyen ɣar wadaf n Uqiḍun n Umsagar.

14 Xenni ad dd-issqarreb tawhibt nnes ɣar SIDI, ijj n izmar icnan qaɛ n ijj n useggʷas am tɣarṣt n wecmaḍ d ict n texsi icnan qaɛ n ijj n useggʷas am tɣarṣt n ddenb d ijj n icarri icnan qaɛ am tɣarṣt n řehna

15 d ict n tsuǧet ak-d weɣrum břa antun d řemsemnat n waren azdad ixeǧḍen s zzect d teřfaf n weɣrum břa antun ttwadehnent s zzect uřa d tawhibt nnes n řɣiǧet d tewhibin nnes n useyyeb.

16 Akehhan ad yawi man aya zzat i wudem n SIDI uca ad issewjed taɣarṣt nnes n ddenb d tɣarṣt nnes n wecmaḍ.

17 Ad issewjed icarri am tɣarṣt n řehna i SIDI uřa d tasuǧet ak-d tecnifin břa antun uca akehhan ad issewjed ɛawed tawhibt n řɣiǧet nnes d tewhibin n useyyeb nnes.

18 Xenni amɛezzař ad iḥeff acewwaf n temrist nnes n weɛzař ɣar wadaf n Uqiḍun n Umsagar uca ad iksi acewwaf n uzeǧif n weɛzař nnes uca ad yegg aya x tmessi i iǧan sadu tɣarṣt n řehna. ^■  

19 Xenni ad iksi ukehhan tameṣṣaḍt n zzat yenggʷan n icarri d ict n temsemment břa antun zi tsuǧet d ict n teřfeft břa antun uca ad ten issars x ifassen n umɛezzař s temrist n weɛzař awarni ma iḥeff tamrist nnes n weɛzař. 20 Akehhan ad tent issenhezz zi ssa ɣar da zzat i wudem n SIDI. Aqa-tt d ict n tmesřact tamqeddast i ukehhan, ak-d idmaren n wenhezzi u ak-d ucekrud n tewhibt ittwasgeɛɛden. Awarni aya izemmar umɛezzař s temrist n weɛzař ad isu binu. ^■  

21 Wa d azerf n umɛezzař s temrist nni tuɣa iwaɛden tawhibt nnes di ssibbet n temrist n weɛzař nnes, barra min izemmar ufus nnes ɛad ad issiweḍ. Ittxeṣṣa as ad yegg ɛlaḥsab awař i iwcin, ɛlaḥsab azerf n temrist n weɛzař nnes.’ ”

22 Issiweř SIDI ak-d Musa, inna:

23 “Siweř ak-d Harun d iḥenjiren nnes uca ini ‘Ammu ad tbarkem ayt n Israil uca ad asen tinim:

25 SIDI ad yarr udem nnes ad xak yegg tfawt uca ad xak iḥinn.

26 SIDI ad ɣarek dd-inneqřeb udem nnes uca ad ac iwc řehna!’

27 Ad ssiwḍen Isem inu x ayt n Israil u Necc ad ten barkeɣ.”