9
1 مِينْزِي حسْبغْ بلِّي نْهْڒَا مَا ؤُرِيغْ أَومْ-د خْ ثْسخَّارْثْ إِ ثْوِيزَا إِ إِمْقدَّاسنْ، ▪ 2 مِينْزِي سّْنغْ نّيّثْ نْومْ إِصبْحنْ مِيخفْ خَاومْ سّمْغَارغْ جَارْ إِنِّي ن مَاسِيذُونِييَا، بلِّي أَخَايَا ثُوغَا ثوْجذْ زڭْ ؤُسڭّْوَاسْ إِعْذُونْ ؤُشَا شْضَارثْ نْومْ أَقَا ثسْفَاقْ أَزْينْ أَمقّْرَانْ. 3 مَاشَا سّكّغْ-د أَوْمَاثنْ-أَ، مَاحنْذْ أَسمْغَارْ نّغْ ذَايْومْ وَارْ إِتِّيڒِي شَا بَاطڒْ ذِي ثْمسْڒَاشْثْ-أَ، حِيمَا أَذْ ثِيڒِيمْ ثْحزّْممْ أَمْ مَامّشْ نِّيغْ، 4 حِيمَا، خْمِي كِيذِي إِ د غَا يَاسنْ شَا ن إِمَاسِيذُونِييّنْ ؤُشَا أَذْ كنِّيوْ أَفنْ عَاذْ وَارْ ثْحزّْممْ، نشِّينْ، - مَاحنْذْ وَارْ قَّارغْ شَا ’كنِّيوْ‘ -، وَارْ نْغطّرْ زڭْ ؤُسمْغَارْ إِ زَّايْومْ نسّمْغَارْ. 5 س ؤُينِّي ڭِّيغْ أَذْ تَّارغْ أَوْمَاثنْ نِّي، مَاحنْذْ أَذْ غَارْونْ د-أَسنْ ذ أَمزْوَارُو ؤُشَا أَذْ سّوْجْذنْ قْبڒْ لْبَارَاكَا ن ضّْذَاقِي ثِينِّي خْ إِتّْوَانَّا قْبڒْ إِ كنِّيوْ، أَقَا إِتّْخصَّا أَذْ ثِيڒِي صّذْقثْ-أَ غَارْ ؤُفُوسْ أَمْ إِشْثْ ن لْبَارَاكَا، وَارْ إِدْجِي أَخْمِي ت-إِ-د-كّْسنْ زِي ثڒْمشْثْ نْومْ. 6 مَاشَا سْنمْ دّڭَّا:
”ونِّي إِ غَا إِزَارْعنْ س ثْشطَّارْثْ، أَذْ إِمْجَارْ س ثَاشطَّارْثْ،
ؤُشَا ونِّي إِ غَا إِزَارْعنْ س ثشْرِيمثْ،
أَذْ إِمْجَارْ عَاوذْ س ثشْرِيمثْ.“ ▪
7 أَذْ إِڭّْ كُوڒْ إِجّنْ أَمْ مَامّشْ إِنْوَا ذڭْ وُوڒْ نّسْ، وَارْ إِدْجِي س إِمطَّاونْ نِيغْ س ؤُغِيڒْ، مِينْزِي أَربِّي إِتّخْسْ ونِّي إِتِّيشنْ س ڒفْرَاحثْ، ▪ 8 ؤُشَا أَربِّي أَقَا إِزمَّارْ أَذْ أَومْ إِوْشْ س كُوڒْ أَرْضَا س ؤُفيّضْ، حِيمَا ڒبْذَا ؤُ ذِي مَارَّا أَذْ غَارْومْ يِيڒِي مِينْ ثحْذَاجمْ ؤُشَا أَذْ ثَارْنِيمْ أَطَّاسْ ذِي مَارَّا ڒْخذْمثْ إِصبْحنْ، 9 أَمْ مَامّشْ ثُورَا:
”أَقَا إِبطَّا، إِوْشَا إِ إِمزْڒَاضْ،
ثَاسڭْذَا نّسْ ثتّْغِيمَا إِ ڒبْذَا.“ ▪
10 أجّْ أَذْ يِيڒِي ونِّي إِتِّيشنْ زَّارِيعثْ إِ ونِّي إِزَارْعنْ ؤُڒَا ذ أَغْرُومْ إِ مَاشَّا، أَذْ يَارْنِي ذِي زَّارِيعثْ نْومْ ؤُشَا أَذْ إِسّڭْمَا ڒْغِيدْجثْ ن ثْسڭْذَا نْومْ،
11 مَاحنْذْ أَذْ ثِيڒِيمْ تّجَّارمْ ذِي مَارَّا إِ مَارَّا ثَاشْرِيمثْ ثنِّي إِكمّْڒنْ زَّايْنغْ أَقَاذِي إِ أَربِّي.
12 مِينْزِي ڒْخذْمثْ ن ثْسخَّارْثْ ثَانِيثَا وَارْ ثدْجِي وَاهَا ذِي طّْوعْ ن مِينْ إِنقْصنْ إِ إِمْقدَّاسنْ، مَاشَا ثتَّاوِي عَاوذْ غَارْ وَاطَّاسْ ن ؤُقَاذِي إِ أَربِّي.
13 مِينْزِي س ثْقدْجبْثْ ن ثْسخَّارْثْ-أَ، أَقَا سّمْغَارَانْ ذِي أَربِّي زِي سِّيبّثْ ن طَّاعثْ نْومْ ذِي طّْوعْ ن شّْهَاذثْ إِ ڒخْبَارْ أَصبْحَانْ ن لْمَاسِيحْ ؤُڒَا زِي سِّيبّثْ ن ثشْرِيمثْ ن ثْوِيزَا نْومْ إِ نِيثْنِي ؤُ إِ مَارَّا.
14 نِيثْنِي أَذْ د-قَارّْبنْ غَارْ أَربِّي س ثْژَادْجِيثِينْ إِ كنِّيوْ، س ثَايْرِي أَطَّاسْ خْ سِّيبّثْ ن ؤُفيّضْ ن أَرْضَا ن أَربِّي نِّي خَاومْ إِدْجَانْ.
15 ثْقَاذْ أَسْ إِ أَربِّي خْ ثوْهِيبْثْ نّسْ إِ وَارْ نْزمَّارْ أَذْ زَّايسْ ننْطقْ.