‏1 مَاغَارْ كنِّيوْ سِيمَانْثْ نْومْ، أَ أَيْثْمَا، ثسّْنمْ بلِّي أَذَافْ نّغْ نِّي ذ غَارْومْ نڭَّا، وَارْ ثُوغِي إِدْجْ بَاطڒْ. ^▪   ‏2 ثُوغَا خَانغْ إِكَّا ؤُودّبْ ذ ڒْحَاڭْرَا ذِي فِيلِيبِّي قْبڒْ، أَمْ مَامّشْ ثُوغَا ثسّْنمْ. أَوَارْنِي مَانْ أَيَا، أَقَا نْبَارّحْ أَومْ ڒخْبَارْ أَصبْحَانْ ن لْمَاسِيحْ س ثرْيَاسْثْ ذِي أَربِّي ؤُ س ؤُمنْغِي أَمقّْرَانْ. ^▪   ‏3 س مِينْزِي أَفوّجْ نّغْ وَارْ إِدْجِي شَا زڭْ ؤُغكّْوِي نِيغْ زِي ڒخْمجْ نِيغْ زِي ڒْغشّْ، ‏4 مَاشَا نسَّاوَاڒْ أَمْ إِوْذَانْ إِ إِتّْوَاحسْبنْ نِيشَانْ زِي أَربِّي أَڒَامِي ذ أَنغْ إِوكّڒْ ثَابَارّحْثْ ن ڒخْبَارْ أَصبْحَانْ، وَارْ إِدْجِي إِ أَرْضَا ن إِوْذَانْ، مَاشَا إِ أَرْضَا ن أَربِّي ونِّي إِقدْجْبنْ ؤُڒَاونْ نّغْ. ^▪   ‏5 مِينْزِي عمَّارْصْ وَارْ ثُوغِي نتّڭّْ ثِيقدُّوحِينْ، أَقَا كنِّيوْ ثسّْنمْ ت، ؤُ وَارْ دْجِي شَا ذِي شَا ن طّْمعْ نّغْ، أَربِّي أَقَا-ث ذِينْ! ^▪   ‏6 وَارْ نَارزُّو أَعُودْجِي ن إِوْذَانْ ؤُڒَا زَّايْومْ ؤُڒَا زڭْ إِنّغْنِي، وَاخَّا ثُوغَا نْزمَّارْ أَذْ نڭّْ إِخفْ نّغْ جَارْ أَونْ أَمْ رُّوسُولْ ن لْمَاسِيحْ. ^▫  ▪   ‏7 مَاشَا ثُوغَا أَنغْ ذ إِحْنِيننْ أَكِيذْومْ، أَمْ إِشْثْ ن ثبْڒِيغْثْ ثتّْهِيلَّا ذڭْ إِحنْجِيرنْ نّسْ. ‏8 أَمُّو عَاوذْ إِ كنِّيوْ نتّخْسْ ؤُ ثُوغَا ذَايْنغْ مژْرِي مَاحنْذْ أَذْ نْشَارْشْ أَكِيذْومْ، وَارْ إِدْجِي ڒخْبَارْ أَصبْحَانْ ن أَربِّي وَاهَا، أَحقَّا ؤُڒَا ذ ثُوذَارْثْ نّغْ، مِينْزِي ثْذوْڒمْ ذ إِمْعِيزّنْ غَارْنغْ. ‏9 عقْڒمْ خنِّي، أَ أَوْمَاثنْ، مَامّشْ ثُوغَا نتَّامَارْ ؤُ نْخدّمْ س إِفَاسّنْ نّغْ دْجِيڒثْ ذ وَاسّْ، حِيمَا وَارْ خَاومْ نتّڭّْ دّْقڒْ. ^▪  

‏10 كنِّيوْ ذ أَربِّي أَقَا ذ ڒشْهُوذْ خْ مَامّشْ ذ أَومْ ثُوغَا نتّْبَارّحْ س ڒخْبَارْ أَصبْحَانْ ن أَربِّي ذِي ڒصْفَايثْ ذ ثْنِيشَانْثْ ن وُوڒْ، ؤُ مَامّشْ ثُوغَا نڭُّورْ بْڒَا ڒْعِيبْ جَارْ مَارَّا إِنِّي يُومْننْ.

‏11 أَقَا ثسّْنمْ عَاوذْ مَامّشْ ثُوغَا نْعدْجمْ إِجّْ-إِجّْ زَّايْومْ أَمْ إِجّْ ن بَابَاسْ إِ إِحنْجِيرنْ نّسْ، نڭَّا ذَايْومْ ؤُڒْ ؤُ نشْهذْ

‏12 مَاحنْذْ أَذْ ثُويُورمْ أَمْ مَامّشْ إِسْذَاهدْجْ قِيبَاتْشْ إِ أَربِّي، ونِّي ذ أَومْ د-إِڒَاغَانْ غَارْ ثْڭلْذِيثْ نّسْ ذ ؤُعُودْجِي نّسْ. ^▪  

‏13 س ؤُينِّي نتّْقَاذَا أَربِّي بْڒَا قطُّو، ؤُمِي كنِّيوْ ثْقبْڒمْ أَوَاڒْ ن أَربِّي إِ ثطّْفمْ زَّايْنغْ، وَارْ إِدْجِي أَمْ إِجّْ ن وَاوَاڒْ ن إِوْذَانْ، مَاشَا أَمْ وَاوَاڒْ ن أَربِّي ؤُشَا ذ مَانْ أَيَا إِ يدْجَانْ ذ ثِيذتّْ ؤُ أَوَاڒْ-أَ إِخدّمْ ذَايْومْ س ڒخْذَايمْ ن يِينِّي يُومْننْ.

‏14 مِينْزِي كنِّيوْ، أَ أَيْثْمَا، ثْذوْڒمْ ذ إِمضْفَارنْ ن ثْمسْمُونِينْ ن أَربِّي إِ إِدْجَانْ ذِي يَاهُوذِييَّا ذِي يشُّو لْمَاسِيحْ، مِينْزِي كنِّيوْ ثكْسِيمْ عَاوذْ أَرّْمحْ زڭْ إِوْذَانْ نْومْ، أَمْ مَامّشْ ث كْسِينْ ؤُڒَا ذ نِيثْنِي زڭْ وُوذَاينْ، ^▪  

‏15 إِنِّي إِنْغِينْ سِيذِيثْنغْ يشُّو لْمَاسِيحْ ذ إِنَابِييّنْ نْسنْ ؤُشَا ذَارّْشنْ خَانغْ. أَقَا أَثنْ وَارْ أَرطِّينْ شَا إِ أَربِّي ؤُشَا ذوْڒنْ ضِيدّْ ن إِوْذَانْ مَارَّا. ^▪  

‏16 مَاغَارْ منْعنْ أَنغْ مَاحنْذْ أَذْ نسِّيوڒْ غَارْ ڒڭْنُوسْ، حِيمَا أَذْ قِّيمنْ دَّارنْ مَاحنْذْ أَذْ عمَّارنْ ڒْمِيزَانْ ن دّْنُوبْ نْسنْ إِ ڒبْذَا. مَاشَا أَغْضَابْ أَقَا إِوْضَا-د خَاسنْ أَڒْ أَنڭَّارْ. ^▪  

‏17 أَ أَيْثْمَا، أَقَا نذْوڒْ ذ إِيُوجِيڒنْ نْومْ زِي جِّيهثْ ن ؤُغمْپُوبْ، وَاخَّا غَارْ ذْرُوسْ ن ڒْوقْثْ وَاهَا، مَاشَا وَارْ إِدْجِي زِي جِّيهثْ ن وُوڒْ. أَقَا ثُوغَا نَارزُّو س مژْرِي كْثَارْ أَذْ نْژَارْ أَغمْپُوبْ نْومْ.

‏18 ثُوغَا نخْسْ أَذْ غَارْومْ-د نَاسْ، ؤُ نشّْ بُولُوسْ إِشْثْ ن ثْوَاڒَا ذ إِشْثْ ن ثْوَاڒَا نّغْنِي، مَاشَا شِّيطَانْ إِبدّْ أَيِي ذڭْ وبْرِيذْ. ^▪  

‏19 مِينْزِي مَانْ ونْ إِ إِدْجَانْ ذ أَسِيثمْ نّغْ، ذ ڒفْرَاحثْ نّغْ نِيغْ ذ تَّاجْ ن ؤُعُودْجِي نّغْ إِلَّا كنِّيوْ وَاهَا زَّاثْ إِ سِيذِيثْنغْ يشُّو لْمَاسِيحْ خْمِي د غَا يَاسْ؟ ^▪   ‏20 أَقَا كنِّيوْ ذ أَعُودْجِي نّغْ ذ ڒفْرَاحثْ نّغْ.