ثِيڒلِّي ذِي لْمَاسِيحْ
5
1 بدّمْ نِيشَانْ ذِي ثِيڒلِّي إِ زِي ذ أَنغْ إِفكّْ لْمَاسِيحْ ؤُشَا وَارْ تّْذكّْوِيڒمْ عَاوذْ مَاحنْذْ أَذْ ثكْسِيمْ أَزَايْڒُو ن ثسْمُوغِي. ▪ 2 أَقَا أَيِي نشّْ بُولُوسْ أَذْ أَومْ إِنِيغْ، مَاڒَا ثتّْوَاخثْنمْ، لْمَاسِيحْ وَارْ كنِّيوْ إِنفّعْ ذڭْ وَالُو. ▪ 3 عَاوذْ شهّْذغْ إِ مَارَّا بْنَاذمْ إِ غَا إِتّْوَاخثْننْ، أَقَا نتَّا س ؤُمَارْوَاسْ حِيمَا أَذْ إِڭّْ مَارَّا مِينْ إِدْجَانْ ذِي شَّارِيعَا. 4 كنِّيوْ إِنِّي إِتّخْسنْ أَذْ تّْوَاسڭّْذمْ س شَّارِيعَا، أَقَا ثْذوْڒنْ ثَارْخُومْ زِي لْمَاسِيحْ ؤُشَا زِي أَرْضَا إِ زِي د-ثوْضَامْ. 5 مِينْزِي نشِّينْ نتّْرَاجَا أَسِيثمْ ن ثْسڭْذَا س أَرُّوحْ نِّي إِدْجَانْ زِي لْ-إِيمَانْ. 6 مَاغَارْ ذِي يشُّو لْمَاسِيحْ، أَخْثَانْ نِيغْ بْڒَا أَخْثَانْ وَارْ إِسكّْوِي وَالُو، مَاشَا لْ-إِيمَانْ نِّي إِتّْوَاكمّْڒنْ س ثَايْرِي. ▪
7 كنِّيوْ ثُوزّْڒمْ مْلِيحْ، وِي كنِّيوْ إِمنْعنْ أَڒَامِي وَارْ ثطِّيعمْ عَاذْ إِ ثِيذتّْ؟ ▪ 8 طْوَاعْ-أَ وَارْ إِدْجِي زڭْ ونِّي ذ أَومْ إِتّْڒَاغَانْ. 9 شْوَايْثْ ن ونْثُونْ إِسّْممّْ مَارَّا أَرشْثِي. ▪
10 نشّْ تِّيقّغْ ذَايْومْ ذِي سِيذِيثْنغْ، أَقَا وَارْ ثشْغِيڒمْ إِخفْ نْومْ ؤُڒَا س إِشْثْ نْ ڒْحَاجثْ نّغْنِيثْ، ذ ونِّي كنِّيوْ إِتّْسدَّاعنْ، أَقَا أَذْ يَارْپُو ڒْحُوكْمْ، مَانْ ونْ مَا إِعْنَا نتَّا. ▪
11 أَ أَيْثْمَا، مَاڒَا نشّْ بَارّْحغْ كنِّيوْ عَاذْ س وخْثَانْ، مَايمِّي عَاذْ إِ غَا تّْوَامَارّْثغْ؟ مَا ثتّْوَاكّسْ ثَاعنْكْرِيفْثْ ن صَّالِيبْ؟ ▪
12 مَاعْلِيكْ قَاعْ قسّنْ إِخفْ نْسنْ إِنِّي كنِّيوْ إِقلّْقنْ. ▪
13 مِينْزِي كنِّيوْ إِ ثِيڒلِّي ؤُمِي د-ثتّْوَاڒَاغَامْ، أَ أَيْثْمَا، مَاشَا وَارْ تّْقدْجْبمْ ثِيڒلِّي أَمشْنَاوْ لْفُورْصَا إِ دَّاثْ، مَاشَا سخَّارمْ إِجّنْ إِ ونّغْنِي س ثَايْرِي. ▪
14 مِينْزِي مَارَّا شَّارِيعَا ثْكمّڒْ س يِيجّْ ن وَاوَاڒْ، أَقَا ذ مَانَايَا: ”أَذْ ثخْسذْ أَمْقَارّبْ نّكْ أَمشْنَاوْ إِخفْ نّكْ.“ ▪
15 مَاشَا مَاڒَا ثْزعْفمْ ؤُ ثْمزّْقمْ إِجّنْ ونّغْنِي، خنِّي حْضَامْ إِخفْ نْومْ وَارْ تّتّمْ شَا أَيَاوْيَا قَاعْ. ▪
ثُوذَارْثْ س أَرُّوحْ إِقدّْسنْ
16 مَاشَا نشّْ أَذْ أَومْ إِنِيغْ: ؤُيُورمْ ذِي أَرُّوحْ ؤُشَا وَارْ تّْكمّْڒنْ شَا نّشْوَاثْ ن دَّاثْ! ▪
17 مِينْزِي دَّاثْ إِتّمْغرْ ضِيدّْ ن أَرُّوحْ ؤُشَا أَرُّوحْ ضِيدّْ ن دَّاثْ، مِينْزِي نِيثْنِي تّْبدَّانْ أَكْ-ذ وَايَاوْيَا، خْ ؤُينِّي وَارْ ثْزمَّارمْ أَذْ ثڭّمْ مِينْ ثخْسمْ. ▪
18 مَاشَا مَاڒَا ثتّْوَاڭوّْذمْ س أَرُّوحْ، وَارْ ثدْجِيمْ عَاذْ سَاذُو شَّارِيعَا.
19 ڒخْذَايمْ ن دَّاثْ بَاننْثْ، أَقَا أَثنْثْ ذ زِّينَا ذ ڒخْمجْ ذ فَارْقْ-شّْغڒْ ▫ ▪ 20 ذ ؤُعْبَاذْ إِ لْ-أَصْنَامْ ذ ثْسحَّارْثْ ذ ڒعْذَاوثْ ذ ؤُمْشبّشْ ذ ڒحْسذْ ذ ثفْقحْثْ ذ ؤُغوّغْ ذ ؤُبطُّو ذ ثْغُورِيوِينْ إِ د-إِتّفّْغنْ زڭْ وبْرِيذْ، ▫ 21 ذ ثُوسْمِي ذ ونْغَايْ ذ ؤُغلِّي ذ ڒفْسذْ ؤُڒَا ذ ثِيمسْڒَايِينْ نّغْنِيثْ أَمْ ثِينَا. إِنِّي إِشغْڒنْ إِخفْ نْسنْ أَكْ-ذ ثْمسْڒَايِينْ-أَ، أَقَا إِزْوَارغْ نِّيغْ ث، ؤُ أَذْ ث إِنِيغْ عَاوذْ، أَقَا نِيثْنِي وَارْ وَارّْثنْ شَا ثَاڭلْذِيثْ ن أَربِّي. ▪
22 مَاشَا ڒْغِيدْجثْ ن أَرُّوحْ أَقَا-ت ذ ثَايْرِي ذ ڒفْرَاحثْ ذ ڒهْنَا ذ تَّاسِيعْ ن ڒْخَاضَارْ ذ ڒضْرَافثْ ذ ثْشُونِي ذ لْ-إِيمَانْ ذ ثمْهِينْثْ ؤُڒَا ذ ضّْبَارْ. ▪ 23 شَّارِيعَا وَارْ ثدْجِي ضِيدّْ ن ثْمسْڒَايِينْ-أَ. ▪ 24 مَاشَا إِنِّي إِدْجَانْ زِي لْمَاسِيحْ أَقَا صلّْبنْ دَّاثْ نْسنْ أَكْ-ذ مَارَّا شّهْوَاثْ ذ نّشْوَاثْ. ▪ 25 أجّْ أَنغْ أَذْ ندَّارْ س أَرُّوحْ ؤُ أَذْ نْسلّمْ إِخفْ نّغْ إِ أَرُّوحْ. 26 وَارْ ذ أَنغْ ثجِّي أَذْ نِيڒِي بْڒَا شَّانْ أَمْ إِ غَا نسّحْقَارْ إِجّنْ ونّغْنِي ؤُشَا أَذْ نَاسمْ إِجّنْ زڭْ ونّغْنِي.