1 Saray, tamɣart n Abram, war d as dd-tiruw ca. Tuɣa ɣares ict n tayya zi Miṣra qqarent as Hajar. 2 Tenna, xenni, Saray i Abram: “Aqa teẓrid belli SIDI iṭṭef xafi tarwa. Adef ɣar tayya inu, balak ad zzayes ksiɣ tarwa.” Abram tuɣa issḥessa ɣar Saray. ^□   3 Awarni řami izdeɣ Abram ɛecra n iseggʷusa di temmurt n Kenɛan, tiwi-dd Saray, tamɣart n Abram, tayya nnes Hajar, tenni zi Miṣra, uca tewca as-dd i Abram, aryaz nnes, d tamɣart nnes. 4 Yudef x Hajar uca nettat teksi ddeyset. Umi teẓra belli teksi ddeyset, xenni tedweř lallas tᵉttwasseḥqar di tiṭṭawin nnes. 5 Tenna Saray i Abram: “Zi ssibbet nnek ggin dayi řmunkar. Necc ggiɣ tayya inu deg weḥsin nnek. Umi teẓra belli teksi ddeyset, dewřeɣ d tameḥguret di tiṭṭawin nnes. Ejj ad iḥkem SIDI jar ayi d cek!” 6 Inna Abram i Saray: “Xzar, tayya nnem deg ifassen nnem. Egg zzayes min tᵉttwařid cem mliḥ.” Uca Saray tqemmeɛ i-tt u xenni nettat tarweř zzayes.

7 Uca Lmalak n SIDI iřqa i-tt ɣar tařa n waman di řexřa, ɣar tařa deg webrid ittawyen ɣar Cur. ^□   8 Inna: “Hajar, tayya n Saray, manis dd-tusid u mani i ɣa traḥed?” Nettat tenna: “Trakkwařeɣ zeg wudem n lalla Saray!” 9 Xenni inna as Lmalak n SIDI: “Dweř ɣar lallam, uḍar sadu ifassen nnes.”

10 Inna as ɛawed Lmalak n SIDI: “Ad kettareɣ aṭṭas zzariɛet nnem, ař war izemmar ad ten ḥesben řami i ɣa yiřin deg waṭṭas.”

11 Inna as Lmalak n SIDI ɛawed: “Aqa řexxu, teksid ddeyset uca ad tarwed aseymi. Ad as tegged Ismaɛil, minzi SIDI isřa am di řemḥayen nnem. ^□  

12 Uca netta ad yiři d ijj n bnadem amecnaw asnus n řexřa. Afus nnes ad yiři x marra, u afus n marra ad yiři xas. Ad izdeɣ arendad n marra aytmas.” ^■  

13 U nettat třaɣa x Yisem n SIDI i ɣares-dd issiwřen, tenna: “Cek d Arebbi i ittwařan!”, minzi tenna: “Ma war da ẓriɣ wenni d ayi ittwařan?”

14 S uya semman anu nni: anu ‘Laḥay-Ru’i’. Xzar, aqa-t jar Qadac d Barad. ^□  ■  

15 Uca turuw-dd Hajar i Abram aseymi. Igga as Abram isem n mmis nni i d as dd-turuw Hajar, Ismaɛil. ^■  

16 Abram tuɣa ɣares setta u-tmanyin n iseggʷusa, umi dd-turuw Hajar Ismaɛil i Abram.