‏1 أَ إِمْعِيزّنْ إِنُو، وَارْ تِّيقّمْ شَا ذِي مَارَّا أَرُّوحْ، مَاشَا قدْجْبمْ أَرُّوحَاثْ، مَا زِي أَربِّي إِ إِدْجَانْ، مِينْزِي أَطَّاسْ ن إِنَابِييّنْ إِسّْخَارِّيقنْ أَقَا فّْغنْ-د غَارْ دُّونشْثْ. ^▪   ‏2 س مَانْ أَيَا أَذْ ثسّْنمْ أَرُّوحْ ن أَربِّي: مَارَّا أَرُّوحْ ونِّي إِشهّْذنْ بلِّي يشُّو لْمَاسِيحْ يُوسَا-د ذِي أَرِّيمثْ، أَقَا نتَّا زِي أَربِّي. ‏3 مَارَّا أَرُّوحْ ونِّي وَارْ إِشهّْذنْ بلِّي يشُّو يُوسَا-د ذِي أَرِّيمثْ، وَارْ إِدْجِي شَا زِي أَربِّي، مَاشَا زِي أَرُّوحْ ن لْمَاسِيحْ أَفَالْسُو ونِّي إِ خفْ ثسْڒَامْ أَذْ د-يَاسْ، أَقَا نتَّا ذَا ڒخُّو ذِي دُّونشْثْ. ^▫  ▪   ‏4 مِينْزِي أَقَا كنِّيوْ ذ ثَارْوَا ن أَربِّي، أَقَا ثْغلّْبمْ خَاسنْ، مِينْزِي ذ ونِّي إِدْجَانْ ذَايْومْ ذ أَمقّْرَانْ خْ ونِّي إِدْجَانْ ذِي دُّونشْثْ. ‏5 نِيثْنِي زِي دُّونشْثْ، س ؤُينِّي سَّاوَاڒنْ زِي دُّونشْثْ ؤُشَا دُّونشْثْ ثتّسْڒَا أَسنْ-د. ‏6 أَقَا-نغْ زِي أَربِّي. ونِّي إِسّْننْ أَربِّي، إِتّسْڒَا أَنغْ. ونِّي وَارْ إِدْجِينْ زِي أَربِّي وَارْ ذ أَنغْ إِتّسْڒِي شَا. س مَانْ أَيَا إِ غَا نسّنْ أَرُّوحْ ن ثِيذتّْ ذ أَرُّوحْ ن ؤُودَّارْ. ^▪  

‏7 أَ إِمْعِيزّنْ إِنُو، أجّْ أَنغْ أَذْ نخْسْ أَيَاوْيَا، مِينْزِي ثَايْرِي زِي أَربِّي، ؤُ مَارَّا ونِّي إِتّخْسنْ، ذ نتَّا إِتّْوَاخڒْقْ-د زِي أَربِّي ؤُشَا إِسّنْ أَربِّي. ‏8 مِينْزِي أَربِّي ذ ثَايْرِي، ؤُ ونِّي وَارْ إِتّخْسنْ، وَارْ إِسِّينْ شَا أَربِّي. ‏9 ذِي مَانْ أَيَا ثضْهَارْ أَنغْ-د ثَايْرِي ن أَربِّي، بلِّي أَربِّي أَقَا إِسّكّْ-د أَينِّي ن مِّيسْ إِ غَارسْ غَارْ دُّونشْثْ، حِيمَا أَذْ زَّايسْ ندَّارْ. ^▪  

‏10 ذِي مَانْ أَيَا إِ ثدْجْ ثَايْرِي، وَارْ إِدْجِي بلِّي نشِّينْ نتّخْسْ أَربِّي، مَاشَا بلِّي نتَّا إِتّخْسْ أَنغْ ؤُشَا إِسّكّْ-د مِّيسْ ذ أَصْڒَاحْ إِ دّْنُوبْ نّغْ. ^▪  

‏11 أَ إِمْعِيزّنْ إِنُو، مَاڒَا ثُوغَا أَربِّي إِتّخْسْ أَنغْ أَمُّو، إِتّْخصَّا أَنغْ عَاوذْ أَذْ نخْسْ إِجّْ ونّغْنِي.

‏12 ؤُڒَا ذ إِجّنْ مَا إِژْرَا أَربِّي، مَاشَا مَاڒَا نتّخْسْ أَيَاوْيَا، أَربِّي أَذْ ذَايْنغْ إِقِّيمْ، ؤُشَا ثَايْرِي نّسْ أَقَا ثذْوڒْ ثكْمڒْ ذَايْنغْ. ^▪  

‏13 زِي مَانْ أَيَا نسّنْ بلِّي نتّْغِيمَا ذَايسْ ؤُ نتَّا ذَايْنغْ، مِينْزِي نتَّا إِوْشَا أَنغْ زِي أَرُّوحْ نّسْ.

‏14 أَقَا نژْرَا ؤُ نْشهّذْ بلِّي ثَابَابَاثْ إِسّكّْ-د ثَاممِّيثْ ذ أَمْسنْجمْ ن دُّونشْثْ.

‏15 مَارَّا ونِّي إِشهّْذنْ بلِّي يشُّو ذ مِّيسْ ن أَربِّي، أَربِّي أَذْ ذَايسْ إِزْذغْ ؤُ نتَّا أَذْ إِزْذغْ ذِي أَربِّي.

‏16 أَقَا نشِّينْ نُومنْ ؤُ نسّنْ ثَايْرِي ثنِّي إِدْجَانْ غَارْ أَربِّي إِ نشِّينْ. أَربِّي ذ ثَايْرِي ؤُ ونِّي إِ غَا إِقِّيمنْ ذِي ثَايْرِي، أَذْ إِقِّيمْ ذِي أَربِّي.

‏17 ذِي مَانْ أَيَا ثْكمّڒْ ثَايْرِي ذَايْنغْ، حِيمَا أَذْ غَارْنغْ ثِيڒِي تِّيقّثْ ذڭْ وَاسّْ ن لْحِيسَابْ، بلِّي أَمْ مَامّشْ إِدْجْ نتَّا، أَذْ نِيڒِي نشِّينْ عَاوذْ ذِي دُّونشْثْ.

‏18 ذِي ثَايْرِي وَارْ ثتِّيڒِي ثِيڭّْوُوذِي، مَاشَا ثَايْرِي نِيشَانْ ثسُّوفُّوغْ ثِيڭّْوُوذِي، مِينْزِي ثِيڭّْوُوذِي ثتَّاسْ-د أَكْ-ذ وقْضَاعْ ن ڒَايَاسْ. ونِّي إِتّڭّْوذنْ، وَارْ إِتِّيڒِي إِكْمڒْ ذِي ثَايْرِي.

‏19 نشِّينْ أَذْ نخْسْ أَربِّي، مِينْزِي نتَّا ثُوغَا إِتّخْسْ أَنغْ ذ أَمزْوَارُو. ‏20 مَاڒَا شَا ن إِجّنْ إِقَّارْ: ”نشّْ تّخْسغْ أَربِّي!“، أَمْ إِشَارّهْ ؤُمَاسْ، أَقَا نتَّا ذ بُو-إِخَارِّيقنْ. مِينْزِي ونِّي وَارْ إِتّخْسنْ ؤُمَاسْ ونِّي إِتّْوَاڒَا، خنِّي مَامّشْ إِ غَا يڭّْ أَذْ إِخْسْ أَربِّي ونِّي وَارْ إِتّْوِيڒِي. ^▪   ‏21 أَقَا ثَاوْصيّثْ-أَ نطّفْ إِ-ت زَّايسْ، بلِّي ونِّي إِتّخْسنْ أَربِّي، أَذْ إِخْسْ ؤُڒَا ذ ؤُمَاسْ. ^▪