1 Řami tuɣa ɣares ɣar Abram tesɛa u-tesɛin n iseggʷusa, iban as-dd SIDI i Abram, inna as: “Necc d Arebbi Amzemmar x kuřci! Uyur zzat i wudem inu uca iři d bnadem ikemmřen! ^□  ■   2 Necc ad ggeɣ Řɛahd inu jar ayi d cek uca ad cek sskettareɣ s yijj n cckel imɣar.” ^■   3 Xenni iwḍa Abram x uɣembub nnes uca issiweř AREBBI akides, inna as: 4 “Xzar, Necc ad ggeɣ Řɛahd inu akidek uca cek ad tiřid d tababat n ijj n ubarru n řegnus. ^■   5 War ittiři isem nnek ɛad ‘Abram’ maca ‘Ibrahim’, minzi Necc ggiɣ cek d tababat n ijj n ubarru n řegnus. 6 Uca Necc ad cek arreɣ ad tegged řɣiǧet aṭṭas s waṭṭas u ad cek arreɣ d řegnus u ijeǧiden ad zzayek dd-ffɣen. ^■   7 Ad ggeɣ Řɛahd inu jar ayi d cek, d zzariɛet nnek awarni ac di marra jjiřat nsen, am ijj n Řɛahd i řebda, ḥima ad iřiɣ d AREBBI i cek u i zzariɛet nnek awarni ac. ^■   8 Ad ac wceɣ, i cek u i zzariɛet nnek awarni ac, tammurt mani tuɣa tzeddɣed am ubarrani, marra tammurt n Kenɛan, d agřa i řebda. Necc ad iřiɣ d AREBBI i nitni.” ^■   9 Inna AREBBI ɛawed i Ibrahim: “Cek ad teḥḍid Řɛahd inu, cek d zzariɛet nnek awarni ac di jjiřat nsen.

10 D wa d Řɛahd inu wenni i ɣa teḥḍam jar ayi-dd d kenniw d zzariɛet nnek awarni ac: ittxeṣṣa ad ixten zzaywem marra min iǧan d awtem.

11 Kenniw ad txetnem aysum n řeɛdařyet nwem uca man aya ad tiři d řeɛřamet n Řɛahd jar ayi-dd d kenniw. ^■  

12 Mmis n tmenya n wussan ad ixten jar awem, mkuř awtem di marra jjiřat nwem, am wenni dd-ixeřqen di taddart nnek am wenni ittwasɣen s nnuqart zi kuř abarrani u war iǧin zi zzariɛet nnek. ^■  

13 Am wenni dd-ixeřqen di taddart nnek, am wenni tesɣid s nnuqart, ittxeṣṣa as ad ixten. Ammu i ɣa yiři Řɛahd inu deg weysum nwem d Řɛahd i řebda.

14 Aryaz war ixtinen, wenni řeɛdařyet nnes war tt xtin, aryaz nni ittxeṣṣa ad t qessen zi řgens nnes. Aqa yarẓa Řɛahd inu.” ^□  

15 Inna AREBBI ɛawed i Ibrahim: “I Saray tamɣart nnek war d as třiɣid ɛad Saray, maca Sara d wa i ɣa yiřin isem nnes. ^□  

16 Minzi ad tt barkeɣ u zzayes ad ac wceɣ mmic. Wah, ad tt barkeɣ uca nettat ad tedweř d řegnus u ijeǧiden n řegnus ad zzayes dd-ffɣen!”

17 Xenni iwḍa Ibrahim x uɣembub nnes uca iḍḥec, inna deg wuř nnes: “Aryaz n mya n iseggʷusa ma ad as dd-ittwaxřeq mmis? U Sara, tenni ɣar iǧa tesɛin n iseggʷusa, ma ɛad ad dd-taruw?”

18 Inna Ibrahim i AREBBI: “Mři Ismaɛil iddar qibač i wudem nnek!”

19 Maca AREBBI inna: “Lla, ɛad Sara, tamɣart nnek, d tenni d ac dd ɣa yarwen aseymi, uca cek ad as třaɣid Isḥaq. Necc ad ggeɣ Řɛahd inu akides d Řɛahd i řebda, ɛawed ak-d zzariɛet nnes awarni as. ^□  ■   20 Zi jjihet n Ismaɛil, aqa seǧeɣ ac. Xzar, Necc barkeɣ t uca ad t arreɣ ittaruw řɣiǧet u ad t arreɣ d aṭṭas. Tenɛac n arruyas i dd ɣa yejj, ad t ggeɣ d ijj n řgens imɣar. ^■   21 Maca ad ggeɣ Řɛahd inu ak-d Isḥaq, wenni i d ac dd ɣa taruw Sara di řweqt-a, deg useggʷas i dd ɣa yasen.” ^■   22 Umi ikemmeř awař nnes akides, igeɛɛed AREBBI, iggʷej x Ibrahim.

23 Iksi Ibrahim mmis Ismaɛil, d marra isemɣan i dd-ittwaxeřqen di taddart nnes, d marra inni immesɣen s nnuqart, marra min iǧan d awtem jar aytbab n taddart n Ibrahim uca ixten řeɛdařyet nsen deg wass nni am mammec i d as inna AREBBI. 24 Tuɣa ɣar Ibrahim tesɛa u-tesɛin n iseggʷusa umi ixten deg weysum n řeɛdařyet nnes. ^□   25 Igga mmis Ismaɛil třeṭṭac n iseggʷusa, umi t xetnen deg weysum n řeɛdařyet nnes. 26 Ixten Ibrahim d mmis Ismaɛil deg wass d ijjen. 27 Xetnen akides marra iryazen n taddart nnes, inni dd-ittwaxeřqen di taddart nnes uřa d inni immesɣen s nnuqart zeg ubarrani. ^□