4
1 خْسغْ أَذْ إِنِيغْ، مشْحَاڒْ مَا ذ أَوْرِيثْ أَقَا-ث عَاذْ ذ أَحنْجِيرْ وَارْ ذِينْ بُو ڒْفَارْقْ خْ ؤُمْسخَّارْ، وَاخَّا نتَّا ذ بَابْ ن مَارَّا نِيثْنِي. 2 نتَّا إِدْجْ عَاذْ سَاذُو إِنِّي ث يَاربَّانْ ؤُ سَاذُو إِوْكِيڒنْ إِنِّي خَاسْ إِحطَّانْ أَڒْ ڒْوقْثْ إِ يڭَّا بَابَاسْ زِي قْبڒْ. 3 أَمُّو عَاوذْ نشِّينْ، ؤُمِي ذ أَنغْ ثُوغَا عَاذْ ذ إِحنْجِيرنْ، ثُوغَا أَنغْ ذ إِسمْغَانْ سَاذُو صُّولْطَا ن لْفَارَايِيضْ ن دُّونشْثْأَ. 4 مَاشَا ؤُمِي د-يِيوضْ ؤُعمَّارْ ن ڒْوقْثْ، أَربِّي أَقَا إِسّكّْ-د مِّيسْ إِ د-إِتّْوَاخڒْقنْ زِي ثمْغَارْثْ، ذ ونِّي ثُوغَا سَاذُو شَّارِيعَا، ▪ 5 حِيمَا أَذْ إِفْذِي إِنِّي إِدْجَانْ سَاذُو شَّارِيعَا ؤُشَا خنِّي نشِّينْ أَذْ نطّفْ ڒفْضڒْ مَاحنْذْ أَذْ نتّْوَاقْبڒْ ذ مِّيسْ. ▫ ▪ 6 ؤُشَا مِينْزِي كنِّيوْ ثدْجَامْ ذ أَرَّاوْ، أَربِّي إِسّكّْ أَرُّوحْ ن مِّيسْ ذڭْ وُوڒَاونْ نْومْ، ونِّي إِتّْڒَاغَانْ: ’بَابَا، بَابَاثْنغْ!‘ ▪ 7 س ؤُينِّي وَارْ ثدْجِيمْ عَاذْ ذ إِمْسخَّارنْ، مَاشَا ذ إِحنْجِيرنْ، ؤُ مَاڒَا إِحنْجِيڒنْ إِ ثدْجَامْ، أَقَا كنِّيوْ عَاوذْ ذ إِوْرِيثنْ ن أَربِّي س يشُّو لْمَاسِيحْ. 8 مَاشَا ذِي زْمَانْ إِ وَارْ ثسِّينمْ شَا أَربِّي، ثُوغَا ثْعبّْذمْ إِنِّي وَارْ إِدْجِينْ س ثوَّا ذ إِربِّيثنْ. ▪ 9 ؤُشَا ڒخُّو، أَوَارْنِي ڒَامِي ثسّْنمْ أَربِّي، عَاذْ حْسنْ أَربِّي يَارْڭبْ خَاومْ، أَقَا ثْعقْبمْ عَاوذْ غَارْ صُّولْطَا ن لْفَارَايِيضْ إِضعْفنْ إِزڒْضنْ ن دُّونشْثْ-أَ، ثخْسمْ أَذْ ثنْثْ ثْعبْذمْ عَاوذْ! ▪
10 ثْحطَّامْ ؤُسَّانْ ذ إِيُورنْ ذ إِكُوذنْ ذ إِسڭّْوُوسَا. ▪
11 ڭّْوذغْ خَاومْ أَقَا تَّامَارغْ جَارْ أَومْ خْ وَالُو.
ثْغُويِّيثْ ن ذغْيَا
12 أَ أَيْثْمَا، تّْزَاوْڭغْ كنِّيوْ، إِڒِيمْ أَمشْنَاوْ نشّْ، مِينْزِي نشّْ أَمشْنَاوْ كنِّيوْ. كنِّيوْ وَارْ ذ أَيِي ثڭِّيمْ مِينْ وَارْ إِحْڒِينْ.
13 أَقَا كنِّيوْ ثسّْنمْ بلِّي بَارّْحغْ أَومْ-د س ڒخْبَارْ أَصبْحَانْ ذڭْ ؤُمزْوَارُو س ثُوضْعفْثْ ن أَرِّيمثْ إِنُو.
14 كنِّيوْ وَارْ ثسّحْقَارمْ نِيغْ ثسّْطيّْحمْ زِي ثْقدْجبْثْ إِنُو ذِي أَرِّيمثْ، مَاشَا ثْقبْڒمْ أَيِي أَمشْنَاوْ إِجّْ ن لْمَالَاكْ ن أَربِّي أَمشْنَاوْ يشُّو لْمَاسِيحْ. ▪
15 مَانِي ثْرُوحْ خنِّي لْبَارَاكَا نْومْ؟ مِينْزِي شهّْذغْ خَاومْ بلِّي، مَاڒَا ثُوغَا ثْزمَّارمْ، أَذْ ثْقڒْعمْ ثِيطَّاوِينْ نْومْ حِيمَا أَذْ أَيِي ثنْثْ ثوْشمْ.
16 مَا ذوْڒغْ ذ ڒعْذُو نْومْ مِينْزِي بَارّْحغْ كنِّيوْ س ثِيذتّْ؟
17 نِيثْنِي شْضَارنْ أَطَّاسْ خَاومْ، مَاشَا وَارْ إِدْجِي أَمنِّي وَاهَا، مَاغَارْ خْسنْ أَذْ كنِّيوْ حبّْسنْ، مِينْزِي كنِّيوْ ثشْضَارمْ خَاسنْ. ▪
18 مْلِيحْ أَذْ ثِيڒِيمْ ڒبْذَا ثْشطَّارمْ ذِي مِينْ إِدْجَانْ ذ أَصبْحَانْ، وَارْ إِدْجِي خْمِي كِيومْ إِ غَا حْضَارغْ وَاهَا.
19 أَ إِحنْجِيرنْ إِنُو، ثْوَاڒَا نّغْنِيثْ أَقَا أَيِي أَمْ إِشْثْ ن ثمْغَارْثْ ثنِّي إِكْسِينْ دّيْسثْ زَّايْومْ س ؤُنزْبَارْ ن ثَارْوَا، أَڒْ ذَايْومْ إِ غَا إِڒِينْثْ ثفْرَاسْ ن لْمَاسِيحْ. ▪ 20 خْسغْ ڒخُّو أَذْ إِڒِيغْ أَكِيذْومْ ؤُشَا أَذْ بدّْڒغْ ثْمِيجَّا إِنُو، مِينْزِي أَقَا ؤُڭْنُوغْ زَّايْومْ.
أَمذْيَا ن هَاجَارْ ذ سَارَا
21 إِنِيمْ أَيِي، كنِّيوْ إِنِّي إِتّخْسنْ أَذْ ثِيڒِيمْ سَاذُو شَّارِيعَا، مَا وَارْ ثطِّيعمْ شَا شَّارِيعَا؟ 22 مِينْزِي أَقَا ثُورَا بلِّي إِبْرَاهِيمْ ثُوغَا غَارسْ ثْنَاينْ ن إِحنْجِيرنْ، إِجّنْ ن ثَايَّا، ونّغْنِي ن ثْحُورّشْثْ. ▪ 23 ونِّي ن ثَايَّا أَقَا إِتّْوَاخْڒقْ-د عْلَاحْسَابْ دَّاثْ، مَاشَا ونِّي ن ثْحُورّشْثْ إِتّْوَاخْڒقْ-د س لْوَاعْذْ. ▪ 24 ثِينَا ذ ثْنَاينْ ن إِمذْيَا ن ثْنَاينْ ن ڒْعُوهُوذْ، إِجّنْ ن وذْرَارْ ن سِينَا ونِّي إِ د-إِثَارْونْ ثَاسْمُوغِي، أَقَا-ث هَاجَارْ. 25 مِينْزِي هَاجَارْ ذ أَذْرَارْ ن سِينَا ذِي أَرَابِييَّا ثنِّي يَاروْسنْ ذِي ؤُرْشَالِيمْ ن ڒخُّو ثنِّي إِدْجَانْ ذِي ثسْمُوغِي أَكْ-ذ ثَارْوَا نّسْ. ▪ 26 مَاشَا ؤُرْشَالِيمْ ن سنّجْ ذ ثَاحُورّشْثْ، أَقَا-ت ذ يمَّاثْنغْ. ▪ 27 مِينْزِي ثُورَا:
”فَارْحْ، أَ ثَامْغَارْثْ وَارْ إِتِّيرْونْ،
عيّذْ ؤُشَا ثسْغُويُّوذْ،
أَ شمْ ثنِّي وَارْ ذِي إِدْجِي ؤُنزْبَارْ ن ثَارْوَا،
مِينْزِي أَطَّاسْ إِدْجَانْ ذ ثَارْوَا ن ثمْغَارْثْ إِ إِدْجَانْ وحّْذسْ
خْ ثَارْوَا ن ثنِّي غَارْ إِدْجْ ورْيَازْ.“ ▪
28 نشِّينْ مَاشَا، أَ أَيْثْمَا، ذ ثَارْوَا ن لْوَاعْذْ أَمشْنَاوْ إِسْحَاقْ. ▪ 29 مَاشَا أَمشْنَاوْ ذِي ڒْوقْثْ نِّي، وِي د-إِثْوَاخڒْقنْ عْلَاحْسَابْ دَّاثْ ثُوغَا إِمَارّثْ ونِّي د-إِتّْوَاخڒْقنْ عْلَاحْسَابْ أَرُّوحْ، أَمُّو عَاوذْ ڒخُّو. ▪ 30 مَاشَا مِينْ إِقَّارْ وذْلِيسْ؟ ”نْضَارمْ بَارَّا ثَايَّا ذ مِّيسْ، مِينْزِي وَارْ إِتِّيڒِي مِّيسْ ن ثَايَّا ذ أَوْرِيثْ أَكْ-ذ مِّيسْ ن ثْحُورّشْثْ.“ ▪ 31 س ؤُينِّي، أَ أَيْثْمَا، أَقَا وَارْ ندْجِي شَا ذ ثَارْوَا ن ثَايَّا، مَاشَا ن ثْحُورّشْثْ. ▫