‏1 أَ إِڭَالَاطِييّنْ إِفْغُوڒنْ، وِي كنِّيوْ إِسُّوفّْغنْ زڭْ وبْرِيذْ؟ أَقَا لْمَاسِيحْ ثُوغَا إِتّْوَارْشمْ قِيبَاتْشْ إِ ثِيطَّاوِينْ نْومْ أَمْ ونِّي إِمُّوثنْ خْ صَّالِيبْ. ^▪   ‏2 ذڭَّا وَاهَا خْسغْ أَذْ ث سّْنغْ زَّايْومْ: مَا ثطّْفمْ أَرُّوحْ س ڒخْذَايمْ ن شَّارِيعَا نِيغْ ؤُمِي ثتّڭّمْ أَرَّايْ إِ لْ-إِيمَانْ؟ ‏3 مَا أَمنِّي ذ إِفْغُوڒنْ إِ ثدْجَامْ؟ ثبْذَامْ س أَرُّوحْ، مَا ڒخُّو أَذْ ثْكمّْڒمْ س دَّاثْ؟ ‏4 مَا ثژْرِيمْ ثَامَارَا أَطَّاسْ خْ وَالُو؟ مَا ثُوغَا س ثِيذتّْ خْ وَالُو؟ ‏5 ونِّي ذ أَومْ إِوْشِينْ أَرُّوحْ ؤُشَا إِتّڭّْ لْمُوعْجِيزَاثْ جَارْ أَومْ، مَا إِتّڭّْ إِ-ثنْثْ زِي ڒخْذَايمْ ن شَّارِيعَا نِيغْ ؤُمِي ثتّڭّمْ أَرَّايْ إِ لْ-إِيمَانْ،

‏6 أَمْ مَامّشْ ثُوغَا إِبْرَاهِيمْ يُومنْ ذِي أَربِي ؤُشَا خنِّي إِتّْوَاحْسبْ أَسْ-د مَانْ أَيَا ذ ثَاسڭْذَا. ^▪   ‏7 س ؤُينِّي سّْنمْ، بلِّي إِنِّي إِدْجَانْ ن لْ-إِيمَانْ، نِيثْنِي ذ أَيْثْ ن إِبْرَاهِيمْ. ‏8 مِينْزِي إِسّنْ أَربِّي قْبڒْ أَقَا ڒڭْنُوسْ أَذْ تّْوَاسڭّْذنْ س لْ-إِيمَانْ، إِزَّارْ إِبشَّارْ إِ إِبْرَاهِيمْ س ڒخْبَارْ أَصبْحَانْ، أَمْ مَامّشْ قَّارنْثْ ثِيرَا إِقدّْسنْ: ”ذَايكْ إِ غَا تّْوَابَارْكنْ ڒڭْنُوسْ مَارَّا.“ ^▪   ‏9 س ؤُينِّي إِنِّي يُومْننْ أَذْ تّْوَابَارْكنْ أَكْ-ذ ڒْمُومنْ إِبْرَاهِيمْ.

‏10 مَارَّا إِنِّي إِدَّارنْ س ڒخْذَايمْ ن شَّارِيعَا، أَقَا نِيثْنِي سَاذُو نّعْڒثْ، مِينْزِي ثُورَا: ”ذ أَمنْعُوڒْ كُوڒْ إِجّنْ ونِّي وَارْ إِقِّيمنْ إِتّطّفْ ذِي مَارَّا ثِيمسْڒَايِينْ يُورَانْ ذڭْ وذْلِيسْ ن شَّارِيعَا حِيمَا أَذْ ثنْثْ إِڭّْ!“ ^▪  

‏11 أَقَا إِتّْبَانْ بلِّي وَارْ ذِينْ حذْ إِ غَا إِتّْوَاسڭّْذنْ غَارْ أَربِّي س شَّارِيعَا، مِينْزِي ثُورَا: ”أَمْسڭَّاذْ س لْ-إِيمَانْ أَذْ إِدَّارْ!“ ^▪  

‏12 مَاشَا شَّارِيعَا وَارْ ثْكمّڒْ شَا س لْ-إِيمَانْ، مَاشَا بْنَاذمْ ونِّي إِتّڭّنْ مِينْ ذَايسْ يُورِينْ، أَذْ زَّايسْ إِدَّارْ. ^▪  

‏13 لْمَاسِيحْ أَقَا إِخدْجصْ خَانغْ، حِيمَا أَذْ أَنغْ إِفكّْ زِي نّعْڒثْ نِّي إِدْجَانْ خْ ينِّي سَاذُو شَّارِيعَا أَمْ ذ إِذْوڒْ خَانغْ ذ أَمنْعُوڒْ، مِينْزِي ثُورَا: ”ذ أَمنْعُوڒْ مَانْ ونْ مَا يُويْڒنْ خْ ثحْنَاشْثْ!“ ^▪  

‏14 حِيمَا أَذْ ثِيوضْ لْبَارَاكَا ن إِبْرَاهِيمْ غَارْ ڒڭْنُوسْ ذِي يشُّو لْمَاسِيحْ مَاحنْذْ س لْ-إِيمَانْ أَذْ نطّفْ لْوَاعْذْ ن أَرُّوحْ.

‏15 أَ أَيْثْمَا، أَذْ سِّيوْڒغْ أَمْ مَامّشْ ثَامسْڒَاشْثْ ثدْجْ ذ إِشْثْ ن ثْمسْڒَاشْثْ ن بْنَاذمْ: ؤُڒَا ذ ڒْعَاهْذْ إِ إِدْجَانْ زِي بْنَاذمْ، أَوَارْنِي ڒَامِي إِتّْوَاخْثمْ، وَارْ إِزمَّارْ بْنَاذمْ أَذْ ث إِبْضڒْ نِيغْ أَذْ ث إِبدّڒْ. ^▪  

‏16 أَقَا لْوُوعُوذْ تّْوَاڭّنْ إِ إِبْرَاهِيمْ ذ زَّارِيعثْ نّسْ. نتَّا وَارْ ذ أَسْ يِينِي شَا: ”إِ إِعقَّاينْ ن زَّارِيعثْ نْومْ!“، أَمْ إِ وَاطَّاسْ، مَاشَا: ”إِ ؤُعقَّا ن زَّارِيعثْ نّكْ!“، أَمْ إِ يِيجّنْ، ونِّي أَقَا-ث ذ لْمَاسِيحْ. ^▪  

‏17 خنِّي قَّارغْ أَمُّو: ڒْعَاهْذْ ونِّي إِڭِّينْ أَربِّي زِيشْ ذِي لْمَاسِيحْ، وَارْ ث ثْبطِّيڒْ شَا شَّارِيعَا ثنِّي ثُوسَا-د أَرْبعْميَّا ؤُ-ثْڒَاثِينْ ن إِسڭّْوُوسَا أَوَارْنِي مَانْ أَيَا حِيمَا أَذْ ثڭّْ لْوَاعْذْ إِخْوَانْ. ^▪  

‏18 مِينْزِي مَاڒَا ڒْوَارْثْ إِدْجْ س شَّارِيعَا، أَقَا وَارْ إِدْجِي عَاذْ س لْوَاعْذْ. مَاشَا أَربِّي أَقَا إِوْشَا إِ-ث إِ إِبْرَاهِيمْ س لْوَاعْذْ. ^▪  

‏19 خنِّي إِ ؤُمِي ثْنفّعْ شَّارِيعَا؟ أَقَا ثتّْوَامَّارْنِي غَارْ لْوَاعْذْ خْ سِّيبّثْ ن دّْنُوبْ أَڒَامِي د-ثُوسَا زَّارِيعثْ ثنِّي ؤُمِي إِتّْوَاڭّْ لْوَاعْذْ. ؤُ س لْمَالَاكَاثْ ثمّوْشْ شَّارِيعَا ذڭْ ؤُفُوسْ ن إِجّْ ن لْوَاصِيثْ. ^▪   ‏20 لْوَاصِيثْ وَارْ ذِينْ إِدْجِي إِ إِجّنْ، مَاشَا أَربِّي ذ إِجّنْ.

‏21 مَا خنِّي شَّارِيعَا ضِيدّْ إِ لْوَاعْذْ ن أَربِّي؟ عمَّارْصْ! مِينْزِي مَاڒَا ثُوغَا ثمّوْشْ إِشْثْ ن شَّارِيعَا ثْزمَّارْ أَذْ ثسّدَّارْ، ذ ثِيذتّْ ثُوغَا ثَاسڭْذَا س شَّارِيعَا. ‏22 مَاشَا أَذْلِيسْ ن شَّارِيعَا إِبلّعْ خْ مَارَّا ذِي دّْنُوبْ، حِيمَا لْوَاعْذْ أَذْ إِمّوْشْ س لْ-إِيمَانْ ذِي يشُّو لْمَاسِيحْ إِ ينِّي يُومْننْ. ^▪  

‏23 مَاشَا قْبڒْ مَا إِ د غَا يَاسْ لْ-إِيمَانْ، ثُوغَا أَنغْ نمّحْضَا ذِي شَّارِيعَا ؤُشَا إِتّْوَابلّعْ خَانغْ زَّايسْ أَڒَامِي د-يُوسَا لْ-إِيمَانْ ونِّي ثُوغَا إِ غَا إِضْهَارنْ. ‏24 س ؤُينِّي ثُوغَا شَّارِيعَا أَمْ ونِّي ذ أَنغْ إِتَّاربَّانْ أَڒْ لْمَاسِيحْ، حِيمَا أَذْ نتّْوَاسڭّذْ س لْ-إِيمَانْ. ^▪   ‏25 مَاشَا ڒخُّو، ؤُمِي د-يُوسَا لْ-إِيمَانْ، أَقَا وَارْ نقِّيمْ عَاذْ سَاذُو ونِّي إِتَّاربَّانْ.

‏26 مِينْزِي مَارَّا كنِّيوْ ذ أَيْثْ ن أَربِّي س لْ-إِيمَانْ ذِي يشُّو لْمَاسِيحْ. ^▪   ‏27 مِينْزِي مَارَّا إِنِّي إِتّْوَاسْغضْصنْ ذِي لْمَاسِيحْ، أَقَا أَرْضنْ لْمَاسِيحْ. ^▪   ‏28 خنِّي وَارْ ذِينْ عَاذْ ؤُذَايْ نِيغْ أَرَامِييْ، وَارْ ذِينْ عَاذْ إِسْمغْ نِيغْ أَحُورِّي، وَارْ ذِينْ عَاذْ أَرْيَازْ نِيغْ ثَامْغَارْثْ، مِينْزِي مَارَّا كنِّيوْ ذ إِجّنْ إِ ثدْجَامْ ذِي يشُّو لْمَاسِيحْ. ^▪   ‏29 مَاڒَا كنِّيوْ ثدْجَامْ ن لْمَاسِيحْ، أَقَا كنِّيوْ ذ زَّارِيعثْ ن إِبْرَاهِيمْ ؤُشَا عْلَاحْسَابْ لْوَاعْذْ ذ إِوْرِيثنْ. ^▪