‏1 أَوَارْنِي ڒَامِي عْذُونْ أَرْبعْطَاشْ ن إِسڭّْوُوسَا، رُوحغْ عَاوذْ غَارْ ؤُرْشَالِيمْ أَكْ-ذ بَارْنَابَا ؤُشَا إِوْيغْ أَكِيذِي عَاوذْ ثِيثُوسْ. ^▪   ‏2 مَاشَا ثُوغَا رُوحغْ عْلَاحْسَابْ إِجّْ ن ؤُسَارْڭبْ ن أَربِّي ؤُ مْڒغْ أَسنْ ڒخْبَارْ أَصبْحَانْ إِ تّْبَارّْحغْ جَارْ ڒڭْنُوسْ، إِ ينِّي غَارْ إِدْجْ ؤُوقَّارْ وحّذْسنْ، حِيمَا وَارْ تِّيزّْڒغْ نِيغْ أَذْ أَزّْڒغْ بَاطڒْ. ^▪   ‏3 عَاوذْ ثِيثُوسْ ونِّي ثُوغَا أَكِيذِي، وَاخَّا نتَّا ذ أَرَامِييُو، وَارْ خَاسْ ڭّنْ س ؤُغِيڒْ مَاحنْذْ أَذْ إِتّْوَاخْثنْ. ^▪   ‏4 مَاشَا مِينْزِي ؤُذْفنْ-د أَوْمَاثنْ إِسّْخَارِّيقنْ غَارْ أَنغْ حِيمَا أَذْ شكّْمنْ خْ ثِيڒلِّي نّغْ ثنِّي غَارْ أَنغْ ذِي يشُّو لْمَاسِيحْ، حِيمَا أَذْ أَنغْ ڭّنْ ذ إِسمْغَانْ، ^▪   ‏5 أَقَا نشِّينْ وَارْ ذ أَسنْ نْوَاضعْ ؤُڒَا ذ إِشْثْ ن ثْزحْزِيحْثْ إِ ڒحْصَارثْ نْسنْ، حِيمَا ثِيذتّْ ن ڒخْبَارْ أَصبْحَانْ أَذْ ثقِّيمْ أَكِيذْومْ.

‏6 مَاشَا إِنِّي ثُوغَا إِتّْبَاننْ ذ شَا جَارْ أَسنْ، - مِينْ مَا عْنَانْ وَارْ ذ أَيِي إِشْقِي، مِينْزِي أَربِّي وَارْ إِكسِّي س ثِيفْرَاسْ ن بْنَاذمْ - ، أَقَا وَارْ خَافِي نَّانْ وَالُو. ^▪   ‏7 س ڒْعكْسْ، ؤُمِي ژْرِينْ بلِّي تّْكلّْفغْ خْ ڒخْبَارْ أَصبْحَانْ إِ ينِّي بْڒَا أَخْثَانْ، أَمْ مَامّشْ إِتّْكلّفْ بُوطْرُوسْ خْ ڒخْبَارْ أَصبْحَانْ إِ ينِّي س وخْثَانْ، ‏8 - مِينْزِي ونِّي إِعَارّْننْ بُوطْرُوسْ ذِي ڒْخذْمثْ نّسْ أَمْ رَّاسُولْ جَارْ إِنِّي إِخثْننْ، إِعَارّنْ أَيِي عَاوذْ حِيمَا أَذْ ڭّغْ ڒْخذْمثْ ن رَّاسُولْ جَارْ ڒڭْنُوسْ - ^▪   ‏9 ؤُشَا ؤُمِي يَاعْقُوبْ ذ كِيفَا ذ يُوحَانَّا إِنِّي إِتّْوَاحسْبنْ ذ إِمْغَارنْ ژْرِينْ أَرْضَا إِ ذ أَيِي إِمّوْشنْ، وْشِينْ أَنغْ أَفُوسْ ن ثْمُونْثْ إِ نشّْ ذ بَارْنَابَا، حِيمَا أَذْ نْرَاحْ غَارْ ڒڭْنُوسْ ؤُشَا نِيثْنِي غَارْ ينِّي س وخْثَانْ.

‏10 ثُوغَا إِتّْخصَّا أَنغْ أَذْ نْفكَّارْ ذڭْ إِمزْڒَاضْ وَاهَا ؤُشَا خنِّي شْضَارغْ عَاوذْ مَاحنْذْ أَذْ ڭّغْ مَانْ أَيَا. ^▪  

‏11 مَاشَا ؤُمِي د-يُوسَا بُوطْرُوسْ غَارْ أَنْثِييُوخِييَا، مّْعَاڒغْ أَكِيذسْ س بْطَايْطَايْ، مِينْزِي نِيثْنِي ؤُفِينْ ذَايسْ ڒْعِيبْ.

‏12 مِينْزِي قْبڒْ مَا د-ؤُسِينْ شَا زِي يَاعْقُوبْ، ثُوغَا إِتّتّْ أَكْ-ذ ينِّي زِي ڒڭْنُوسْ، مَاشَا أَوَارْنِي مَا ؤُسِينْ-د نِيثْنِي، إِعْقبْ ؤُشَا إِسّْبعّذْ إِخفْ نّسْ زَّايْسنْ، مِينْزِي ثُوغَا إِڭّْوذْ زڭْ إِنِّي س وخْثَانْ.

‏13 ؤُڒَا ذ ؤُذَاينْ إِنّغْنِي ضْفَارنْ ث ذِي نِّيفَاقْ نّسْ، أَمنِّي عَاوذْ بَارْنَابَا، أَقَا نذْهنْ ث ذِي نِّيفَاقْ نْسنْ.

‏14 مَاشَا ؤُمِي ژْرِيغْ بلِّي وَارْ ڭُّورنْ شَا نِيشَانْ خْ وبْرِيذْ ن ثِيذتّْ ن ڒخْبَارْ أَصبْحَانْ، نِّيغْ إِ بُوطْرُوسْ زَّاثْ إِ مَارَّا: ”مَاڒَا شكْ، أَمْ ثدْجِيذْ ذ ؤُذَايْ، ثدَّارذْ أَمْ إِجّْ ن أَرَامِييُو، وَارْ إِدْجِي أَمشْنَاوْ ؤُذَايْ، مَايمِّي ثڭِّيذْ أَغِيڒْ خْ ينِّي زِي ڒڭْنُوسْ حِيمَا أَذْ دَّارنْ أَمْ وُوذَاينْ؟ ^▪  

‏15 أَقَا نشِّينْ نتّْوَاخْڒقْ ذ ؤُذَاينْ، وَارْ ندْجِي ذ إِمذْنَابْ زِي ڒڭْنُوسْ،

‏16 مَاشَا نسّنْ بلِّي بْنَاذمْ وَارْ إِتّْوَاسڭّذْ شَا س ڒخْذَايمْ ن شَّارِيعَا، مَاشَا س لْ-إِيمَانْ ذِي يشُّو لْمَاسِيحْ، أَقَا نُومنْ ؤُڒَا ذ نشِّينْ بلِّي أَذْ نتّْوَاسڭّذْ س لْ-إِيمَانْ ذِي لْمَاسِيحْ، وَارْ إِدْجِي س ڒخْذَايمْ ن شَّارِيعَا، مِينْزِي س ڒخْذَايمْ ن شَّارِيعَا ؤُڒَا ذ إِجّْ ن بْنَاذمْ وَارْ إِتّْوَاسڭَّاذْ شَا عمَّارْصْ. ^▪  

‏17 مَاشَا مَاڒَا نَارْزُو أَذْ نتّْوَاسڭّذْ ذِي لْمَاسِيحْ، نُوفَا بلِّي نشِّينْ عَاوذْ ذ إِمذْنَابْ، س ؤُينِّي مَا يشُّو لْمَاسِيحْ ذ أَمْسخَّارْ ن دّْنُوبْ؟ وَايَّاوْ!

‏18 مِينْزِي مَاڒَا بْنِيغْ عَاوذْ مِينْ هذْمغْ، أَذْ سّشْنغْ بلِّي نشّْ س إِخفْ إِنُو ذ أَمذْنُوبْ،

‏19 مِينْزِي س شَّارِيعَا أَقَا نشّْ مُّوثغْ إِ شَّارِيعَا، حِيمَا أَذْ دَّارغْ إِ أَربِّي. ^▪   ‏20 أَقَا تّْوَاصلّْبغْ أَكْ-ذ لْمَاسِيحْ ؤُشَا زِي سَّا ذ ثْسَاونْثْ وَارْ قِّيمغْ دَّارغْ عَاذْ نشّْ، مَاشَا لْمَاسِيحْ إِدَّارْ ذَايِي. ؤُشَا مِينْ دَّارغْ ڒخُّو عَاذْ ذِي أَرِّيمثْ، دَّارغْ س لْ-إِيمَانْ ن مِّيسْ ن أَربِّي ونِّي ذ أَنغْ إِتّخْسنْ ؤُ إِوْشَا إِخفْ نّسْ خَانغْ. ^▪   ‏21 وَارْ بضْڒغْ شَا أَرْضَا ن أَربِّي، مِينْزِي مَاڒَا ثُوغَا ثَاسڭْذَا س شَّارِيعَا، أَذْ يِيڒِي إِمُّوثْ لْمَاسِيحْ خْ وَالُو.“ ^▪